Lastatempe Liu Qi, prezidanto de la Organiza Komitato de la Pekinaj Olimpikoj, diris, ke en la pasintaj 5 jaroj post kiam Pekino komencis prepari la Olimpikojn, ĉiuj difinitaj celoj realiĝis laŭplane.

Liu Qi konigis la ĝeneralan situacion de la prepara laboro: la konstruado de la sportejoj por la Olimpikoj progresas glate. La konstruado de novaj sportejoj kaj renovigo de plejparto de la malnovaj sportejoj jam komenciĝis, kaj la konstruado de la koncernaj akcesoraj instalaĵoj procedas laŭplane.

La organiza laboro de konkursoj iras glate kaj la tagordoj de la konkursoj estis ellaboritaj. La Olimpikoj en 2008 enhavos 28 disciplinojn kun 38 branĉoj kaj 302 subbranĉoj. Nun, la Internacia Olimpika Komitato (IOK) jam aprobis ĉiujn tagordojn. Ĉiuj konkursaj sportejoj, la estroj de la 28 disciplinoj kaj plejparto de la trejnaj sportejoj estis konfirmitaj.

Krome, fondiĝis la preparaj institucioj en Qingdao por velado kaj en Tianjin, Ŝanhajo, Shenyang kaj Qinhuangdao por la antaŭfinalaj matĉoj de piedpilko. Konfirmite de IOK, la rajdarta konkurso okazos en Hongkong anstataŭ en Pekino.

De la komenco de la preparo de la Olimpikoj, la Organiza Komitato de Pekinaj Olimpikoj organizis aktivadojn por elekti la emblemon, talismanojn, sloganon kaj olimpikan kanton. La slogano “Unu Mondo, Unu Sonĝo” plene esprimas la amon de la ĉina popolo al la Olimpikoj kaj ĝian deziron progresi kaj disvolviĝi kune kun la monda popolo. Nun la projekto pri torĉo-transsendado de la Olimpikoj kaj ĝiaj inaŭgura kaj ferma ceremonioj estas ellaborataj.