54-jara s-ro Wen Ruhua sin shminkis antau spegulo. Post lia shminkado oni vidis, ke li jam farighis charma junulino.

Wen Ruhua en razado unu minuton antau la shminkado

    En la 6-a de aprilo de 2001, oni okazigis en la plej altklasa Teatro Chang'an de Pekino recitalon de Wen Ruhua, la lasta aktoro de rolo de virino en pekina opero. La recitalo faris sensacion, char unue, Wen Ruhua ne ludis operon dum longa tempo; due, malaperos la arto de aktora ludo de rolo de virino; kaj trie, pekina opero de Chinio estas reformata.

    Pekina opero aperis kaj iom post iom maturighis en la regperiodo Qianlong (1736-1796) de Qing-dinastio (1644-1911). Tiutempe oni ne permesis al virinoj ludi teatron, kaj aktoroj devis ludi rolon de virino. Tiam la reprezentantaj aktoroj de rolo de virino estis Chen Delin kaj Mei Qiaoling, kaj la scenaro kaj prezentado estis projektitaj ekskluzive por aktoroj. Sed viroj ne povis bone esprimi la tenerecon de virinoj. Post 100 jaroj, dank' al penado de Wang Yaoqing, la ludo de aktoroj de rolo de virino pli kaj pli rafinighis. De lia kulturado rezultis 4 famaj skoloj reprezentataj de Mei Lanfang, Shang Xiaoyun, Cheng Yanqiu kaj Xun Huisheng. De tiam la arto de vira ludo de rolo de virino eniris en oran tempon kaj aperis multaj elstaraj aktoroj. Poste virinoj povis ludi rolojn en bangzi-opero kaj nelonge post tio ankau en pekina opero ludis aktorinoj. Chirkau 1949 pli kaj pli multaj aktorinoj ludis en pekina opero kaj la teatraj lernejoj ne plu kulturis knabojn en aktorojn por rolo de virino. Nun en Pekino ludas nur Wen Ruhua kiel aktoro de rolo de virino.

La edzino kaj filo de Wen venas al la shminkejo por esprimi shaton al lia arto

    En la agho de 11 jaroj Wen Ruhua eniris en teatran lernejon kaj antau 20 jaroj farigis aktoro de la Pekina Teatro de Pekina Opero. La penetriva kantado kaj la nobeleca esprimmaniero rikoltis altan takson de bonaj komentariemaj shatantoj de pekina opero. Li estis bonvena ankau al la shatantoj de pekina opero de Tianjin, Shanhajo (ambau estas la plej grandaj urboj de Chinio) kaj Taiwan-provinco. La bela staturo, la distingigha ludo kaj la bona vocho faris lin unika aktoro en tiu flanko. Li ludis "rolon" en pluraj filmoj. En la filmo "Lasta kunesto de Xiang Yu kun la amatino" kun Zhang Guorong kiel la chefrolulo, Wen Ruhua kantis pekinan operon por Zhang.

Wen Ruhua anta la afisho kun lia rolo de edzino de imperiestro

    Zhou Ding, Prezidanto de la Dramista Asocio de Chinio, opiniis, ke kiam aktorino ludas rolon de virino, shi prezentas figuron de sia sama sekso, kaj shi ne bezonas intence cerbumi kiel esprimi virinon. Se aktoro ludas rolon de virino, li certe bezonas tre atente observi chiujn movojn, diveni la psikon kaj fari artan prilaboradon por akcente esprimi virinon. Tial ofte aktoro ludas rolon de virino pli bone ol aktorino.

    Sed en la lastaj 2 jaroj Wen Ruhua ne ludis la operon. Menciante la malfacilan situacion de aktoro ludanta rolon de virino, li falis en chagrenon. Li diris, ke katenite de ideologio k.a. kialoj, la homoj ne komprenas aktoron ludantan rolon de virino kaj erare opinias, ke tiaj aktoroj vivas virineske. Li diris, ke elstara aktoro tute povas distingi arton disde la reala vivo. Li diris, ke li estas tre bonvena eksterlande, sed enlande li ne trovis shancon por ludi. Li diris: "Nun mi ankorau povas ludi kaj volas ludi. Mi esperas, ke oni daurigos la arton de vira ludo de rolo de virino."