Vespere de la 22-a de julio okazis en salono Zamenhof Koncerto de JoMo. Li komencis muziki en 1977, kaj esperantistiĝis en 1988. Tute nature li decidis kanti kaj verki en la lingvo internacia. Li surpiedigis sian propran tiaman grupon, la Rozmariaj Beboj, kiu ekfamiĝis komence de la 90-aj jaroj en la franca alternativa rok-medio. Post sukcesa kariero la "Beboj" disiĝis kaj JoMo kreis novan grupon, Liberecanoj, kun kiu li surbendigis septitolan liberecanecan albumon ĉe Vinilkosmo kaj kreis unuan rekordon de multlingva koncerto (22 kantoj en 22 lingvoj), kiu aperis en 2000 en la libro Guinness. Poste kaj sole, li surbendigis en la novaj studioj de Vinilkosmo tutan Esperantan albumon titolitan JoMo friponas, kiu aperis fine de 2001. Sekva disko, JoMo slavumas, aperis printempe de 2006 kun multaj muzikistoj slavstilaj, kun kiuj JoMo kunludas.

En la koncerto li prezentis ankaǔ ĉinan kanton "Mia bona patrino" en la ĉina lingvo. La koncerto, dum kiu li ludis sola kun gitaro, konstante ĝojigis kaj dancigis la spektantojn.

(Raportis Yu Tao kaj Niu Xueqin)