Changbai-monto, unu el la ok famaj montoj de Chinio, rajdanta sur la landlimo inter Chinio kaj la Popol-Demokratia Respubliko de Koreio. Ghi allogas per imponeco, mistereco kaj primitiveco. En la chirkaua regiono estas la Chiela Lago, sur la landlimo inter Chinio kaj la Popol-Demokratia Respubliko de Koreio. Ghi estas la plej alta vulkana lago de Chinio, kun akvosurfaco kovranta 9,82 kvadratajn kilometrojn. La perimetro de la lago longas je 13,1 kilometroj. Ghi estas la plej profunda lago de Chinio, kun profundeco de 373 metroj. La akvofalo, kiu falas de pli ol 60 metroj, estas formita el la akvo de la Chiela Lago, kiu elfluas pli ol 1000 metrojn antau ol ighi la belega akvofalo, kies lautan bruon oni povas audi de tre malproksime. La 13 fontoj de la samloka termofontaro, kiuj trovighas en areo de pli ol 1000 kvadrataj metroj, havas temperaturon de pli ol 60 celsiusaj gradoj. La flukvanto, temperaturo kaj kvalito de ilia akvo restas senshanghaj tra la tuta jaro.

Chengdu, chefurbo de Sichuan-provinco, nomata en antikveco "Urbo de Brokatoj". Tie la gastoj vizitos antikvan akvoreguligan konstruajhon Dujiangyan, ekkonstruitan antau 2500 jaroj kaj utiligatan ankorau nun por irigacii 600 mil hektarojn da kampoj.

Chongqing, nova kaj la plej granda municipo de Chinio, monturbo situanta che la kunfluejo de Yangzi-rivero kaj ghia brancho Jialing; grava industria bazo en la sudokcidento de Chinio. Tie oni vizitos Eling-parkon en la urbo kaj telferon super Jialing-rivero.

Dali, fama kultura urbo kun longa historio, kie vivas chefe baj-nacianoj. Tie la gastoj vizitos Erhai-lagon en faulta stratumo de altebenajho; urbeton Xizhou, kun multaj antikvaj loghdomoj de baj-nacianoj el diversaj dinastioj; miljaran pagodan trion en Chongsheng-templo; kaj antikvan urbon Dali, kies stratoj estis dispoziciitaj lau shaktabulo.

Dunhuang, 2000-jara urbo, mondfama arta sanktejo en la china provinco Gansu. Tie la gastoj vizitos Sonantan Sablomonton, Lunarkan Fonton, kaj Mogao-kavernaron, unu el la kvar famaj chinaj budhismaj kavernaroj de skulpturo, 25 kilometrojn sudoriente de Dunhuang, konsistantan el 492 kavernoj faritaj en la tempo de la Norda Wei-dinastio ghis la Yuan-dinastio (386-1368).

Guilin, ege fama pro belaj montoj, rivero kaj interesa karsta kaverno. Tie la gastoj shipveturos sur la rivero Lijiang por ghui la pejzaghojn de ambau bordoj, kaj vizitos Ludi-kavernon (kiu profundas 240 metrojn, longas 500 metrojn kaj havas multajn interesajn stalagmitojn kaj stalaktitojn), Monton Elefanta Rostro kaj Diecai-monton.

Hangzhou, fama turisma urbo de Chinio, honorata kiel "Paradizo en la Homa Mondo". Tie la gastoj vizitos la Okcidentan Lagon, kiu kun pli ol 40 vidindajhoj kaj pli ol 30 antikvaj restajhoj montrighas kiel akvarelo; Lingying-templon, unu el la 10 famaj budhismaj temploj de Chinio; Tigro-fonton; kaj Liuhe-pagodon.

Kunming, honorata kiel "Printempa Urbo" kaj "Flora Urbo", kun agrabla klimato, chiamverda flauro kaj floroj tra la tuta jaro. Tie la gastoj vizitos la Drakan Pordegon sur la Okcidenta Monto, 15 kilometrojn sudokcidente de Kunming, sur kies belvidejo oni povas vidi la tutan urbon; la bronzan taoisman konstruajhon Ora Kiosko; kaj karstan Shtonan Arbaron kun areo de 30 mil hektaroj.

