Chi tie estas la kadukulejo de Shiyuetian de la Changjiang-a Li-nacia Autonoma Gubernio de Hainan-provinco. La korto de la kadukulejo ne estas granda, sed tre pura. Maljunuloj interbabilas sidante sub fruktarboj.

La kadukulejo fondita en 1986 estas la ununura kadukulejo de la gubernio. Tie vivas soluloj de Li-nacio. Por flegi la kadukulojn, la registaro de la subgubernio Shiyuetian dungis unu post alia prizorgantojn por tiuj maljunuloj. Sed chiuj dungitoj foriris post kelktaga laboro. Gvidanto de la subgubernia registaro foje demandis la junan infanflegistinon Bao Aifang, chu shi volas labori en la kadukulejo, kaj la knabino konsentis senhezite: "Chu oni ne devas flegi tiujn seninfanajn maljunulojn? Mi provu."

Tiam shi estis 16-jara. Shi poste pasigis 16 jarojn inter la maljunuloj lau la jena tagordo:

Shi ellitighis tre frue. Shi balais la korton, preparis matenmanghon kaj lavis vestojn por la maljunuloj. Post tio shi iris al bazaro por acheti brulajhon, rizon, legomojn, oleon, salon k.s. Vespere shi dekoktis drogherbojn por ili kaj helpis ilin enlitighi.

Tagoj ripetighas tiamaniere kaj shi enloghighis en la kadukulejon por pli bone flegi ilin. En la Printempa Festo (novjara festo lau la china luna kalendaro, la plej grava festo por chinoj), kiam la aliaj ghoje kunestis kun la familianoj hejme, Aifang restis en la kadukulejo por pasigi la novjaran feston kune kun la maljunuloj por konsoli ilian solecan koron.

Nun en la kadukulejo vivas 10 maljunuloj, kaj 2 el ili estas blindaj kaj 2 paralizighintaj. Aifang flegis ilin kiel filino, sen ajna plendo. He Yazhuang en agho de pli ol 80 jaroj chiam kushis en la lito, kaj Aifang ofte lavis lian korpon kaj litajhojn por teni la liton pura kaj seka.

Shiyuetian estas malricha loko loghata de naciminoritatoj, kaj la registaro ne povas asigni sufichan monon al la kadukulejo. Do Aifang de tempo al tempo donacis parton de sia malgranda salajro por kovri la minimuman elspezon de la kadukulejo. Shi plantis florojn kaj herbojn por beligi la kadukulejon kaj kulturis fruktarbojn kaj legomojn por shpari monon.

Aifang senrezerve servis al la maljunuloj kaj iuj demandis shin nekomprene: "Aifang, ili ne estas viaj familianoj nek parencoj, do kial vi servas al ili tiel senrezerve?" Fakte Aifang iam shancelighis. Sed kiam shi pensis pri tiuj kompatindaj maljunuloj, shi vere ne povis foriri de ili. Kaj shi respondis: "La kadukulejo estas mia hejmo, kaj la maljunuloj estas miaj familianoj. Servi al ili estas mia devo."

En julio de 1996 Aifang estis atakata de hipertiroidismo. Sed por flegi la maljunulojn, shi plurfoje prokrastis operacion. Tio gravigis shian malsanon kaj la aliaj maltrankvilighis pro tio. Ili petis la registaron urghi shin al operacio. Kaj nur tiam Aifang obeis al la registaro. Sed kiam shi estis forironta al hospitalo, shi venigis sian fratinon laborantan en alia loko por flegi tiujn maljunulojn. Krome shi ankau petis sian patrinon helpi al flegado. En la hospitalo shi ofte demandis pri la maljunuloj kaj post 7 tagoj shi revenis al la kadukulejo antau plena kalusigho de la trancho.

Aifang tutkore servis al la maljunuloj kaj tiuj lastaj prenis shin propra filino. Tri maljunuloj forpasis dum shia servado en la kadukulejo. Mortante, la maljunuloj venigis Aifang, premis shian manon kaj vokis shian nomon ghis la lasta spiro.

La faro de Aifang rikoltis laudon de la registaro kaj respekton de la socio. En 1998 shi estis elektita reprezentanto de la Dua Popola Kongreso de Hainan-provicno kaj en 2000 labormodelo de la provinco. Lastatempe shi estis elektita reprezentanto al la 16-a Tutlanda Kongreso de la Komunista Partio de Chinio.

Ni tre shatus vian sugeston, klaku kaj donu vian vochon!