Yuxi estas urbo en la mezo de Yunnan-provinco. Kun areo de 15300 kvadrataj kilometroj ghi estas fama en Chinio ne nur pro siaj belaj pejzaghoj, sed ankau pro sia tabako. Preskau chiuj chinoj konas ghiajn cigaredojn kun marko Hongtashan, kiu chinlingve signifas monton kun rugha pagodo.

    En Yuxi loghas ne nur hanoj, sed ankau tajoj, hanioj, bajoj, mjauoj kaj jioj. La totala nombro de ghiaj loghantoj estas 2 milionoj. En la lastaj pli ol 20 jaroj ghia ekonomio disvolvighis rapide kaj en 1998 ghia pokapa jara enspezo superis 800 usonajn dolarojn.

    Yuxi estas konata kiel grena bazo de Yunnan, kun klimato modera kaj tero fekunda. La de ghi produktita tabako estas fama tra la lando. La Teknologia Disvolva Distrikto Yuxi estas unu el la du tiaj distriktoj en la provinco.

    En Yuxi estas multaj kashitaj fontoj. Oni diras: "Kiom altas la monto, tiom longas la rivero." Tie la lagoj kun klara kaj dolcha akvo brilas kiel perloj kaj la riveroj kiel arghentaj rubandoj. El amaso da lagoj la plej fama estas Fuxian, formita de terkrusta sinkado. Tiu kalabas-forma lago kovras areon de 212 kvadrataj kilometroj. Ghi entenas 18.5 miliardojn da kubmetroj da akvo, kaj ie ghia profundeco atingas 55 metrojn. Lau la profundeco ghi estas la dua granda dolchakva lago en Chinio.

    Ghia akvo estas bonkvalita. La akva temperaturo tre malmulte shanghighas dum la tuta jaro. Che la vilagho Dujia la akvo profundas nur 1-3 metrojn en la spaco 200 metrojn ghis la bordo kaj tie la sablo estas subtila kaj la lagofundo ebena. Pro tio la loko estas tauga por bano. En la lastaj jaroj la lokanoj donis multajn turismajn servojn.

    En Yuxi la pejzaghoj estas tre belaj. Tie estas dormanta vulkano, kiu aspektas kiel montego skrapanta la chielon. Sur la supro de la vulkano estas grandega shtona plato, de kie fluas akvo en la tuta jaro.

    En la okcidento de la lago estas vilagho, antau kiu estas klara lago kaj malantau kiu staras kvin montpintoj. Che la bordo de la lago prosperas banjanoj, kiuj spegulighas en la akvo. Norde de la vilagho staras monto en formo de subtenilo de plumo kun la Templo de Avalokitesvaro sur la supro. Sude de la monto estas karsta kaverno pli ol 30 metrojn profunda. Proksime de ghi estas groto, de kie konstante elighas varma aero. Nordoriente de ghi estas Rostro-monto, kiu similas al elefanto, kiu per sia rostro trinkas akvon el la lago.

    En la sudokcidento de la lago estas izolita insulo kun 11 belaj vidindajhoj, inkl. de 17 domoj, zigzaga ponto, teraso por rigardi fishojn kaj rendevuejo por geamantoj. Tiuj vidindajhoj aperis en Song-dinastio (960-1279) kaj famighis en Ming-dinastio (1368-1644). En 1988 la insulo estis difinita kiel provinc-nivela turisma loko kaj post 6 jaroj farighis la unua sennokta insulo de la provinco.

MOROJ DE FLORZONAJ TAJOJ

    En la gubernioj Xinping kaj Yuanjiang en la valo de Yuanjiang-rivero loghas 70 mil florzonaj tajoj, brancho de tajoj. Ili ricevis sian nomon pro tio, ke iliaj virinoj portas charman flordesegnan zonon.

    La florzonaj tajoj sin okupas pri terkulturado. Char iliaj loghdomoj trovighas sub ombrorichaj arboj, chirkauitaj de klaraj riveroj, kiuj fluas ankau en vilaghoj kaj oni povas en- kaj elshipighi che sia domo.

