Tre zigzagan vojon iris ĉinoj por realigi sian sonĝon pri Olimpikoj. Sinjoro He Zhenliang estas spertinto kaj atestanto de serioj da gravaj eventoj en la historioj de ĉina sporta diplomatio kaj internaciaj olimpikoj de la 50-aj jaroj de la 20-a jarcento. Li iam laboris kiel la unua vicprezidanto de la Internacia Olimpika Komitato kaj vicprezidanto de la Ŝtata Sporta Komisiono de Ĉinio, kaj estas nomita "Olimpika sinjoro de Ĉinio". Jen lia rememoro pri iuj neforgeseblaj aferoj koncerne la Olimpikojn.

La nacia flago de la nova Ĉinio unuafoje hisiĝis en sportkunveno de Olimpikoj

Rigardante la unuan foton, He Zhenliang diris: " Ĝi estas pri flaghisa ceremonio farita tagmeze de la tago, kiam ni atingis Helsinkon." Kvankam forpasis pli ol 50 jaroj, tamen li ankoraŭ klare memoras ĉiujn personojn en la foto.

De la 19-a de julio ĝis la 3-a de aŭgusto, 1952, okazis la 15-aj Olimpikoj en Helsinko, ĉefurbo de Finnlando. La Ĉina Popola Respubliko unuafoje sendis sportan delegacion al la Olimpikoj. Tiam He Zhenliang estis 22-jara kaj laboris kiel tradukisto de la delegacio. Li neniam pensis, ke tiu vojaĝo markis komencon de lia sporta kariero.

Kvankam Ĉinio gajnis neniun medalon en la Helsinkaj Olimpikoj, tamen tiu afero mem portis gravan signifon: venis la nova Ĉinio al la Olimpikoj!

"De nun ĈPR suriris la mondan sportan scenejon"

Post la Helsinkaj Olimpikoj, en majo de 1954, la Internacia Olimpika Komitato (IOK) aprobis la rezolucion, ke IOK agnoskas, ke la Tutlanda Sporta Federacio de Ĉinio estas reprezentanto de la Ĉina Olimpika Komitato, kaj Taiwan anoncis eksiĝon el IOK. Sed, la tiama prezidanto de IOK Arery Brundage, sen diskuto de la plena kunveno de IOK, enŝovis la "Ĉinan Respublikon" ( Taiwan) en la liston de ŝtataj olimpikaj komitatoj agnoskitaj de IOK.

Poste por kontraŭi politikan komploton pri "du Ĉinioj", la registaro de la Ĉina Popola Respubliko faris pli-ol-20-jaran batalon.

En la 25-a de oktobro, 1979, okazis kunveno de IOK en japana urbo Nagojo, kie estis aprobita rezolucio per 62 voĉoj por, 10 kontraŭ, 1 sindeteno kaj 1 nevalida por sankcii la leĝan pozicion de la Ĉina Olimpika Komitato (la ĉeftera Olimpika Komitato de Ĉinio) en IOK, samtempe permesi al Taiwan partopreni la Olimpikojn en la nomo de "Taibei de Ĉinio" kaj "uzi kanton, flagon kaj emblemon malsamajn ol la uzitajn kaj aprobotajn de IOK."

Tiu rezolucio havas gravan signifon en la historio de la Olimpikoj de Ĉinio. En la ceremonio por festi tiun eventon en la sama jaro, Deng Yingchao, unu el la tiamaj ŝtataj gvidantoj de Ĉinio, diris: "De nun la Ĉina Popola Respubliko suriris la mondan sportan scenejon." La vortoj de Deng Yingchao forte emociis He Zhengliang.

Xu Haifeng gajnis la unuan oran medalon por Ĉinio

En 1984, Ĉinio partoprenis la Los-Anĝelesajn Olimpikojn en Usono. En la inaŭguro, kiam la ĉina delegacio eniris la stadionon, la spektantoj stariĝis kaj hurais.

"Krom la gastiganta usona delegacio nur la ĉina ricevis tian varman aklamon." Tiam He Zhenliang sidis sur la podio kiel membro de IOK nov-elektita en 1981.

