Posttagmeze de la 2-a de aŭgusto, la 31-jara kanadano Scott mallaŭte kantis la kanton "Pekino Bonvenigas Vin" en la paŭzo inter la lecionoj de trejnado por eksterlandaj volontuloj de la Pekinaj Olimpikoj.

Tiutage, Scott kaj liaj kunlernantoj ellernis kelkajn frazojn ofte uzatajn en la ĉina lingvo kaj gestojn por bonveno. Kvankam Scott nur parolas malmultajn ĉinajn vortojn, tamen li opinias, ke tio ne malhelpas la volontulan interŝanĝon.

Kiel "servanto por spektantoj en publikaj lokoj" de la Pekinaj Olimpikoj, Scott oficiale "eklaboros" post kelkaj tagoj.

"Lerninte la tutan tagon, mi sentas min neniom laca," tion diris altastatura Scott kun rideto. Antaŭ unu jaro, la geedzoj de Scott venis al Pekino de Toronto, Kanado, por instrui en iu internacia lernejo. En la pasinta jaro, ili propraokule vidis la preparadon de Pekino kaj Ĉinio por la Olimpikoj. "Pekino boniĝas pli kaj pli, kaj dum la gastigado de la Olimpikoj certe prezentiĝos al la mondo brila Ĉinio," diris Scott, "kvankam mi vivis nur unu jaron en Pekino, tamen mi tre amas ĝin. Mi amas Ĉinion."

En Kanado, la sport-amantaj geedzoj de Scott ofte laboris kiel volontuloj por publikaj interesoj en ferioj. Pro amo al la Olimpikoj kaj Pekino, ili antaŭlonge cerbumis pri partopreno de la Pekinaj Olimpikoj. Antaŭ kelkaj monatoj, ili informiĝis, ke la Organiza Komitato de la Pekinaj Olimpikoj varbas volontulojn, do ili sin anoncis per interreto kaj glate pasigis la vid-al-vidan ekzamenon. Post tri semajnoj, ili ricevis konfirmilon de volontulo. "Tiam, mi kaj mia edzino forte ekscitiĝis, ĉar realiĝis nia deziro kontribui al la Olimpikoj en la someraj ferioj."

Iu ĉina amiko de Scott nomas lin Chao Ren (Superhomo). "Mi tre ŝatas tiun nomon," diris Scott kun rideto.