En la Simpozio de la Tria Internacia Financa Centro, fermita antau nelonge, "Shanhajo estos unu el la plej promesplenaj financaj centroj inter la membroj de APEK" farighis temo multe diskutata de la mondfamaj financaj fakuloj.

    Kiujn kondichojn posedas Shanhajo por esti unu el tiaj centroj? Fakuloj diris, ke jam en la 30-aj jaroj de la pasinta jarcento Shanhajo estis internacia financa centro de la Orienta Azio kaj la favora geografia situo de la malfermita urbo kaj ghia chioampleksa kulturo estas avantaghoj por ghi farighi financa centro de APEK. En la pasintaj 10 jaroj la urbo praktikis serion da reformaj politikoj pri ekonomio, komerco kaj financo por restauri sian internacian financan centron. Dank' al tio la urbo jam havas rudimenton de la financa centro inter la membroj de APEK. Nun la financaj establoj kaj financa sistemo estas evoluintaj plej bone en Chinio. En Shanhajo estas la plej granda komerca loko de Chinio. Ghi estas urbo kun multe da financaj establoj, kie la financa komercado estas granda kaj regula. Krom tio, ghi havas ankau superecon de fakuloj kaj tekniko pri financaj aferoj. Tie la intershanghejoj de alilandaj valutoj, bankoj de diskonto kaj borsoj kaj asekuraj kompanioj, merkatoj pri dom-hipoteko kaj vendo en la estonteco jam antau longe farighis bonaj lau la internaciaj normoj. Iuj ekonomiaj normoj de Shanhajo baldau atingos tiujn de aliaj internaciaj financaj centroj.