    En la longa tempo de produktado kaj vivado la florzonaj tajoj plene asimilis belecon de la naturo por richigi sian vivon. Iliaj naciaj kostumoj ne nur konservas antikvan modestecon, sed ankau elspiras luksecon. La virinaj vestoj estas bele broditaj, kun multaj arghentaj ornamajhoj. La tajaj virinoj kudras al si vestojn el hejme teksita shtofo, garnas ilin per arghentaj rondajhoj 3 kg. pezajn kaj brodas diversajn florajhojn per diverskoloraj fadenoj. La knabinoj en tiaj vestoj aspektas charme. Che malrapida irado tintado de la arghentaj ornamajhoj faras ilin pli belaj.

    La florzonaj tajoj shatas gluecan rizon, sekigitajn angilojn, peklitajn ovojn kaj acidajn fishojn kaj viandon. Manghi florojn estas unu el iliaj moroj. En flororicha sezono ili kolektas diversajn florojn por prepari festenon el pladoj de floroj.

    La 13-a la unua monato lau la china luna kalendaro estas tradicia festotago de la florzonaj tajoj, ankau tago de geamantoj.

    La florzonaj tajoj loghas sur montoj kaj che riveroj. Ili banas sin en rivero kaj fishas tie. La loghloko de tiu romantika kaj mistera nacio altiras al si multajn turistojn chiujare.

    Por ke turistoj bone konu tiun antikvan nacion, Xinping-gubernio konstruis ekologian vilaghon de nacia kulturo. Ambauflanke de la strato de la vilagho kreskas mangarboj, lichiarboj, arekoj, ananasarboj kaj aliaj tropikaj plantoj. Tie oni povas ghui belajn tropikajn pejzaghojn, kanton "Tosto", leondancon kaj morojn de florzonaj tajoj, rigardi kiel tajoj teksas, brodas kaj tinkturas shtofon, spekti ilian vestomontradon kaj frandi lokajn etmanghajhojn kaj naciajn pladojn.

HISTORIAJ OBJEKTOJ DE YUXI

    Yuxi estas loko kun longa historio. Tie la diversnaciaj popolanoj kune kreis la brilan kulturon de la antikva Yunnan, kion atestas historiaj objektoj elterigitaj en Lijiashan.

    Arkeologoj faris grandskalan prifosadon al la antikvaj tomboj en Lijiashan en 1972, 1991, 1992 kaj 1994 kaj elterigis entute pli ol 3000 historiajn objektojn, inter kiuj estas grandnombraj armiloj, muzikiloj, ritiloj, laboriloj kaj chiutagaj bezonajhoj. Ili estis faritaj el bronzo, oro, jado, arghento, fero, shtono, ligno, lako k.a. Post esploro oni konstatis, ke la tombo n-ro 21 estis fosita antau 2500 jaroj.

    El la tombo n-ro 24 oni elfosis bronzan bovan-tigran tablon, kiun oni rigardas kiel trezoron de la chinaj bronzajhoj kaj kremon de la mondaj historiaj objektoj. La chefa parto de la tablo havas formon de granda bovo kun du kornoj kaj tigro che la vosto de la bovo. Ghia surfaco estas glata kaj ebena. Che la elterigho la kornoj jam disighis de la bovkapo, sed lau la junto oni eksciis, ke komence ili estis mulditaj aparte kaj poste kune. La kapo kaj korpo de la bovo kaj la tigro che ghia vosto estis mulditaj samfoje, kaj la bovo kaj tigro estis malplenaj interne. Tio montras, ke antau la muldado oni faris modelon internan por la bestoj kaj la tigro estis pendanta che la bova vosto. Lau muldologio oni scias, ke estas granda malfacilo trakti la pendantan modelon, char oni nepre devas precize fiksi la modelon en difinita loko sen ajna movigho. Ankau bovido sub la ventro de la granda bovo estis aparte muldita kaj poste lutita al la granda bovo. Char oni lutis tre bone, kauzante neniun postsignon, tial rigardante la suprajhon, oni misopiniis, ke la bovido estis muldita unufoje kun la granda bovo. Tiaj objektoj, kiuj montras lukton de bovo kontrau tigro kaj la superregan pozicion de la bovo, estis ofte vidataj inter la historiaj objektoj elterigitaj en Yunnan-povinco. Tio montras, ke antikve la loghantoj de Yunnan alte taksis bovojn. Por bone prezenti la kultadon de la antikvaj popolanoj de Yunnan, artistoj faris tiun vivoveran objekton per arta kreado kaj kuragha troigo. Ghi montris ankau, ke jam antau 2500 jaroj la tieaj artistoj havis altan teknologion de muldado kaj lutado.