La 24-an de majo komenciĝis en Pekino grandskala interŝanĝo de ĉinaj kaj francaj junuloj. En 2006-2007 interŝanĝajn vizitojn faros 400 junuloj inter la du landoj. La ĉefministroj de la du landoj donis salutvortojn por la aktivado.

Ĉina ĉefministro Wen Jiabao diris, ke la junularo de Ĉinio kaj Francio portas la taskon daŭrigi la amikan interŝanĝon de la du landoj. La interŝanĝo de la du junularoj simbolas morgaŭan amikecon de Ĉinio kaj Francio kaj la amikeco inter la du junularoj antaŭvidigas la estontecon de la rilatoj de la du landoj.

Franca ĉefministro Dominique de Villepin diris, ke la aktivado plue antaŭpuŝos la pli intimajn interrilatojn de la du landoj.

Ĝi estas la unua grandskala interŝanĝo inter la du junularoj dum la lastaj 20 jaroj kaj ankaŭ la unua grandskala interŝanĝo inter Ĉinio kaj eŭropaj landoj en la lastaj jaroj. 400 francaj junuloj en kvar grupoj sinsekve vizitos Ĉinion en la kuranta jaro. La interŝanĝaj temoj estos kulturo kaj arto, ekonomia-komerca kunlaboro, kunlaboro de neregistaraj organizoj, kaj interŝanĝoj de studentoj kaj lernantoj. La unua grupo el 100 francaj junuloj en kultura rondo vizitos Ĉinion komence de junio. 400 ĉinaj junuloj vizitos Francion en 2007.