Kongresejo. La Pekina Internacia Konferenca Centro situas en la Vilagho de Azia Sportkunveno (Yayuncun), je 9 km norde de la urbocentro. Adreso: Beijing, Chaoyang-distrikto, Beichendonglu 8, CN-100101, Chinio. Por korespondado, bv. uzi la adreson de UEA.

Klimato. Musona kun klare distingitaj kvar sezonoj. Julie kaj auguste la temperaturo povas atingi ch. 30 celsiusajn gradojn. Tiam pluvo estas ofta; pro tio bv. porti ombrelon au pluvmantelon.

Elektro. 220-volta, 50-herca. Kontaktiloj dupolusaj kaj tripolusaj, rondaj kaj plataj.

Akvo. En Chinio la kranakvo ne estas tuj trinkebla. La chinoj kutime trinkas boligitan akvon.

Mono. Renminbi (RMB). La baza unuo estas juano (yuan), kiu egalas 10 ghiaojn (jiao) au 100 fenojn (fen). Ekzistas biletoj je 1, 2, 5, 10, 20, 50 kaj 100 juanoj kaj 1, 2 kaj 5 ghiaoj, kaj moneroj je 1, 2, 5 fenoj, 1 kaj 5 ghiaoj kaj 1 juano.

Tempo. Ok horojn antau la Universala Tempo (GMT).

Monshangho. Internacie konverteblajn valutojn eblas shanghi en la Banko de Chinio, la internacia flughaveno de Pekino, la kongresejo, kaj iuj grandaj hoteloj. La intershangha kurzo estas egala. Ne shanghu monon en neoficialaj monshanghejoj, nek kun privatuloj. Je la 12-a de januaro 2004 unu euro valoris 10,54 juanojn.

Telefono. Chinio +86, Pekino +10. En chiuj hoteloj kaj la kongresejo la kongresanoj povas telefoni alilanden. Surstrate staras telefonbudoj. Por uzi tiujn budojn achetu en poshtoficejo "IP"-kartojn kontrau 30, 50, 100 au 200 juanoj.

Prezoj. Por plejparto de la okcidentanoj la chinaj prezoj estas relative malaltaj, sed en komercaj centroj kaj turismaj vendejoj iom altaj.

Sekureco. En Pekino kaj aliaj grandaj urboj necesas singardemo pri mono kaj havajhoj.

Lingvoj. La oficiala lingvo en Chinio estas la hana, kaj la plej ofte uzata fremda lingvo estas la angla.

Medikamentoj. Se vi uzas preskribitajn medikamentojn, bv. kunporti kuracistan recepton en la latina.

Sanservoj. Medicinaj servoj de pluraj landoj havas kontraktojn kun Chinio, surbaze de kiuj eksterlandanoj povas uzi la samajn servojn kiel enlandaj loghantoj. Bv. mem kontroli, chu via lando havas tian kontrakton kaj sub kiuj kondichoj. Eksterlandanoj havu konfirmilon pri san-asekuro. LKK kaj UEA ne respondecas pri asekuro de la kongresanoj.

Trafiko. Autobusoj, metroo kaj taksioj estas, krom bicikloj, la chefaj trafikiloj en Pekino. La chefurba flughaveno trovighas je 30 km for de la urbocentro de Pekino kaj je 25 km for de la kongresejo. Por veturi de ghi al la kongresejo eblas preni taksion, au flughavenan buson kiu ekveturas je 20-minutaj intervaloj. La flughavenaj busoj iras tra Sanyuanqiao, Dabeiyao, Wangfujing, Xidan kaj aliaj trafikaj nodoj. Du tagojn antau la Kongreso LKK havos akceptejon en la flughaveno, kaj la kongresanoj povos veturi per difinitaj busoj al hoteloj ofertataj de UEA pagante po 10 eurojn (vd. mendilon).

En Pekino funkcias 400 autobusaj linioj, 14 trolebusaj linioj kaj du subteraj fervojoj. La busoj funkcias chiutage de 5h00 ghis 23h00.

Proksime de la kongresejo estas pluraj linioj al la difinitaj hoteloj kaj al la urbocentro.