Peng Fengling en la ceremonio de malfermo de la Vilaĝo de Handikapulaj Olimpikoj

En la Pekinaj Handikapulaj Olimpikoj la ĉina teamo venkis la britan en la matĉo de virina rulseĝa korbopilko per 57 kontraŭ 38 kaj okupis la 7-an lokon.

Peng Fengling estas avanulo kaj ĉefa ludanto de la ĉina virina rulseĝa korbopilka teamo. Dekkelkajn tagojn antaŭ la Pekinaj Handikapulaj Olimpikoj ŝi vundis sin en trejnado kaj pro tio ŝi restis kiel anstataŭa ludanto dum longa tempo en la ludado. Ŝi diris: "Kiel ĉagrene por mi vundiĝi antaŭ la Handikapulaj Olimpikoj!"

Ŝi naskiĝis en antaŭurbo de Pekino. En 2004, kiam ŝi lernis en supera mezlernejo, ŝi perdis sian maldekstran gambon pro malsano. Tio sendube estis peza bato al tiu 15-jara knabino. Ŝi diris: "Mi tiam tre malĝojis. Kiam miaj kunlernantoj iris al eksterdoma trejnado, mi sole restis en klasĉambro kaj multajn aferojn mi ne povis mem fari." Peng Fengling estis tre silentema en tiu tempo. Poste trejnisto de la Pekina Federacio de Handikapuloj venis al ŝia lernejo por elekti sportistojn kaj ŝi estis elektita por partopreni provan trejnadon. Peng Fengling diris: "Tiam mi ne ŝatis sporton, kaj mi estis tre maldika, sed la staturo alta." Pro la insisto de la trejnisto Peng Fengling iris al Pekino por prova trejnado. Fine ŝi estis elektita kiel membro de la ĉina virina sidanta flugpilka teamo. Post unu jaro oni fondis ĉinan virinan rulseĝan korbopilkan teamon kaj ŝi fariĝis ĝia membro.

Peng Fengling kaj sportisto de la vira rulseĝa korbopilka teamo en la Vilaĝo de Handikapulaj Olimpikoj

Nun Peng Fengling estas tre optimisma kaj ĉiam havas rideton sur la vizaĝo. Ŝi diris, ke sporto alportis al ŝi ĝojon. "Sporto plivastigis mian vidkampon. Mi trovis, ke efektive mi estas sama kiel sanuloj kaj povas fari multajn aferojn per mia penado. La estonteco estas malfacile antaŭvidebla kaj mi nur devas optimisme alfronti ĉian malfeliĉon." Ŝi diris ankaŭ, ke en la lastaj jaroj ŝi konatiĝis kun multaj amikoj, tio estas rikolto alportita de sporto.

En la jaro 2007 kiel unu el la reprezentantoj de handikapuloj, Peng Fengling partoprenis aktivadon sperti senbarajn instalaĵojn en Pekino. Ŝi diris: "La konstruado de senbaraj instalaĵoj en Pekino multe progresis en la lastaj jaroj, tio faciligis veturadon kaj vivon de handikapuloj. Krome la socio donis pli kaj pli grandan prizorgon al handikapuloj, tion ni spertis en nia ĉiutaga vivo. "