La Azia Sportkunveno okazas en ĉiu kvara jaro. Ĝi naskiĝis antaŭ pli ol duonjarcento, kiam Azio estis sin liberiganta el kolonia regado kaj klopodanta por la nacia sendependiĝo. Malgraŭ diversaj malfaciloj, la Azia Sportkunveno neniam interrompiĝis. Hodiaŭ Azio frontas al plej bona favora ŝanco por disvolviĝo, kaj la Azia Sportkunveno eniras en sian oran periodon kaj fariĝas scenejo, sur kiu la aziaj popoloj pliintensigas amikecon kaj harmonion inter si.

Sankta fajro lumigis la kunvenon

La 1-an de decembro 2006 katarano bruligis fajron de la 15-a Azia Sportkunveno en Khalifa-stadiumo, kaj la sportkunveno inaŭguriĝis en hurao de la aziaj popoloj.

En 1951, kiam la flago de la Azia Olimpika Konsilio unuafoje flirtis super Nov-Delhio, ĉefurbo de Hindio, en tiu ĉi sportkunveno partoprenis nur ĉ. 500 sportistoj el 11 aziaj landoj kaj regionoj. Sed al tiu ĉi sportkunveno en Daŭho aliĝis dek miloj da sportistoj el 45 aziaj landoj kaj regionoj.

Sur la flago de la Azia Olimpika Konsilio estas desegno de radianta suno. Ĝi simbolas, ke la kontinento, kiu havas plej vastan teritorion, plej grandan nombron da loĝantoj kaj plej longe suferis premadon kaj humiligon en la mondo, ekhavis sian propran scenejon por sin prezenti.

Post la finalo de la vira 110-metra hurdokurado en la 15-a Azia Sportkunveno, japana sportisto Naito Masato diris: "Dumlonge Usono superregis en la 110-metra hurdokurado, sed Liu Xiang ŝanĝis la historion. Kiel aziano, mi ege fieras!"

Du monumentoj de la sportkunveno

Post la 15-a Azia Sportkunveno oni starigis du monumentojn en Daŭho: Unu por volontuloj, kiuj venis de diversaj lokoj de la mondo kaj ludis gravan rolon por sukcesigi la sportkunvenon, kaj la alia por Kim Hyung Chil, rajdisto el la Korea Respubliko, kiu mortis pro akcidento en la kunveno. La sportkunveno funebris pro lia forpaso. Aro post aro da funebrantoj el diversaj landoj kaj regionoj venis antaŭ lian portreton kaj prezentis florojn.

La Azia Sportkunveno celas akceli interkompreniĝon, interŝanĝon kaj reciprokan respekton inter la aziaj popoloj.

En la inaŭguro delegacioj de la Korea Popol-Demokratia Respubliko kaj de la Korea Respubliko man-en-mane eniris en la stadionon; en la sportista vilaĝo sportistoj de diversaj religioj harmonie kunestis, kaj ĉiuj religiaj kredoj estas respektataj; en la sporta urbo de Daŭho, aktoroj el diversaj landoj de Azio prezentis tradiciajn naciajn kulturojn.

Por longdaŭra paco kaj kuna prospero de Azio

Dum la inaŭguro, krom delegacio de la gastiganto Kataro, la iraka delegacio gajnis plej longan kaj varman aplaŭdon. La suferanta Irako altiris apartan atenton de amaskomunikiloj kaj spektantoj. Kiam iraka sportisto de halterlevo akiris medalon en la Azia Sportkunveno unuafoje en la pasintaj 20 jaroj, la tuta Azio hurais por la iraka popolo. Proparolanto de la organiza komitato diris tion, kion volis diri la tuta Azio: "Ni ridetu al ili kaj gratulu ilin!"

En la moderna historio Azio travivis tro da militoj, tial ĝi multe deziras harmonian kaj pacan medion. En la inaŭguro miloj da amasaktoroj formigis per torĉo en la mano grandegajn vortojn "peace be upon you" (pacon al vi), kaj samtempe 50 mil spektantoj forflugigis kolombojn. Tio estas kuna beno de Azio!