D1 Imperiestra Palaco kaj Tian'anmen-placo

Tagoj: sabato, dimancho kaj lundo posttagmeze (13h30-17h00), mardo matene (08h30-12h00)

Prezo: 19 EUR

La Imperiestra Palaco, en la centro de Pekino, estas nomata ankau Malpermesita Urbo. Kun areo de 720 mil kvadrataj metroj kaj preskau dek mil chambroj, ghi konstruighis en 1406 dum Ming-dinastio, ghi loghigis 24 imperiestrojn de la dinastioj Ming kaj Qing. Ghi estas la plej granda kaj plej bone konservata antikva konstruajharo de Chinio.

Antau ghia suda pordo trovighas Tian'anmen-placo, kiu havas entute 440 mil kvadratajn metrojn kaj estas la plej granda placo en la mondo.

D2 Hutong-oj kaj Princdomo de Gongwang

Tagoj: mardo posttagmeze (13h30-17h00), dimancho kaj jhaudo matene (08h30-12h00)

Prezo: 20 EUR

Ekskurso al la hutong-oj de Pekino (malnovaj mallarghaj stratoj) impresos vin. Vi havos ideojn pri tio kiel vivis ordinaraj chinoj en la malnova Pekino, kaj ankau vidos kia estas la tradicia vivo de la pekinanoj nuntempe. Vi iros unue al la Tambura Turo pere de pedal-triciklo por havi superrigardon de la loko, kaj poste piedeniros la hutong-ojn. Post la promenado vi vizitos la princdomon de Gongwang, kiu situas che la norda bordo de Shicha-lago kaj estas la plej granda kvadrata korto de Chinio. Ghi enhavas pli ol 20 vidindajn lokojn en oficdomo, korto kaj ghardeno.

D3 Chiela Altaro kaj Tian'anmen-pordego

Tagoj: dimancho kaj jhaudo posttagmeze (13h30-17h00), mardo matene (08h30-12h00)

Prezo: 18 EUR

Tian'anmen-pordego estas simbolo de la China Popola Respubliko. Konstruita en 1417 dum Ming-dinastio, ghi estas la loko kie la kortego proklamis siatempe dekreton pri surtronigho de imperiestroj kaj nomumo de imperiestraj edzinoj. Ghi estis konstruita kun la celo esti la chefa eniro al la Malpermesita Urbo. En 1949 prezidanto Mao Zedong deklaris tie la fondighon de la China Popola Respubliko. De sur la turo oni havas bonan vidon al la tuta placo kaj chirkauaj imponaj konstruajhoj.

La Chiela Altaro estas la plej granda kulta konstruajharo en la antikva Chinio. Ghi konstruighis en 1420 dum Ming-dinastio kaj funkciis kiel preghejo de la imperiestroj de Ming- kaj Qing-dinastioj por peti richan rikolton.

La chefaj vidindajhoj estas Ronda Altaro, Pregha Halo kaj Ehha Muro. En 1998 Unesko deklaris ghin kultura heredajho de la homaro.

D4 Somera Palaco kaj Bestoghardeno

Tagoj: dimancho, jhaudo kaj vendredo matene (08h30-12h00), mardo posttagmeze (13h30-17h00)

Prezo: 21 EUR

La Somera Palaco trovighas je 15 km for de la urbocentro de Pekino. Konstruita en 1750, ghi origine estis provizora imperiestra palaco kun ghardenaro. En 1888 la Imperiestra Patrino Cixi donis al ghi la nunan nomon.

La palaco konsistas el Wanshou-monto, Kunming-lago, Foxiang-pavilono kaj aliaj eroj. La ghardenistika dispozicio montras la grandajn sukcesojn de la chinaj ghardenoj kaj okupas altan lokon en la ghardenistika historio de la mondo. Rava loko kaj malfacile forgesebla, ghi estis deklarita kultura heredajho de la homaro de Unesko en 1998.

La Pekina bestoghardeno estis imperiestra farmejo de Ming-dinastio. En 1955 fondighis tie la Pekina Zoo kun plankareo de 50 mil kvadrataj metroj.

