Kolazionajhoj estas grava konsistiga parto de gastronomio de Chinio. Diferencaj de la fama "manchura-hana festeno" el centoj da pladoj kaj la 8 grandaj kulinaraj sistemoj, ankau kolazionajhoj kun lokaj gustoj de diversaj partoj de Chinio figure prezentas la vivintereson kaj grandan imagipovon de la chinoj.

Tradiciaj kolazionajhoj de Pekino

     En iu antikva libro oni tiel skribis: "Fakte loghantoj en Pekino estas devenintaj de diversaj lokoj kaj ne havas kampon por kulturi, tial ili devas sin vivteni per transportado kaj malgranda komerco." Pro la originalaj situacio kaj konsisto de la popolo, la gastronomio kaj antau chio kolazionajho de Pekino estis tre prosperaj.

    En Pekino oni nombras pli ol 200 specojn da kolazionajhoj. Ili asimilis la gustojn de kulinara arto de aliaj lokoj kaj formis sian propran guston. Krome iliaj prezoj estas decaj, tial kaj nobeloj kaj ordinaraj pekinanoj povis facile ghui ilin.

    En Qing-dinastio (1644-1911) kolazionajhoj aperis en la imperiestra kortego, kaj iom post iom formighis la stilo de kortegaj kolazionajhoj. Laudire imperiestroj havis nur du regulajn manghojn en tago, sed ili povis ghui kolazionajhojn en ajna horo, kaj ofte en nombro de 20-50 specoj.

    Sed kolazionajhoj radikighis chefe inter la popolo. Oni kolportis au starigis standojn en foiro kaj stratoj por vendi ilin. Antau dekoj da jaroj melodiaj ofertaj krioj de kolportistoj shvebis tra la tuta tago en la stratoj. Kaj antau dekoj da jaroj Tianqiao, loko 1 kilometron sude de Tian'anmen-pordego, estis multe vizitata pro la abundego da kolazionajhoj de Pekino. La standojn prizorgis patro kaj filo, au edzo kaj edzino, au patrino kaj filo, au onklo kaj nevo. Krome la standoj ofte najbaris unu al alia pro respektivaj interesoj. Ekzemple stando de sojfaba suko najbaris al tiu de flano, char oni kutimis manghi flanon kun la suko, kaj stando de bovajho al tiu de vino. Multaj el la standoj estis vaste konataj pro siaj vendajhoj kun propra gusto, ekzemple stando de rostitaj porkointernajhoj de Shi Run, stando de fermentigita sojfaba suko de Shu Yongli, stando de mochio de Li Wanyuan k.s.

    Fakte la chefa konsistiga parto de la templa foiro estis standoj de diversaj kolazionajhoj. Templa foiro okazis en regulaj datoj, ekzemple en Longfu-templo la foiro okazis en la 9-, 10-, 19-, 20-, 29- kaj 30-a tago de chiu monato. En la Templo de Tera Dio la foiro okazis en la 3-, 13- kaj 23-a tago de chiu monato, en la Templo de Blanka Pagodo la foiro okazis en la 5-, 6-, 15-, 16-, 25- kaj 26-a tago de chiu monato. Ankau en aliaj temploj okazis regulaj foiroj.

Kolazionajhoj de Pekino hodiau

     Antau chirkau 50 jaroj, preskau tute malaperis la tre diversaj kolazionajhoj, kaj la malmulte da postvivintaj specoj jam ne havis la originan guston. Nun oni revivigis parton de la butikoj kaj standoj de tradiciaj specoj de kolazionajhoj. En iuj tre gravaj turismaj lokoj oni povas trovi restoraciojn kaj butikojn de tradiciaj kolazionajhoj. Ekzemple en la Somera Palaco kaj Beihai-parko. Krome oni refunkciigis standojn de tradiciaj kolazionajhoj ankau en iuj malnovaj teatrejoj, tetrinkejoj k.s.

    Multaj luksaj hoteloj penas prezenti malnovajn kutimojn de pekinanoj por altiri gastojn. Ekzemple Qianmen-hotelo enhavas malgrandan teatrejon por prezenti pekinan operon, en Kaili-hotelo oni prezentas dancojn de Tang-dinastio (antau 1000 jaroj), en la hotelo Tianlun-Dinastio oni prezentas akrobatajhojn kaj en la Granda Teatro Chang'an oni vendas kolazionajhojn de shanhaja gusto. Tie la gastoj povas ghui prezentadon kaj kolazionajhojn samtempe.

    Same kiel antau kelke da jarcentoj, alilokaj kolazionajhoj ekhavis lokon en Pekino. Nun en Pekino oni povas ghui kolazionajhojn de chiuj provincoj de Chinio.

    Krome fremdlandaj krakmanghajhoj eniris en Pekinon, ekzemple sandvicho de Mac-Donald, fritita kokajho de Kentucky, Pizza-flano k.a.

    Antaue kolazionajhoj ne povis esti luncho, sed nun pekinanoj pli kaj pli shatas ilin, el kiuj multaj farighis krakmanghajhoj. En multaj magazenoj estas grandaj ejoj por vendi diversajn kolazionajhojn.