En la unua tago de la konkurso ĉina pafsportisto Xu Haifeng gajnis la unuan oran medalon por Ĉinio, kaj ĝi estas ankaŭ la unua medalo en ĉina olimpika historio.

Juan Antonio Samaranch, tiama prezidanto de IOK, persone donis premion al li. "La oficperiodo de Samaranch kiel prezidanto de IOK komenciĝis je fermo de la Moskvaj Olimpikoj. Li ĝojis, ke kiel prezidanto de IOK, li donis la unuan medalon en sia oficperiodo al ĉino. Tiu ora medalo estas la unua ne nur por Ĉinio, sed ankaŭ por la Los-Anĝelesaj Olimpikoj," diris He Zhenliang.

En la Los-Anĝelesaj Olimpikoj la ĉina delegacio gajnis entute 15 orajn medalojn, 8 arĝentajn kaj 9 kuprajn kaj okupis la 4-an lokon laŭ la nombro de gajnitaj oraj medaloj. "Tiam mia humoro estis tute malsama ol tiu en la Helsinkaj Olimpikoj," fiere diris He Zhenliang.

Malsukceso en Monte Carlo

Montrante tiun ĉi foton, He Zhengliang diris: " Ĝi forte malĝojigis min. Tiam mi estis ĉe la loko en Monte Carlo. En la foto vidiĝis miaj gvidantoj kaj kelkaj aktoroj, kiuj senescepte estas malĝojaj." Rememorante tion, He Zhenliang ankoraŭ kuntiris siajn brovojn.

En la 23-a de septembro, 1993, Berlino, Sidnejo, Manĉestro, Pekino kaj Istanbulo faris laŭvice raporton al la plena kunveno de IOK. Post voĉdono, oni donis la koverton enhavantan voĉdonan rezulton al Samaranch. "Sinjoro Samaranch antaŭ ĉio esprimis sian dankon al la kvin urboj. Laŭ la angla alfabeto Beijing (Pekino) estis la unua. Aŭdinte nomon de Pekino, ĉiuj ĉinoj ekkriis de ĝojo kaj emocio. Sed kiam Samaranch fine anoncis, ke la gastiganta urbo de la Olimpikoj en 2000 estos Sidnejo, ĉiuj ĉinoj stuporiĝis," diris He Zhenliang.

Kiam la ĉina delegacio revenis al Pekino, ilin bonvenigis en flughaveno 1500 personoj kun floroj en la manoj kaj rubando kun surskribo "Ĉiama Pekino, Proksimaj Olimpikoj".

"Ni revenis ne kun triumfo, sed estis bonvenigitaj tiel solene kaj varme. Tio elmontris la persistemon de la ĉina popolo. La provizora malvenko ne frakasis nian firman volon. La vortoj sur la rubando profunde gravuriĝis en mia memoro. Kvankam ni malsukcesis en petado de la gastigado de la Olimpikoj en 2000, tamen mi daŭre laboris por tio, ĉar mi kredis, ke ni certe sukcesos en invitado de Olimpikoj," diris He Zhenliang.

Revo realigita en Moskvo

"Kiun ajn decidon vi faros, ĝi registriĝos en la historio. Sed nur unu decido kreos novan historion," tion diris He Zhenliang en sia raporto por peti rajton de gastigado de la Olimpikoj, la 13-an de julio, 2001 en Moskvo, ĉefurbo de Rusio.

Ok jarojn post 1993, Ĉinio multe disvolviĝis. La voĉdona rezulto montris, ke Ĉinio gajnis rajton de gastigo de la 29-aj Olimpikoj per balotiloj je 34 pli multaj ol Toronto, kiu okupis la duan lokon en la balotado.

Je la 6-a horo posttagmeze laŭ moskva tempo, Samaranch suriris la podion, malfermis la koverton kaj solene deklaris: La urbo, kiu gastigos la 29-ajn Olimpikojn en 2008, estas Pekino!

Ĝojkrio, aplaŭdo, brakumo... ĉiuj membroj de la ĉina delegacio eksaltis de ĝojo! Ekbolis Pekino!