|
S-ro
Tadacuna Nomra (maldekstre) kaj la aŭtoro |
Septembre de 2006 japana samideano Tadacuna Nomra faris
sian 12-fojan enketon pri la invado de Japanio al Ĉinio dum la Dua
Mondmilito. La Tianjin-a Esperanto-Asocio helpis lin en lia agado
kaj mi akompanis lin dum lia vojaĝo.
En 1933 s-ro Tadacuna Nomra naskiĝis en Koreio. Lia
tuta familio revenis al Japanio post malvenko de Japanio en la Dua
Mondmilito. Li okupis sin pri kulturado kaj kontrolado de maraj
estaĵoj. Post emeritiĝo en 1998, li dediĉis sin al Esperanto-movado,
kaj nun estas unu el la estraranoj de la Japana E-Asocio.
S-ro Tadacuna estas amiko de la ĉina popolo kaj malamegas
la japanajn militaristojn. Por malkovri krimojn de japanaj militaristoj
en invado al Ĉinio kaj konigi al ĉiuj la veran historion, de 1990
li 11-foje vizitis Ĉinion, kaj en 2006 li refoje venis al Ĉinio.
Li vizitis pli ol 20 vilaĝojn de Hebei-provinco kaj Duliu de Tianjin.
Revizito
al Xushui
En Yufang-vilaĝo, Hebei-provinco, vilaĝestro Yi Chunming
varme akceptis nin. 80-jara Zhang Heling venis intervidiĝi kun ni
kaj rakontis al ni, ke posttagmeze de la 18-a de la 8-a monato de
1937 laŭ la luna ĉina kalendaro, japanaj agresantoj mortigis pli
ol 30 vilaĝanojn en la korto de iu familio. Ili ankaŭ perfortis
dekkelkajn virinojn kolektitajn en domo... Aŭdinte tion s-ro Tadacuna
larmis de malĝojo kaj honto pro la barbaraĵoj faritaj de japanaj
militistoj.
81-jara Wang Runquan en Liushoufen-vilaĝo rakontis
al ni la tragedion. En profunda nokto, japanaj trupoj ĉirkaŭis la
vilaĝon de tri flankoj. Frumatene ili pelis la vilaĝanojn al kilno
kaj mortigis pli ol 30 el ili per bajoneto.
Vizito
al Tianjin
S-ro
Tadacuna vizitis la Memorhalon de Ĉinaj Laboruloj Mortintaj en Japanio
en la norda antaŭurbo de Tianjin. Li atente legis klarigojn kaj
rigardis ĉiujn montritajn fotojn kaj profunde riverencis antaŭ la
kulttabuleto por memorigi la viktimojn. Post la vizito, li skribis
sur la memorlibro: "Por amikeco kaj paco inter la japana kaj
ĉina popoloj, japanoj devas viziti la memorhalon."
En la lasta periodo la agresa milito de Japanio kontraŭ
Ĉinio, pro manko de laboruloj en Japanio, japanaj trupoj kaptis
grandan numbron da ĉinoj kaj ilin transportis al Manĉurio kaj Japanio,
kaj starigis laborulajn koncentrejojn en Pekino, Tianjin, Qingdao,
Shijiazhuang, Ji'nan kaj aliaj lokoj. Dum la jaroj 1943-1945, Japanio
forkaptis 41 mil ĉinajn laborulojn kaj perforte ilin laborigis en
135 lokoj por fosi minejojn kaj kanalojn, konstrui vojojn kaj bori
tunelojn en montoj, ŝarĝi kaj malŝarĝi kamionojn kaj ŝipojn. En
malpli ol du jaroj, 6830 ĉinaj laboruloj mortis en Japanio kaj 6778
invalidis.
La Tianjin-a Televida Stacio kaj Tianjin-a Popola Radio
intervjuis s-ron Tadacuna. Ili demandis lin: "Pro kio vi faras
la enketon? Kiel vi opinias pri la rolo de via enketado?" Li
respondis: "Zamenhof kreis Esperanton por tutmonda paco. Mi
klopodas por realigi lian idealon. Celante intimigi amikecon inter
la japana kaj ĉina popoloj, mi faris la enketon pri krimoj de la
japana armeo, precipe pri tiuj de la 6-a divizio dum la agresa milito
kontraŭ Ĉinio, dezirante malkovri la fakton al la japana popolo,
precipe al la japanaj junuloj. Por tio mi volus fari kontribuon."
|
Renkontiĝo
kun membroj de la Tianjin-a Esperanto-Asocio |
Vespere s-ro Tadacuna renkontiĝis kun membroj de la
Tianjin-a Esperanto-Asocio. Li estis varme bonvenigita, kaj ili
havis tre intiman interbabilon. Kiel unu el la LKK-anoj de la 92-a
UK, s-ro Tadacuna invitis tianjin-ajn amikojn al la kongreso.
Kunsido
ĉe ĈEL
La lasta stacio de la vojaĝo de s-ro Tadacuna en Ĉinio
estis la Ĉina Esperanto-Ligo. Li kunsidis kun samideanoj de ĈEL.
Ĉiuj laŭdis la justan agadon de s-ro Tadacuna. Menciinte pri la
japana invado al Ĉinio, ĉin-japanaj interrilatoj kaj rolo de Esperanto,
li diris: "Japana invado al Ĉinio estis diabla eraro, kaj ĝia
fiasko neevitebla. Estas danĝere, ke nun iuj japanoj volas ŝanĝi
la pacan konstitucion. Kial mi interesiĝas pri la 6-a divizio de
la japana armeo? Ĉar ĝiaj militantoj ĉefe venis el la gubernio Kumamoto
— mia hejmloko. Mi deziras instrui la samgubernianojn per fakto
kaj vera historio, ke ili ne estu trompitaj de la japana registaro.
Dank' al Esperanto, mi povis multfoje viziti Ĉinion, kaj intertempe
la ĉinaj Esperantaj organizoj multe helpis min. S-ro Han Zuwu, kiel
mia helpanto, bone kaj atenteme prizorgis min. Se mia sano permesas,
mi daŭrigos mian enketadon ĝis la fino de mia vivo."
|