MAURICE SUJET (Francio):

    Mi daure legas kun granda intereso viajn artikolojn, kies variecon kaj aktualecon mi tre shatas. Ankorau chi-matene mi rekomentis vian retejon al du personoj, kiuj deziras viziti Chinion kaj interesighas pri china kulturo kaj historio.

    Viaj artikoloj pri la netipa pulmito (bona esprimo lau mi por la SARS malsano) estas aparte interesaj, char ili donas al ni utilajn informojn pri la evoluo de la infektigho en Chinio kaj pri la rimedoj urghe uzitaj por limigi kaj redukti la nombron de malsanuloj, survoje al venko kontrau tiu terure kontagha malsano. La internacia mobilizo kontrau tiu malsano estas bona ekzemplo de la necesa kunlaboro inter chiuj landoj minacataj por protekti la homaron kontrau tiom da minacantaj malsanoj au katastrofaj naturaj fenomenoj.

    Ni esperu kune, ke landoj eltiros lecionon de tiu batalo kontrau la kontagha malsano kaj konsciighos finfine, ke la plej urgha tasko en la mondo estas monda kunlaboro por protekti vivon kaj sanon de chiuj homoj, kaj ne celi al iu ajn chiam provizora hegemonio, kiu nur endangherigas la tutan mondon.

    Ni daure agu por ke Esperanto, "ponto inter kulturoj", kontribuu, kiel vi faras, al pli bona mondo. Ni daure batalu por ke dank' al ghi, "estu nova kaj pli justa lingva ordo" lau la vortoj de nia eks-prezidanto de UEA prof. Lee dum la 2-a Azia Kongreso de Esperanto okazinta en Shanhajo antau kelkaj jaroj.