La 2-an de septembro malfermiĝis en Changchun, Jilin-provinco en nordorienta Ĉinio, la 2-a Foiro de Investo kaj Komerco de nordorienta Azio, kiu altiris pli ol 40 mil ŝtatajn oficistojn kaj komercistojn el 51 landoj kaj regionoj. Ĉina vicĉefministro Wu Yi deklaris la foiron malfermita.

La foiro, gastigata de la Komerca Ministerio de Ĉinio, la Oficejo por Reprosperigi la Malnovajn Industriajn Bazojn en Nordorienta Ĉinio de la Ŝtata Konsilantaro de Ĉinio kaj la registaro de Jilin-provinco, estas la plej altnivela kaj la plej grandskala en nordorienta Ĉinio.

La foiro havas 10 sekciojn de ekipaĵa fabrikado, altscienca teknologio (elektroniko), konstruaj materialoj, kemiindustrio, manĝaĵoj, medicinaĵoj, tekstilado, sportaj varoj, investa kunlaboro kaj komerca servo. Krom komercaj kaj investaj intertraktadoj, okazos ankaŭ kunsido de ĉefoj de nordorienta Azio, forumo de ekonomia kunlaboro de nordorienta Azio, komerca semajno de Rusio, komerca tago de la Respubliko de Koreio, Korea Popol-Demokratia Respubliko kaj Mongolio.

Nordorienta Azio, ŝlosila loko de komerco kaj trafiko inter Eŭropo kaj norda Ameriko, ludas gravan rolon por la tutmonda ekonomio pro la ekonomia kreskado kaj daŭrigebla disvolviĝo. La foiro estas grava platformo de la ĉina registaro por antaŭenpuŝi komercadon inter Ĉinio kaj nordorienta Azio.