Lhasa, chefurbo de Tibeto, kun historio de 1300 jaroj, en absoluta alto de 3600 metroj, konata kiel "Suna Urbo". En julio la averagha temperaturo estas 14,9 celsiusaj gradoj, kaj la loko estas bona somerumejo.

Tie la gastoj vizitos Potala-palacon, la plej grandan konstruajharon de Tibet-nacio; la parkon Norbu Lingka, rezidejon de Dalai-lamao de multaj generacioj; Zhaibung-templon, la plej grandan budhisman monahhejon en Tibeto, konstruitan en Ming-dinastio (antau chirkau 400 jaroj); Sera-templon, konstruitan en Ming-dinastio; Jokhang-templon, miljaran templon enkorpigintan Han- kaj Tibet-naciajn arkitekturojn; kaj Bajiao-straton, movoplenan komercan lokon proksiman al Jokhang-templo.

Lijiang, antikva urbo sub negha monto, loghata de Nashi-nacio. Tie oni vizitos neghkovritan Yulong-monton en absoluta alteco de 5595 metroj, kie oni vidas modernan oceanan glaciriveron che la suda fino de la norda latitudo; lamaan Yufeng-templon, en kies korto kreskas kamelio de pli ol 500 jaroj; Freskon de Bajsha de antau pli ol 400 jaroj, en pikturaj stiloj de Han-, Tibet- kaj Nashi-nacioj; antikvan urbon Lijiang, riverrichan urbon sur altebenajho, aperintan antau pli ol 1000 jaroj, kie oni povas aprezi ghiajn antikvajn brikajn domojn; kaj muzikoludon de Nashi-nacia orkestro.

Longjing, la plej frua kaj plej dense loghata loko de kore-nacianoj en Chinio.

Shenyang, chefurbo de Liaoning-provinco, estas unu el la pezindustriaj urboj de Chinio. Tie trovighas la alia Imperiestra Palaco de Chinio (krom tiu en Pekino).

Ghia konstruado komencighis en 1625 kaj finighis en 1636. Ghi estis konstruita kaj uzata de imperiestroj Nurhach kaj Huangtaiji de Qing-dinastio. Kun 20 kortoj kaj 300 chambroj, ghi havas areon de 60 mil kvadrataj metroj. La Norda Mauzolearo (tombejo de imperiestro Huangtaiji kaj lia edzino), konstruita en 1651, havas areon de 4,5 milionoj da kvadrataj metroj. Kaj la domo de Marshalo Zhang Zuolin, loghejo de tiu militaristo antau 70 jaroj, kovras 16 mil kvadratajn metrojn. Ghia dika chirkaumuro el grizaj brikoj altas je pli ol tri metroj; ghi konsistas el orienta kaj okcidenta kortoj.

Suzhou, unu el la plej gravaj turismaj urboj de Chinio. En la urbo estas multaj riveroj kun abundo da shtonaj pontoj. Oni nomas la urbon "Hejmloko de Silko". Aparte famaj estas ghiaj privataj ghardenoj antikvecaj kaj delikatstilaj, el kiuj la gastoj vizitos Zhuozheng-ghardenon.

Shanhajo, la plej granda industria kaj komerca bazo kaj havenurbo de Chinio kaj ankau paradizo de butikumado. La gastoj vizitos Yuyuan-ghardenon, privatan ghardenon de mandareno konstruitan antau chirkau 500 jaroj; Templon de Jada Budho, unu el la plej famaj monahhejoj de Chinio, kie estas statuo de kushanta Shakjamunio kaj sidanta budho el jado; kaj Bordopromenejon che Huangpu-rivero.

