Xinji de Hebei-provinco estas fama urbeto de ledajhoj en Chinio. Tie funkcias 8 000 entreprenoj pri tanado kaj pri farado kaj vendo de ledajhoj, kiuj produktas 1.5 milionojn da peltajhoj jare.

    Profitante de fel-prilaborado, Xinji sin richigis kaj ne plu estas simpla urbeto. Tie staras altaj domoj, ambauflanke de la stratoj vicighas grandaj kaj malgrandaj butikoj kaj budoj de diversaj ledajhoj, kiaj vestoj, gantoj, kofroj kaj shuoj.

    En la urbeto estas granda bazaro de ledajhoj, kiu ampleksas multajn fakojn de leda industrio, inkl. de scienc-teknikaj informejoj, bankoj, restoracioj, amuzejoj ktp. Tiujn lokojn frekventas klientoj. Vendistoj senchese krias kun rideto: "Rigardu la bonkvalitajn ledajhojn. Provu kaj achetu!"

    Se vi proksimighas al iu ajn budo, la mastro eble ne volas liberigi vin sen via acheto. Do, okazas ofte marchando inter la achetanto kaj vendanto. Achetantoj chiam postulas, ke la vendanto malaltigu la prezon kiel eble plej multe. Kiam la achetanto pretas foriri sen acheti, ofte audighas la vocho de vendanto: "Nu, prenu. Ho, mi malprofitas."

    Jam en la historio Xinji estis prilaborejo kaj komercejo de peltajhoj en norda Chinio. Tiam la instalajhoj por tani felon estis tre simplaj kaj multaj familioj faris nur shaffelajn surtutojn, matracojn k.a. La fel-prilaborejoj ofte malbonodoris, tial oni nomis la fel-prilaborantojn malbonodoraj tanistoj. Ili manghis ekskluzive vaporumitajn farunajhojn sorgajn au maizajn kaj mem faritajn peklajhojn. Nun la malnova kaj mallargha strato, kadukaj pordoj de la prilaborejoj ankorau rememorigas pri la malfacilaj jaroj de la felistoj.

    Dank' al la ekonomia disvolvigho komence de la 80-aj jaroj, la tiea leda industrio multe evoluis. Oni importis avangardajn mashinojn kaj teknikojn de tanado. Renovigo de ekipajhoj kaj apliko de avangarda tekniko variigis kaj delikatigis produktajhojn, kiuj vendighas ne nur en multaj lokoj de Chinio, sed ankau en aliaj landoj.

    Nun fel-prilaboron faras ne nur la tieaj loghantoj, sed ankau alilokanoj. Iuj privataj entreprenoj chiu kun la jara vendovaloro de 100 milionoj da juanoj dungis multe da laboristoj. Tiaj entreprenoj plejparte vendas en la malsupra etagho kaj produktas en la supra. La urbeta registaro bone faras administradon kaj servadon. Por kulturi fakajn laborantojn kaj levi kvaliton de la varoj, ghi fondis lernejon de fasonado kaj tajlorado, instituton de ledaj vestoj kaj sendis fabrikestrojn kaj led-teknikistojn viziti aliajn landojn kaj lerni alilande. Ankau al medi-protektado ghi dedichas grandan atenton. Kolektinte monon de fabrikoj, ghi konstruigis 3 poluci-imunajn kvartalojn de fel-prilaborado. La urbetanoj bone komprenas, ke por sin richigi per leda industrio, oni neniel devas polucii la medion.