Chinio havas teritorion de 9.6 milionoj da kvadrataj kilometroj, el kiuj 5.4 milionoj kun multe da altebenajhoj kaj dezertoj trovighas malproksime de la maroj. Oni nomas tiun parton Okcidento de Chinio. En la pasintaj 200 jaroj, pro troa ekspluato, militado, klimata shanghigho, trafika malfacilo kaj ekonomia izoliteco, la okcidento farighis sinonimo de malricheco kaj postighinteco. Disvolvi la okcidenton kaj prosperigi ghian ekonomion estas deziro de chinaj politikistoj de multaj generacioj.

    En la 80-aj jaroj de la 20-a jarcento china gvidanto Deng Xiaoping prezentis "du ideojn". La unua ideo estas akceli pordmalfermon de la oriento, kaj la okcidento devas alte taksi tiun ideon. Lau la dua ideo, kiam la china ekonomio atingos certan gradon, la shtato devas doni pli da atento al la ekonomia disvolvigho de la okcidento kaj asigni pli da mono por ghi, kaj la oriento devas obei tiun ideon.

    En la pasintaj 20 jaroj la ekonomio rapide disvolvighis en la oriento kaj tieaj entreprenoj ekvolis investi aliajn lokojn por profiti per siaj prilaboraj ekipajhoj kaj trovi novan merkaton. La okcidento de Chinio estas vasta kun abundo da fueloj, laboruloj kaj merkata bezono, tamen la tieaj fundamentaj instalajhoj estas postighintaj, mankas kapablaj entreprenistoj, kapitalo kaj tekniko. Ghuste en tio kushas bona shanco por kuna disvolvigho de la okcidento kaj oriento.

    En 1999 Jiang Zemin, china prezidanto, faris alvokon pri rapida ekonomia disvolvo de la okcidento, kio markis komencon efektivigi la duan ideon. En la lastaj 3 jaroj rapide kreskis la investo kaj ekonomio en la okcidenta regiono kaj oni atingis grandan sukceson en la fundamenta konstruado, evidente firmigis la ekologi-median konstruadon kaj bone disvolvis la spiritan civilizacion kaj diversajn sociajn aferojn.

Helpi la okcidenton kaj disvolvi sin mem

     Por la ekonomia disvolvigho la shtato antau chio dedichis sian atenton kaj investon al ekologio kaj fundamenta konstruado de la okcidento. Chinio jam fundamente solvis la problemon pri manghajhoj de sia popolo, kaj sufichas greno. Nun estas bona shanco por lauplane cedi teron al arbaro kaj herbejo.

    Post la pli-ol-20-jara reformado kaj pordmalfermo la orienta chemara regiono de Chinio akumulis certan kapitalon, posedas altajn teknologiojn kaj havas nombron da talentaj personoj, dume la avantagho de pluraj industrioj jam transiris de la oriento al la okcidento. En la okcidento la ter-prezo estas kompare malalta, laborfortoj malmultekostaj. Nun la ekonomia disvolvo en la okcidento havas multe da pli favoraj kondichoj ol la oriento en la komenco de ghia disvolvigho. Chinio havas valoran sperton pri ekonomia disvolvigho en apartaj lokoj. En 2000 la shtato emisiis 70% de la obligacioj por ekonomia disvolvo de la okcidento kaj ankau 70% de la monsumo pruntita che aliaj landoj estas uzata en la okcidento.

    En la negoca traktado inter la oriento kaj okcidento aperis pluraj projektoj kun investo de dek milionoj kaj ech cent milionoj da juanoj.

    Guangdong estas grava ekonomia provinco en Chinio. Ghi plurfoje organizis mil-homan grupon por viziti la okcidenton. Oni diris, ke Guangdong faris grandan kontribuon por levigho de la pokapa konsumo de la okcidento. Respondeculo de la Guangdong-a registaro diris: "La okcidento havas grandan merkaton. Ghi estos pli profitodona ol eksterlando por nia investo."

    Guangdong asignis grandan sumon por investi la ekonomian disvolvighon en la okcidento. Krom la registara, ankau la financa helpo de lokaj entreprenoj estas granda. La kunlaboraj projektoj de Shenzhen kaj la okcidento jam superis dek miliardojn da juanoj. Shanhajo faris projektojn de kunlaboro kun Shaanxi kaj Ningxia kun totala investa sumo de dekoj da miliardoj da juanoj. Krome, lau plano Shanhajo investos 100 miliardojn da juanoj por la okcidento en 2001-2005.

    Zhejiang havas 7 mil entreprenojn en la okcidento. Ili asignis 20 miliardojn da juanoj por investi industriojn de naturaj richfontoj, kiuj konsistigas trionon de la totala investo de Zhejiang en la okcidento.

    La granda investo de Zhejiang montris la allogan forton de la okcidenta merkato al la orientaj investantoj, ankau kiuj ricevis grandan profiton. Tio montris la grandan latentan forton kaj rapidan disvolvighon en tiu kampo.

    Pekino bone kunlaboras kun Interna Mongolio en produktado de elektro, batalo kontrau sabloshtormo kaj livero de agrikulturaj kaj brutaj produktajhoj. Tio utilas ne nur al la ekonomia disvolvigho de Interna Mongolio, sed ankau al livero de fuelo, plibonigo de la ekologia medio kaj richigo de la merkato de Pekino. Multaj entreprenoj de Zhongguancun, novteknologia distrikto de la chefurbo, nun disvolvas sin ne nur en suda Chinio, sed ankau en la okcidento por malkovri novan spacon de disvolvigho.

