CLAUDE PIRON (Svislando):

    Gratulon al via lando pro la brila sukceso en la spaco. Sukceso en la spaco anoncu sukceson de paco por la tuta mondo.

ETSUO MIYOSHI (Japanio):

Karaj samideanoj,

    Mi gratulas la sukceson de via lando pro lancho de Shenzhou-5.

FRANCISKO HOSE DAVILA DORTA (Hispanio):

Karaj geamikoj de EPCh kaj de la tuta Chinio,

    Tiu brila eniro de Chinio en la kosman esploradon estas unu el la plej gravaj novajhoj lastatempaj. La okcidenta mondo celebras la progreson kaj sukceson de Chinio, char ni estas certaj, ke via granda nacio ludos gravegan rolon en la homa estonteco. Fakte, jam Chinio estas plene respektata kaj oni rigardas ghin kiel fratan popolon, kiu antauenmarshos al la futuro kune kun la ceteraj mondaj nacioj. Eble tiam, Esperanto ludos ankau rolon por eviti, ke iuj imperiaj lingvoj povas doni avantaghojn al iuj nacioj kontrau iuj aliaj.

    Same la klereco de viaj sciencistoj kapablis fari tiun sukcesan raketon, ni esperas, ke viaj kleruloj kaj menskapabluloj povos apogi senhezite la ideon de iu ne-nacia internacia lingvo por chies uzado kiel helpa komunikilo.

ROBERTO SARTOR (Argentino):

    Mi volas gratuli vin pro la sukceso de la lancho de la spacshipo "Diina Shipo 5" kun la kuraghega astronauto Yang Liwei. Estu tia sukceso nova shanco por la paco kaj homa frateco inter la popoloj de nia planedo!

    Mi jam ricevis de UEA la Unuan Bultenon de la 89-a UK en Pekino. Nova shanco revi viziton al via fora lando...

DINKO MATKOVIC (Kroatio):

Estimata redakcio,

    Mi dankas al vi por la ghoja informo pri la sukcesa lancho de Shenzhou-5 kaj ghia surterigho sub la gvido de kosmonauto Yang Liwei. Nia TV el Zagrebo montris tion kaj ankau bravan kosmonauton. Sendube tio estas grava scienca kaj teknika atingo de la China Popola Respubliko, kiu vicigis la unuan chinon en la kosmon, kie trovighis liaj rusa kaj usona kolegoj. Kiam oni parolas pri tiu evento, oni devas substreki la fakton, ke Chinio estis malricha lando, kiu devis batali kontrau diversaj malamikoj antau la proklamo de ChPR en la jaro 1949.

    Dank' al via sociordo kaj la plej multnombra popolo en la mondo, mi ne dubas, ke via lando atingos novajn gravajn sukcesojn. Sed en tiuj klopodoj ne forgesu la vivnivelon de viaj civitanoj, char la plej dangheraj malamikoj por shtato estas malplenaj au nesufiche nutritaj stomakoj. Mi esperas, ke Chinio montros al la mondo post disfalo de Sovetunio kaj transiro de orienteuropaj landoj el socialismo al kapitalismo, ke socialismo estas pli justa kaj pli bona sociordo por la plimulto ol kapitalismo! Niaj civitanoj el Kroatio kaj ankau civitanoj el ekssocialismaj landoj povas atesti tion.

    Dum la venanta jaro okazos UEA-kongreso en Pekino kaj malgrau mia agho (78-jara) kaj ankau grava elspezo por la vojagho, mi klopodos partopreni la kongreson kaj propraokule vidi kiel vi vivas.

    Dezirante al vi novajn sukcesojn mi samideane kaj kore salutas vin.