La sutropresejo Dege havas historion de 270 jaroj. Lamao de la presejo konigis, ke la presejo, kiu konservas 70% de la shablonoj de klasikaj sutroj en la tibeta lingvo, estas enlistigita kiel grava historia restajho de Chinio.

    La aspekto de la presejo tute similas al tiu de lamaisma templo. Ghi povas esti kalkulata kiel la plej granda biblioteko en Tibeto, sed kompreneble ne moderna biblioteko. Fakte ghi estas konservejo de 250 mil shablonoj de libroj kaj pentrajhoj. Ili estas valoregaj kaj parto el ili estas ununura en la mondo.

    La presejo havas tri etaghojn. En la klostroj chirkau la korto junaj lamaoj estas presantaj sutrojn. Ili laboras poduope. Unu shmiras shablonon per inko, kaj la alia sternas paperon per la maldekstra mano kaj pushas rulilon per la dekstra kaj levas la paperon post preso.

    En la klostroj estas multe da shnuroj, sur kiuj pendas jhus presitaj paperoj ankorau malsekaj. Ili flirtas en venteto au aero agitita de preterpasanto.

    Oni uzas apartan paperon por presi sutrojn. Chu en koloro, chu en fleksebleco, tia papero estas malsama al la aliaj. Kaj oni nomas ghin "tibeta papero". Ghi estas farita el radikoj de ia herbo. Tia papero povas rezisti kontrau vermo kaj rato.

    Pli profunde en la presejo estas multe da lignaj bretaroj plenaj de shablonoj. La bretaroj kaj shablonoj estas jujubrughe kolorigitaj, same kiel la chirkaumuro de la presejo. En la konservejo ne estas lampo, kaj la bretaroj kaj shablonoj estas konservataj en mallumo. Oni kredas, ke tio estas utila por konservado de la shablonoj.