Wuhan,
chefurbo de Hubei-provinco, estas centro industria, financa, komerca,
scienca, kultura kaj eduka en la meza parto de Chinio. Ghi areas
8467 kvadratajn kilometrojn kun 8.3 milionoj da loghantoj. Tie krucighas
Yangzi-rivero kun sia plej longa brancho Hanjiang-rivero, kiuj dividis
la urbon en tri partojn, t.e. Hankou, Hanyang kaj Wuchang, kiuj
formis gravan nodon de fervojoj, akvovojoj, shoseoj kaj aerlinioj.
Kiel grava urbo liganta la mezan parton de Chinio kun la okcidenta,
ghi havas kompare bonajn naturajn kondichojn. Kompare kun la okcidenta
parto de Chinio, ghi havas bonajn geografiajn kondichojn kaj kompare
kun la orienta marbordo ghiaj produktokostoj estas malaltaj. Post
kiam Chinio membrighis al Monda Komerca Organizo kaj ekpraktikis
la planon pri granda ekonomia disvolvo de sia okcidenta parto, Wuhan
farighis pli grava pro sia latenta forto disvolvighi en grandan
internacian urbon. Tio ja koincidas kun la profeto de usona futuristo,
ke Wuhan estos unu el la 10 superaj urboj en la estonteco.
Kompreneble, por esti grava internacia urbo estas bezonataj ne nur
la supre menciitaj kondichoj, sed ankau aliaj kondichoj, kiaj naturaj
richfontoj kaj nivelo de sciencoj kaj edukado.
Koncerne la naturajn richfontojn, Wuhan havas 189 lagojn, kies totala
areo konsistigas kvaronon de tiu de la tuta urbo. Tie la pokapa
kvanto de surtera akvo okupas la unuan lokon en la mondo inter grandaj
urboj. Wuhan estas urbo, kiu plej frue ekuzis kranakvon, kun 4 mil
kilometroj da akvotuboj en la chefaj kvartaloj.
Koncerne
sciencojn kaj edukadon, en Wuhan estas la tria granda novteknologia
ghardeno de Chinio -- la Novteknologia Ghardeno Donghu. Tie naskighis
la unua china optika fibro, kies esplorado, disvolvo kaj produktado
dum longa tempo okupas avangardan lokon de Chinio. La ghardeno ghuas
la nomon Optika Valo de Chinio. Tie trovighas 18 altaj lernejoj,
56 institutoj, 700 teknologiaj establoj kaj 5 mil entreprenoj. Tie
laboras 45 membroj de la China Akademio de Sciencoj kaj China Akademio
de Inghenierio. Fenghuo, Huagong, Jinglun kaj Lixing estas landfamaj
altteknologiaj establoj en Chinio. Ili chiuj rapide disvolvighis
en nur kelkaj jaroj surbaze de la atingoj sciencaj kaj teknologiaj.
Ili donis vivipovon al disvolvigho de la industrioj informadika,
optik-elektrona, energi-elektrona kaj konsuma optik-elektrona. En
la pasintaj jaroj, energie disvolvante altteknologiajn industriojn,
tiu teknologia ghardeno dedichis grandan atenton al kreado de novaj
medioj, por ke la ekonomia, socia, natura kaj kultura medioj estu
pli harmoniaj. Nun la diversaj kompletigaj instalajhoj kaj grandareaj
verdajhoj montras la novan fizionomion de ghia bela perspektivo.
Li Xiansheng, urbestro de Wuhan, diris: "La grandaj urboj de
la mondo kaj precipe tiuj de la disvolvighantaj landoj ellaboris
strategian planon por konstrui sin en internacian urbon, kaj por
realigi tiun celon oni devas partopreni la internacian labordividon.
Sub la novaj historiaj kondichoj Wuhan certe plene utiligos kaj
kulturos siajn avantaghojn por levi sian konkurencpovon, donos pli
da investoj al disvolvigho de sciencoj, teknologioj kaj edukado,
aktive partoprenos la internacian labordividon kaj kunlaboron kaj
plene utiligos la chinan kaj internacian merkatojn por akceli sian
impetan disvolvighon."
|