La Somera Palaco situas en la nordokcidenta antauurbo de Pekino. Ghi estas la plej granda kaj plej bone konservata imperiestra ghardeno de Chinio.

    La palaco estas la lasta imperiestra ghardeno kaj kutima loghejo de Cixi, vidvino de imperiestro Xianfeng. Shi konstruis kortegan areon en la palaco por akcepti korteganojn kaj praktiki regadon. Por diferencigi la Someran Palacon de la Imperiestra Palaco en la urbo, oni donis al la konstruajhoj en la Somera Palaco tegmentojn el grizaj tegoloj anstatau tiuj el flave glazuritaj tegoloj en la Imperiestra Palaco en la urbo. Dank' al verdajhoj, rokajhoj, florbudoj k.a. la kortega areo harmonie unuigas la ghardenan parton de la palaco.

    La ghardeno de la Somera Palaco konsistas chefe el Wanshou-monto kaj Kunming-lago. Antau la monto, che la bordo de la lago, estas la Longa Koridoro, kaj sur la monto estas Foxiang-pavilono, kie Cixi kultis budhon. La pavilono, 58 metrojn super la tersurfaco, estas marko de la Somera Palaco. La oktagona pavilono havas 3 etaghojn kaj 4 alerojn.

    Antau la monto estas Kunming-lago, dividita de la Okcidenta Digo en du partojn. Sur la digo punktas 6 pontoj en diversaj formoj. Yudai-ponto el ili estas la plej fama. Yudai en la china lingvo signifas jadan zonon. Oni diris, ke imperiestro Qianlong kaj Cixi tre shatis ekskursi sur la Okcidenta Digo. Tie Cixi sin alivestis sin per fishistinaj vestoj kaj la chefeunuko Li Lianying per fishistaj vestoj kaj fotighis kune. Sudoriente en la lago estas insulo, kaj la 17-arka Ponto kunligas ghin kun la bordo. Sur la balustradoj de la ponto estas 544 shtonaj leonoj en diversaj pozoj.

    Chiujare milionoj da chinaj kaj alilandaj turistoj vizitas la Someran Palacon kaj ghi estas unu el la plej multe frekventataj turismaj vidindejoj. En 1998 ghi estis enskribita de Unesko en la Liston de Mondaj Heredajhoj.