Antau kelkaj tagoj la Ministerio de Eksteraj Aferoj de Chinio faris seriozan traktadon kun la japana registaro pri tio, ke la venena gaso postlasita de Japanio en la china urbo Qiqihar mortigis chinan civitanon, kaj kategorie postulis, ke la japana registaro kiel eble plej baldau forigu la kemiajn armilojn postlasitajn de ghi en Chinio kaj faru necesan respondon al la damaghitoj kaj la china popolo.

    La 4-an de augusto la venena gaso postlasita de Japanio en Qiqihar, nordorienta Chinio, damaghis multajn homojn, el kiuj 43 enhospitalighis, kaj Li Guizhen serioze toksita de mustarda gaso mortis la 21-an de la sama monato malgrau chiamaniera savado. La sekvantan tagon vicministro de eksteraj aferoj de Chinio Wang Yi tuj intervidighis kun la japana ambasadoro kaj faris seriozan interparolon kun li.

    Wang Yi diris, ke la kemiaj armiloj postlasitaj de Japanio en Chinio forrabis la vivon de multaj chinoj, kaj ech nun, 58 jarojn post la finigho de la japana agresa milito kontrau Chinio, tiu venenajho daure minacas la vivon kaj sekurecon de la china popolo. Tio vekis fortan indignon de la china popolo.

    Li emfazis, ke la sento kaj digno de la vivo de la china popolo devas esti protektataj kaj la china registaro neniel permesas reaperon de la tragedio, ke la kemiaj armiloj postlasitaj de Japanio daure forrabos la vivon de la china popolo. Chinio postulas, ke la japana registaro fidele plenumu la difinojn en la Pakto pri Malpermeso de Kemiaj Armiloj kaj koncernajn interkonsentojn faritajn de Chinio kaj Japanio kaj devoscie forigu tiujn venenajhojn. Pri la serioza damagho al la homoj kaj loko Chinio forte postulas, ke Japanio faru realajn pashojn por plenumi sian devon kaj faru necesan respondon al la damaghitoj kaj la china popolo.