Alilanda financa kontribuo al la ekonomia disvolvigho de la okcidento

    La negoca traktado inter la oriento kaj okcidento de Chinio okazis jam 6 fojojn. La temo en 2002 estas kunlaboro inter la oriento kaj okcidento post membrigho de Chinio al la Monda Komerca Organizo. La chi-jara traktado unuafoje ekhavis specialan lokon por alilandaj investantoj, kiun cheestis mil reprezentantoj el 145 alilandaj entreprenoj, kaj tio kreis rekordon. Evidente, post membrigho de Chinio al la Monda Komerca Organizo alilandaj entreprenoj donis pli grandan atenton al la okcidento de Chinio.

    Dank' al lancho de la strategia plano pri la ekonomia disvolvo de la okcidento, antau du jaroj iuj famaj translandaj kompanioj esprimis sian intereson por investi la okcidenton. Nun pli ol cent mondfamaj entreprenoj havis lokon en tiu regiono. Sole en la novteknologia ghardeno de Xi'an 400 alilandaj entreprenoj establis sian branchon. 20 el la 500 mondnivelaj potencaj entreprenoj investis tiun urbon.

    Komence oni interesighis nur pri tio, kiel la oriento devas helpi la okcidenton, por ke tiu liberigu sin el malricheco, kaj poste oni faris shtuparan transiron pri komercajhoj, teknologioj kaj ekipajhoj kaj post tio aperis la problemo pri komuna ghuo de la interesoj sub la merkata mekanismo, disvolvigho kaj reciproka helpo. En la pasintaj dekkelkaj jaroj la kunlaboro inter la oriento kaj okcidento disvolvighis pli kaj pli profunden kaj koncernis ne nur ilin mem. La internacia projekto sin montros en la estonta kunlaboro. Kaj en la okcidento energie laboros ne nur chinoj, sed ankau multe da eksterlandanoj.

Formi la ekonomian reton

    "Baldau sternighos reloj de la Qinghai-Tibeta Fervojo, komencighos konstruado de Longtan-hidroelektrejo kaj la Lanzhou-anoj ekuzos naturgason de Qaidam..."

    La gravaj projektoj de la ekonomia disvolvigho de la okcidento rearanghos la richfontojn sur la china teritorio, formos la ekonomian reton de la okcidento kaj oriento kaj malfermos novan terenon por daura ekonomia disvolvigho.

    La fuelaj richfontoj de Chinio sin trovas ne ekvilibre. En la vasta okcidento latentas abundo da naturgaso, nafto, akvo kaj elektro. Chiujare multe da akvo forfluas, dume la oriento, kie la ekonomio disvolvighas rapide, urghe bezonas diversajn naturajn richfontojn kaj fuelojn. La loghantoj de sudorienta Chinio ekfunkciigis termoelektrejojn, por kiuj ili pagis multe. Pro tio la produktokosto de la oriento levighas pli kaj pli, dum la loghantoj de la okcidento vivas malriche, kvankam ili havas abundon da fueloj.

    La gravaj projektoj en la okcidento celas shanghi ghuste tiun fenomenon.

    Konduki elektron de okcidente orienten. Oni sternis 3 elektrajn kablojn de Tianshengqiao-hidroelektrejo en la limregiono de Yunnan, Guizhou kaj Guangxi por konduki elektron al Guangdong. Julie de 2001 oni komencis konstrui Longtan-hidroelektrejon, kies totala generatora kapacito estas malpli granda nur ol tiu de la elektrejo de la Tri Gorghoj de Yangzi-rivero. Post ghia finkonstruigho duono de ghia elektro kondukighos al Guangdong. Post plenumo de tiu projekto 6 elektraj kabloj chiu kun 500 kilovoltoj kondukos elektron de la okcidento al Guangdong, Shanhajo, Jiangsu, Zhejiang, Pekino, Tianjin kaj Tangshan. Ili kune formos gravan elektran reton de Chinio.

    Konduki naturgason de okcidente orienten. La gastubo trapasas Xining kaj atingas Lanzhou. De la 1-a de junio de la pasinta jaro la loghantoj de Xining kaj Lanzhou jam komencis uzi naturgason de Qaidam. En 2002 oni eksternis la gastubon en du ekstremoj de la projekto, t.e. Shanhajo kaj Xinjiang. Lau plano en 2004 komplete pretighos la tuta linio kaj tiam la diversnaciaj popoloj povos uzi naturgason, dume Xinjiang multe profitos de tio.

    Konstruo de la Qinghai-Tibeta Fervojo shtopos la lastan blankon en la china historio pri konstruo de fervojoj.

    La konstruo de la Qinghai-Tibeta Fervojo komencighis junie de 2001. Ghis nun la shtato jam investis 1.1 miliardojn da juanoj. Post 7-8 monatoj la fervojo etendos sin je pliaj 150 km kaj pli proksimighos al Lhasa.

    Dank' al realigho de serio da gravaj ekonomiaj projektoj pli kaj pli perfektighos la ekonomia reto tra la tuta Chinio.