En la gubernio Xunxian apud la Flava Rivero etendighas vasta tero, kies argilo estas glata kaj viskoza. Oni faras el tia argilo diversajn ludilojn.

    En la gubernio la plej ofte vidata argila ludilo estas fajfebla argila hirundo. La malgranda estas 3-centimetra por ludo, dum la granda -- 20-centimetra por aprecado. Chu infanoj, chu plenkrerskuloj, chiuj shatas ghin. Char tia ludilo estas fajfebla, tial oni nomas ghin "Nigugu" (argila fajfanto).

    Fakte la origino de argila ludilo havis rektan rilaton kun batalo okazinta en la loko. En arda batalo multaj militistoj mortis. Por kulti la mortintajn kamaradojn, soldatoj, kiuj lertis en farado de argilaj figuroj, faris el argilo homojn kaj chevalojn. Tio estis afero antau 1800 jaroj. La arto cirkulis kaj la argilaj figuroj inkluzivis homojn kaj bestojn en diversaj mitoj.

    En iu vilagho, kie oni faras la plej bonajn argilajn ludilojn, du trionoj de la familioj sin okupas pri farado de argilaj ludiloj. En autuno chie oni povas vidi farantojn de "Nigugu". Ili fosas, miksas, knedas, modlas, bakas, farbas...

    Oni faras argilajn ludilojn ne por sin distri, sed por vendi en templaj foiroj. En la pasinteco, en templaj foiroj vicighis multe da standoj vendantaj argilajn ludilojn kaj serpentumis longaj vicoj de achetantoj.

    Unue oni farbis la modlajhojn per nigra au bruna koloro, poste kolorigis ilin blanke, rughe, flave, blue kaj verde. La fajfo de la ludiloj pli vigligis la foirojn.

    Por la vilaghanoj farado de "Nigugu" shajnis facila. Preni argilon che la rando de la vilagho, vershi en la argilon akvon, knedi kaj bastonadi la argilon, por ke ghi farighu fajna kaj mola. Plejparto de la farantoj faris per modeliloj. Uzante modelilojn oni faris tre rapide, sed la produktajhoj estis monotonaj. Oni ankau modlis ankau per manoj. Tiu metodo estis malrapida, sed karakteriza. Unu el la specoj de "Nigugu" havis risorton kaj skuighantaj partoj de la ludiloj vekis grandan intereson. Fininte modladon, oni truis la farajhojn por sonigi ilin. Post bakado oni kolorigis kaj briligis ilin.

    Pli kaj pli malmultighas farantoj de "Nigugu", char profito estas tre malgranda kaj krome la infanoj havas pli kaj pli multajn aliajn ludilojn. Sed 79-jara avo Wang Lantian ne flankenmetis la metion. 7-8-jara, li jam eklernis la metion che sia patro. Li, tre sagha, povas fari diversajn figurojn. Li estas la plej elstara inter la metiistoj en la gubernio. Liaj verkoj estis eksponataj en multaj urbegoj kaj li estis titolita "Popola Artisto de Henan-provinco". Li senchese faras "Nigugu" por muzeoj kaj fremdlandaj vizitantoj. Li opinias, ke neniam elmodighos "Nigugu".