Unua-pagho >> Kuirarto >> Manghajhoj

 

 

 

 


Legendo pri origino de mantoo

    mantoo estas la plej populara faruna manghajho de chinoj kaj havas du specojn: unu el ili havas farchon kaj la alia ne. La farchita mantoo estas nomata ankau baozi. Mantoo havas diversajn grandecojn kaj ankau la farchoj estas tre diversaj, faritaj el viando, legomo, azukio k.a. Mantoo estas farita el fermentinta pasto. Ghi estas facile farebla, facile portebla kaj spongece malmola, kaj havas diversajn gustojn.

     Mantoo originis antau 1700 jaroj, kaj ghia kreinto estis Zhuge Liang, tre fama politikisto, diplomato kaj strategiisto en la antikva Chinio. Li estas simbolo de sagho. Kun plena amo al la popolo li diligente laboris dum la tuta vivo. Lia kreo de mantoo estas bona atesto pri lia amo al la popolo.

    Autune de la 225-a jaro, Zhuge Liang revenis post venko en milito. Kiam la armeo venis al Lushui-rivero, levighis ventego kaj la armeo ne povis transiri la riveron. Li tre maltrankvilighis kaj konsultis lokanojn. Oni diris, ke li devas kulti la martirojn. Sed kio estis tauga por oferi? Oni diris, ke estas necese mortigi 49 homojn por oferi iliajn kapojn al la martiroj. Zhuge Liang opiniis tion tro kruela kaj dronis en longa pensado por trovi decan solvon.

    Fine li decidis anstatauigi homajn kapojn per io alia. Li ordonis buchi bovojn kaj shafojn, fari la viandojn farcho kaj volvi ghin en paston, kaj fari la farchitajn pastajn bulojn en formo de homa kapo. Poste oni vaporumis tiujn farchitajn pastajhojn en vaporumilo. Zhuge Liang venis al la riverbordo, riverencis kaj jhetis la farunajhojn en la riveron. Che tio tuj serenighis la chielo kaj kvietighis la rivero, kaj la armeo sekure transiris la riveron. Post tio mantoo ne nur servas kiel oferajho, sed ankau farighis populara manghajho en Chinio.