Lhari-gubernio de Nagqu en norda Tibeto situas je 4500 metroj super la marnivelo. Ĉie en Lhari estis kovrita de neĝo en frua vintro, tamen la suno ĉarme brilis.

"La plej bela domo en la gubernio estas tiu de nia lernejo," diris Peng Jilin, vicrektoro de la Mezlernejo de la gubernio Lhari. La domo konstruita en 2006 kun la totala areo de ok mil kvadrataj metroj konsistas el larĝaj koridoroj, dekoj da klasĉambroj, biblioteko, kaj laborĉambroj por instruistoj.

La unua instrua domo de la mezlernejo estis finkonstruita en 2003 per miliono da juanoj (ĉ. 10 juanoj = 1 eŭro), monsumo de la ŝtato por helpi Tibeton. Tiu ĉi domo nun servas kiel provizora loĝejo por lernantoj. Estis konstruitaj ĉirkaŭ ĝi nova manĝejo, tri loĝdomoj por lernantoj kaj dek por instruistoj.

Peng diris, ke en la pasintaj tri jaroj la lernejo akiris investojn de 30 milionoj da juanoj. La konstruado en la lernejo jam finiĝis kaj ĝi povas akcepti 1200 lernantojn por studi kaj loĝi. En la printempo de 2008 estos konstruita sportejo.

En la lastaj jaroj la ĉina registaro plimultigis elspezojn al edukado, precipe por plibonigi instruajn kondiĉojn de elementaj kaj mezgradaj lernejoj en landlimaj kaj nacimalplimultaj regionoj, kaj altigi pokapan elspezon por lernejanoj.

Lhari-gubernio havas 28 mil loĝantojn kaj areon de 13 mil kvadrataj kilometroj. Pro disa loĝado kaj maloportuna trafiko, paŝtistaj infanoj havas malfacilon por viziti lernejon. Ĉiujare la gubernia registaro donas 20% da financa enspezo al edukado. Guberni-estro Gesong Meilang diris: "La registaro asignis milionon da juanoj por starigi edukan fonduson, cele premii kaj helpi instruistojn kaj lernantojn."

La elementaj kaj mezgradaj lernejoj sur paŝtejoj senigas pagojn por lernolibroj kaj lernokotizo, kaj liveras subvencion al pensionanoj. Tio solvis la problemojn de la geknaboj, kiuj havas malfacilojn por viziti lernejon. En la gubernio Lhari pli ol 97% da lernojaraj infanoj povas viziti lernejon. Gesang Duojie, estro de la gubernia buroo de eduko kaj sporto, diris: "Escepte de handikapulaj infanoj, preskaŭ ĉiuj geknaboj povas viziti lernejon."

La alta procento de lernejovizitado en la gubernio estas ŝuldita al alta atento de la gubernio al edukado. En oktobro de 2006 la gubernio ellaboris regularon pri lernejvizitado de lernojaraj infanoj. Laŭ tiu regularo oni malpromocias koncernajn guberniajn administrantojn, kiuj malbone plenumas la difinojn, kaj punas familiojn, kiuj ne ĝustatempe sendas la infanon al lernejo.

La loka edukado estas subtenata de kadroj, kiuj venas de aliaj provincoj por labori en Tibeto. Aŭguste de 2007 kadro el Zhejiang-provinco al Lhari iniciatis instruan interŝanĝon de la Elementa Lernejo Guangchanglu de la urbo Wenzhou kaj la Plena Elementa Lernejo de Lhari. Instruisto de la lernejo Guangchanglu Deng Xiaqiu donacis en la nomo de sia lernejo al la elementa lernejo de Lhari skribilaron valorantan 15 mil juanojn kaj donis lecionon por 39 lernantoj.

"Verdaj lotusfolioj kreskas en akvo, ranoj gaje saltadas sur ili..." Danzeng el la Plena Elementa Lernejo de Lhari neniam vidis lotusfolion, la lingva leciono "Rondaj lotusfolioj" gvidita de instruisto Deng Xiaqiu profunde impresis lin.

La ĉina registaro alte atentas edukadon. La raporto de la 17-a Tutlanda Kongreso de KPĈ diras, ke oni devas unue disvolvi edukadon kaj subteni edukadon en malriĉaj kaj nacimalplimultaj regionoj. "La instrua interŝanĝo estas nur provo," diris Huang Rongding el Wenzhou, sekretario de la partia komitato de Lhari. "Ni plimultigos edukajn elspezojn, plibonigos instruajn kondiĉojn, por ke ĉiuj infanoj sur paŝtejoj povu viziti lernejon."