En la ghardeno vivas rinoceroj, leonoj, tigroj, elefantoj, pandoj, nordorientaj tigroj kaj orharaj simioj, entute pli ol 500 specoj de bestoj.

D5 Yonghe-lamaejo kaj Konfucea Templo

Tagoj: mardo kaj jhaudo posttagmeze (13h30-17h00)

Prezo: 17 EUR

Yonghe-lamaejo estas la plej granda lamaa templo en Pekino, kie imperiestroj de Qing-dinastio kultis siatempe la prapatrojn. Ghi kombinas la hanan, manchuan, mongolan kaj tibetan arkitekturajn stilojn. Ghiaj chefaj vidindajhoj estas la Ekranmuro, Chielregha Halo, Darmo-rada Halo kaj Wanfu-pavilono.

La Konfucea Templo estis destinita por kulti Konfuceon en la dinastioj Yuan, Ming kaj Qing. Ghi konstruighis en 1302. Nun ghi estas la chefurba muzeo, kie vi vidos grandnombrajn valorajn historiajn restajhojn kaj dokumentojn de Pekino inter aliaj 80 mil historiaj objektoj.

D6 Xiangshan-parko kaj Templo de Kushanta Budho

Tagoj: dimancho kaj vendredo matene (08h30-12h00)

Prezo: 16 EUR

Xiangshan-parko, ch. 30 km for de la urbocentro de Pekino, trovighas en la Okcidenta Montaro de Pekino. La loko estas unu el la plej preferataj de pekinaj familioj kiel ripozejo. En la parko trovighas 28 vidindajhoj, inter temploj, pavilonoj kaj pagodoj konstruitaj dum diversaj dinastioj.

La Templo de Kushanta Budho konstruighis antau pli ol mil jaroj kaj estis riparita en 1734. En la halo kushas kupra budha statuo, kvin metrojn longa, kun la dekstra mano subtenanta la kapon kaj la maldekstra brako etendita.

Malantaue staras 12 argilaj budhaj statuoj. La tuto montras la chefan Budhon, Shakjamunio, testamentantan al siaj dischiploj che la nirvano.

D7 Lugou-ponto

Tagoj: lundo kaj vendredo posttagmeze (13h30-17h00), mardo matene (08h30-12h00)

Prezo: 15 EUR

Lugou-ponto, konata ankau kiel Marko-Polo-ponto, kushas super Yongding-rivero, 15 km sudokcidente de Pekino. Konstruita en 1189, ghi estas 266,5 m longa kaj 7,5 m largha, kaj havas sur siaj balustroj 485 shtonajn leonojn divers-pozajn. Marko Polo skribis en siaj vojagh-notoj ke ghi estas "la plej bona ponto en la mondo". Nepre vizitinda loko!

D8 Kultura strato Liulichang

Tago: vendredo matene (08h30-12h00)

Prezo: 11 EUR

Malnova kaj nova, autentika kaj neautentika, morala kaj malmorala, chio estas trovebla en la strato Liulichang. Situante en la sudokcidenta parto de Pekino kaj longante je 750 metroj, ghi estas unu el la du stratoj kiuj ankorau havas la aspekton de bazara strato dum la epoko de Qing-dinastio (la alia estas la strato Suzhou che la Somera Palaco, kie ne okazas tiom da vera komercado). En la okdekaj jaroj, la strato estis renovigita kaj diversaj specialajhaj butikoj rekonstruitaj. Kun hele farbitaj pordoj kaj domo-randoj, kaj kun gracie kurbaj tegmentoj el nigraj tegoloj, iom de la malnova vivstilo de Pekino ghi restas tie chi konservita. Tie staras multe da butikoj de antikvajhoj, chin-stilaj pentrajhoj, kaligrafajhoj kaj kopiajhoj faritaj che antikvaj steleoj.

La famaj Rongbaozhai-butiko, China Librovendejo kaj Vendejo de Historiaj Artajhoj estas tie. Bela strato, ghi estas vizitinda ne nur de art-amantoj.