Gramatiko facile asimilebla

    Prenu plu. Koffi Gbeglo. Eld. SAT-broshurservo/Laute!, Beauville, 1995. 113 paghoj. Prezo ne montrita.

    Shajnas, ke la plej populara libreto pri gramatiko por progresantoj, plene en Esperanto antaue estis La tuta Esperanto de Henrik Seppik. Kiu neniam legis la gajan Kiel Kolumbo malkovris Amerikon en tiu libro, tiu tuj kuru al la unua libroservo kaj eklegu ghin! Pro tio li ridegos kaj... revizios siajn konojn pri participoj! Au finfine komprenos ilian logikon...

    Nun ni havas ankau Prenu plu de Koffi Gbeglo. Ghi estas pli moderna (kompreneble) kaj pli facile legebla pro malpli da detaloj kaj temoj; plue, la humuro estas malsama. Ankau ghi estas verkita Esperante. Post ghia trastudo komencantoj povas aliri jam la faman kaj bonegan libron ABC-gramatiko de Esperanto.

    Prenu plu estas samtempe pli facila kaj pli malfacila por lerni gramatikon. Kvarmonataj komencantoj ja kapablas uzi ghin, kondiche, ke ili jam regas la 16 rugulojn de la Fundamento, bone prononcas kaj flue legas. Komence, ili legos en kurso por kontroli, ke ili jam kapablas kompreni la enhavon... kaj fine alkutimighos foliumi ghin.

    Tiu libreto estas vere agrabla. Jes, ja, ghi vere estas! Imagu - tra tri partoj, oni unue revizias la Esperantan gramatikon, due stampas en sia memoro gramatikajn rimedojn kaj trie plirichighas pro la aldonajhoj.

    Oni facile marshas tra dek du "lecionoj", proverbo trovighas komence kaj fine de chiu leciono. Sed chiun lecionon la autoro adapte kaj malsame prilaboris, zorgante pri la plej efika prezento. La reguloj estas nete klarigitaj, la vortoj kaj la frazoj estas facile legeblaj kaj kompreneblaj, la stilo estas lerta.

    Cetere, multe da ekzemploj permesas pli facile kompreni la tuton; malfacilan ekzemplon klarigas bazaj frazoj. La ekzercoj estas simplaj kaj efikaj. Mankas nur korektoj fine de la libreto; ja, bedaurinde, ofte oni laboras sola...

    Dum foliumado oni malkovras jen mnemonikan frazon, jen komparon, jen poemeton, jen anekdoton, jen sharadon, jen divenajhon, jen problemon, jen konsilon... Kaj eble pecetojn de Afriko...

    Novbakitoj alproprigas al si la materialon per klarigoj kaj ekzemploj, facile memoreblaj kaj ofte reuzeblaj! Kaj fine, ili forgesos la gramatikon por libere eniri en la legajhon kaj ghui la verdan etoson!

(El Monato)