Tri Gorghoj de Yangzi-rivero, 192-kilometra parto de Yangzi-rivero de la turisma loko Baidicheng de Fengjie-gubernio, Sichuan-provinco, ghis Nanjin-pasejo che Yichang, Hubei-provinco. La tri gorghoj estas Qutang, Wuxia kaj Xiling, kies unikaj belaj pejzaghoj ege ravas la vizitantojn.

Tumen, urbo che la malsupra parto de Tumen-rivero, la plej granda landlima urbo de Jilin-provinco. Tie oni povas ghui pitoreskan pejzaghon de Tumen-rivero, kiu fluas en Chinion el la Popol-Demokratia Respubliko de Koreio.

Turpan, 2000-jara urbo sur la Silka Vojo, en la Xinjiang-a Ujgura Autonoma Regiono de Chinio, la plej varma urbo de Chinio. Tie la gastoj vizitos la ruinon de urbo de la antikva regno Gaochang, kiu estis konstruita en la unua jarcento a.K. kaj malaperinta en la oka jarcento p.K.; Milbudhan Kavernon de Pazkrik, budhisman sanktejon de la antikva regno Gaochang; antikvan tombejon de Astana; la ruinon de malaperinta urbo Jiaohe, chefurbo de antikva regno Cheshiqian; subteran puton aperintan antau pli ol 2000 jaroj por liveri akvon al la chiutaga vivo kaj irigacio; Fajran Monton, 100 kilometrojn longan kaj 9 kilometrojn larghan, surhavantan neniun herbon; kaj Vinberan Valon en la okcidenta kanjono de la Fajra Monto, produktejon de bongustaj senkernaj blankaj vinberoj.

Urumqi, chefurbo de la Xinjiang-a Ujgura Autonoma Regiono, kie vivas multaj nacimalplimultoj. Tie oni vizitos Nanshan- pashtejon kaj Chielan Lagon, kiu kun neghaj montoj, prosperaj abioj kaj pinoj kaj herbotapishoj estas honorata kiel "Perlo sur Tianshan-montaro".

Xi'an, startpunkto de la Silka Vojo kaj chefurbo de 12 dinastioj de Chinio. Tie la gastoj vizitos la Terakotajn Militistojn kaj Chevalojn che la mauzoleo de la Unua Imperiestro de Qin-dinastio (221-206 a.K.), kiu estas konata kiel unu el la mondaj mirakloj; antikvan urbomuron konstruitan antau chirkau 400 jaroj, unikan grandan kaj bone konservatan urbomuron en Chinio; Dayan-pagodon 64-metran en sep etaghoj, konstruitan en la sepa jarcento; ruinon de Banpo-vilagho de tipa matriarka komunumo de la primitiva socio en la baseno de la Flava Rivero antau 6000 jaroj; kaj la Provincan Historian Muzeon.

Xishuangbanna, en la Taj-nacia Autonoma Subprovinco en la sudo de Yunnan-provinco, najbara al Birmo kaj Laoso. Tie estas rezervejo de primitiva tropika arbaro. La gastoj vizitos la Olivan Ebenajhon, plej malaltan ebenajhon en Xishuangbanna, kovritan de tropika flauro; Ok-angulan Kioskon de Jingzhen, centran templon de suda sekto de budhismo ekkonstruitan en 1701; Drakan Pagodon de Manfei konstruitan en 1204; kaj Arbaran Parkon.

Yanji, chefurbo kaj politika, ekonomia kaj kultura centro de la Yanbian-a Kore-nacia Autonoma Subprovinco de Jilin. La urbo havas 380 mil enloghantojn, 59% el kiuj estas kore-naciaj.

Zhouzhuang, urbeto 38 kilometrojn sudoriente de Suzhou, havas historion de pli ol 900 jaroj. En la urbeto estas interkrucighantaj riveretoj en formo de "#". Ambauflanke de la riveroj estas vicoj da domoj de urbanoj. Sur la riveroj kushas 14 pontoj konstruitaj en la dinastioj Yuan, Ming kaj Qing (1206-1911). Oni nomas la lokon "Unua Akvolando de Chinio".