Posttagmeze de la 8-a de majo, 2004, china prezidanto Hu Jintao akceptis delegacion de la Asocio de Parlamentana Ligo por Japana-China Amikeco, gvidatan de ghia prezidanto Komura Masahiko.

    Hu diris, ke en la pasintaj pli ol 30 jaroj post establigho de la diplomatiaj rilatoj inter Chinio kaj Japanio la rilatoj inter la du landoj rimarkinde disvolvighis kaj iliaj intershangho kaj kunlaboro sur pluraj kampoj rikoltis richajn fruktojn, kio portis efektivajn interesojn al la du popoloj, kaj ambau flankoj devas domaghi tion. La Asocio de Parlamentana Ligo por Japana-China Amikeco faris gravan kontribuon al tiu afero, kion Chinio alte taksas.

    Hu emfazis, ke en la nova situacio plue disvolvi tiujn amikecajn najbarajn rilatojn havas gravan signifon. La gvidantoj de la du landoj devas firme teni la gheneralan orientilon de la interrilatoj inter la du landoj, observi la principan spiriton difinitan de la tri politikaj dokumentoj de Chinio kaj Japanio* kaj lerni lecionojn de la historio, fronti al la estonteco kaj bone trakti la historiajn problemojn kaj la problemon pri Taiwan, fari pli da aferoj utilaj al la amikeco sed ne tion, kio shokas la sentojn de la du popoloj, kaj kune penadi por konstrui novtipajn rilatojn de amikeco, kunlaboro, reciprokaj utilo kaj profito de la du landoj.

    Komura Masahiko diris, ke la asocio estas la plej granda superpartia organizo en la politika rondo de Japanio. Ghi estas fervora por amikeco de la du landoj. Nun la ekonomia kunlaboro de la du landoj estas fruktodona kaj la komunaj interesoj en multaj sferoj pliighas, kio ludas pli kaj pli gravan rolon por la regiona kunlaboro. Li diris, ke observante la spiriton de la komuna deklaro kaj komuna deklaracio de Chinio kaj Japanio, la asocio firme tenos la starpunkton pri unu Chinio kaj ghuste traktos la historion.
_________________________

    * La tri politikaj dokumentoj de Chinio kaj Japanio estas "Komuna Deklaro de Chinio kaj Japanio", "China-Japana Paca kaj Amikeca Traktato" kaj "Komuna Deklaracio de Chinio kaj Japanio".