Alilanda gazeto faris enketon "Kies plado plej plachas al vi?" kaj 90% de la enketitoj respondis, ke al ili plej plachas chinaj pladoj. Efektive, la chinaj pladoj estas multe shatataj en la mondo, dum la luksa manchur-hana festeno el originalaj pladoj estas nomata la unua festeno en Chinio. Ghi elspiras palacajn trajtojn kaj diverslokajn morojn.

Origino de la festeno

    Naskigho de la luksa manchur-hana festeno havas fortan politikan fonon. En la 17-a jarcento manchuroj entrudighis suden de la Granda Muro, starigis Qing-dinastion (1644-1911) kaj ekregis la tutan Chinion. Kun potencigho kaj prosperigho de la dinastio imperiestro Kangxi (1662-1722 sur trono) praktikis la politikan sistemon pri unuigho de la manchuroj kaj hanoj. Konservante la tradiciajn manchurajn trajtojn en kuirarto, li pledis por asimili kremon de alinaciaj kuirartoj. Lau nunaj materialoj la luksa manchur-hana festeno plej frue aperis en la regperiodo de imperiestro Qianlong (1736-1795 sur trono) de Qing-dinastio.

    Historiaj dokumentoj notis, ke frue en Qing-dinastio, kiam altranguloj kaj aristokratoj faris festenon, inter la cheestantoj estis kaj manchuroj kaj hanoj. Por kontentigi la bezonon de diversaj homoj en manghado, la festeno havas kaj manchurajn tablojn kaj la hanajn, inter ili la manchuraj havas ses klasojn kaj la hanaj tri klasojn. La kvantoj de la materialoj de la manchuraj kaj hanaj pladoj estis klare difinitaj. Pro tio la manchuraj kaj hanaj kuiristoj konkuris en preparado de la pladoj kaj lernis unuj de la aliaj por fari la pladojn belaspektaj, belkoloraj kaj bongustaj. Ekz. en la festeno estas kompleta porko kaj kompleta shafo, kiuj estas la manchuraj pladoj, sed ilia preparado estis lau hana kuirmaniero. Kun harmoniigho de la manchuraj kaj hanaj pladoj iom post iom formighis 6 festenoj manchuraj kaj hanaj en la palaco, kiuj estas altnormaj kaj rafinitaj kun luksaj manghiloj kaj abundo da pladoj. Surbaze de tio formighis en Chinio la Sichuan-aj, Guangdong-aj, Shanxi-aj kaj Hubei-aj manchur-hanaj festenoj.

    En la provincoj la supre dirita festeno ofte okazas tiaokaze: Post oficistiga ekzameno lokaj gubernatoroj donis tian festenon por regali la ekzamenantajn korteganojn au revizorojn. La gastigantoj kaj gastoj intershanghis opiniojn che la tablo kun abundo da fajnaj pladoj. Che la tablo chiuj cheestantoj estis vestitaj per kortega kostumo. Por la festeno chio devis esti farita lau oficiala difino: la skalo, klasoj, rangoj de la akompanantoj, materialoj de la pladoj, speco de vinoj k.a. La pladoj estis faritaj el diversaj materialoj fajnaj, luksaj kaj kuriozaj kaj la kuirarto estis delikata. La festeno elspiris kaj trajtojn de manchuroj, kiaj rosto, bako kaj brogo, kaj tiujn de hanoj, kiaj frito kaj kuiro. Kiam la festeno okazis en kortego, antau komenco de la festeno oni devis ludi muzikon, fari salutan kanonadon kaj riverenci antau la altaj gastoj. Post altabligho de la gastoj, servistinoj devis prezenti kukojn dolchajn kaj salajn, etmanghajhojn sekajn kaj likvajn. Post tio oni prezentis teon kaj nur post chio chi tio oni primetis la tablon per oficialaj pladoj. Sur la tablo estis malvarmaj kaj varmaj pladoj, rizo, dolchajho, kukoj kaj fruktoj, almenau 108 pladoj, kiujn oni prenis en 3 tagoj.

Nunaj festenoj

    En la pasinteco la luksaj manchur-hanaj festenoj estis ghuitaj ekskluzive de richaj altranguloj. Tiam iuj famaj restoracioj en Pekino, kiaj Fangshan kaj Yushan, estis kapablaj doni tian festenon, tamen ili plejparte estis destinitaj por akcepti honorajn alilandajn gastojn, sed hodiau ankau aliaj restoracioj kapablas fari tion kaj iuj ordinaraj civitanoj estas pagipovaj por tia festeno. Kvankam la pladoj de la festeno estis multe reduktitaj en la kvanto, tamen ili farighis pli rafinitaj en preparado. En la okcidenta domo de la Internacia Komerca Centro de Pekino estas restoracio, kie mendas la festenon ne nur direktoroj de eksterlandaj kompanioj kaj grandaj turismaj grupoj, sed ankau iuj pekinaj loghantoj por soleni la datrevenon de sia geedzigho kaj naskigho de siaj maljunaj gepatroj. La gastigantoj ghenerale estas richaj civitanoj. Char tiaj restoracioj, kiuj kapablas prepari la festenon, devas havi ankau antikvecan medion, tial kvankam ili estas multe pagigaj, tamen oni opinias, ke la pago estas inda. Ghenerale chiutage la restoracio preparas nur 3-5 fojojn por tia festeno.