Post fondiĝo de la nova Ĉinio en 1949 la tibeta medicino kiel elstara nacia kulturo havas rapidan disvolviĝon.

Nun en Tibeto estas 18 tibet-medicinaj institucioj kaj pli ol 2 mil laborantoj okupiĝantaj pri la tibeta medicino. Ĉiujare la Tibet-medicinan Hospitalon de la Tibeta Aŭtonoma Regiono vizitas tricent mil homfojoj, kaj tien enloĝiĝas kvar mil pacientoj por kuracado.

Zhan Dui, estro de la hospitalo, diris, ke la centra kaj lokaj registaroj donas grandan atenton al scienc-esplorado de la tibeta medicino kaj asignis pli ol 10 milionojn da juanoj por baza konstruado de scienc-esplorado de tibeta medicino kaj kompletigo de establaĵoj kaj fakuloj. Dank’ al tio la scienc-esplora laboro de tibeta medicino rikoltis grandajn fruktojn: oni sukcese esploris kaj faris 5 novajn specojn de ŝtat-klasaj medikamentoj. Tio alportis al tibet-farmaciaj entreprenoj rimarkindan profiton.

La tibet-medicina industrio, unu el la ĉefaj industrioj de Tibeto, fariĝis ekonomia grupo de tibet-medicinaĵoj kun elitaj entreprenoj kiel akcelilo, scienc-esplorado kiel apogilo, tradiciaj kaj novaj produktaĵoj kiel subteniloj, protekto kaj utiligo de la naturaj riĉaĵoj kiel la bazo, disvolviĝas paŝon post paŝo al pli granda skalo.

Nun la tibet-farmaciaj entreprenoj povas produkti pli ol 360 specojn de medikamentoj, inter kiuj 294 estas sankciitaj de la Ŝtata Nutraĵ-Medicinaĵa Kontrola Administracio de Ĉinio, 21 estas enlistigitaj en la katalogon de novaj medicinaĵoj de la ŝtato, 20 -- specojn de ĉinaj medicinaĵoj protektataj de la ŝtato, 16 -- en medicinan kodon de Ĉinio kaj 31 -- en “Katalogon de fundamentaj medicinaĵoj de la ŝtato”.

Dank’ al ekfunkcio de la Qinghai-Tibeta Fervojo, tibetaj medicinaĵoj estas vendataj al diversaj lokoj de Ĉinio kaj iuj ankaŭ eksterlande. En 2007 la produktovaloro de tibetaj medicinaĵoj atingis 660 milionojn da juanoj, la vendosumo estis 450 milionoj da juanoj kaj oni pagis 56 milionojn da juanoj por imposto.