Iun vesperon antaŭ 30 jaroj, 18 kamparanoj faris kun serioza mieno fingran premsignon sur kontrakton sub malhela kerosena lampo en kabano de la vilaĝo Xiaogang de Fengyang-gubernio, Anhui-provinco en orienta Ĉinio. Ili ĵuris, ke malgraŭ ĉiu ajn risko, ili dividos la agron de la kolektivo kaj laŭkontrakte kulturos ĝin laŭ familio. Nun la kontrakto estas konservita en la Revolucia Muzeo de Ĉinio kiel iniciato de la reformado en la ĉina kamparo.

Hodiaŭ en la vilaĝo etendiĝas larĝa ŝoseo, imponas alta arkaĵo kaj memorhalo. Sur la arkaĵo legiĝas vortoj skribitaj de prestiĝa sociologo Fei Xiaotong "Vilaĝo Xiaogang de Fengyang". La memorhalo prezentas la eksterordinaran historion de la vilaĝo.

Memorhalo

La memorhalo fondiĝis en julio 2006. Ĝi estas monumento de reformado de Ĉinio en la kamparo kaj altiras ĉiutage vizitantojn en- kaj eksterlandajn. En la halo pendas portretoj de la 18 pioniroj de la kampara reformado. Bedaŭrinde 4 el ili jam forpasis.

En 1979, unu jaron post la subskribo de la kontrakto, la grena produktokvanto de la vilaĝo multiĝis de 18 mil kilogramoj al 66 mil. La jara produktokvanto de 1979 egalas la totalan produktokvanton de 1966 ĝis 1970. Ankaŭ en la sekvaj jaroj rapide disvolviĝis la agrikulturo de la vilaĝo.

Guan Youjiang, vicdirektoro de la komitato de la vilaĝo, konigis, ke la vilaĝo ĉefe okupiĝas pri agrikulturo kaj al ĝi mankas industrio, kaj tie nun estas nur unu muldila fabriko kun investo de tri milionoj da juanoj (ĉ.10 juanoj = unu eŭro).

Nun la vilaĝo establis turisman kompanion surbaze de rearanĝo de entreprena strukturo.

"Disvolvi turismon kun la memorhalo kiel ĉefa vizitata objekto estas alia trarompo de la vilaĝo. Ĉiaokaze la vilaĝo estas origino de la kampara reformado de Ĉinio," diris Guan.

Studentoj fikse loĝas tie

Apud forcejoj estas tri junuloj kun memfida rideto sur la vizaĝo. Ili venis de la Scienc-teknologia Kolegio de Anhui-provinco kaj fariĝis tieaj vilaĝanoj kun plej alta klereco de la loko. En varmeta vintra tago, ili rakontas sperton pri fungo-kulturado.

"Unu forcejo havas 450 kvadratajn metrojn kaj la produktokvanto de unu kvadrata metro estas 8.5 kilogramoj sezone. Se la temperaturo taŭgas, jam ĉe la komenco de la printempo la rikolto de fungoj jam povas kovri la investon," diris unu el ili.

En nur malpli ol duonjaro ili ricevis bonan rikolton en iliaj naŭ laŭkontrakte kulturataj forcejoj de fungo. La produktovaloro de la unua periodo superis 50 mil juanojn. Ĝis oktobro de la lasta jaro la tri junuloj gajnis po pli ol 30 mil juanojn.

En majo 2006, kiam la tri junuloj venis al la vilaĝo, estroj de la gubernio venis vidi ilin kaj subvenciis ilin po 6500 juanoj. La favora politiko plie stimulis ilin: senigi forcejan lupagon de la unua jaro kaj ili ĉiu povas pruntepreni 45 mil juanojn sen interezo. Ili tre ĝojis, sed laŭ la vilaĝa regularo ili rajtas ĝui la favoran politikon kondiĉe, ke ili devas esti vilaĝanoj. Tio signifas, ke la tri junuloj, kiuj jam fariĝis urbanoj, devis ree registri sin kiel kamparanoj. Por ili estis malfacile eniri en universitaton kaj fariĝi urbano. Kompreneble, tion oponis iliaj gepatroj. Sed la junuloj kun firmeco persvadis ilin kaj fine ili akceptis ilian decidon. Dank' al progresinta teknologio kaj ilia zorgemo la de ili kulturitaj fungoj bone kreskas kaj donas riĉan rikolton.

Tio stimulis entuziasmon pri fungo-kulturado en la vilaĝo. Lokanoj sinsekve starigis 26 fungajn forcejojn kaj multaj legomvendistoj venis aĉeti fungojn. Venis ankaŭ komercistoj pri manĝaĵa prilaborado por mendi fungojn. Antaŭ nelonge ili jam subskribis kontrakton kun iu manĝaĵa fabriko en Nankino, kaj tiu faros la de ili produktitajn fungojn ladaĵoj kaj vendos ilin eksterlande.

La junuloj estis nomumitaj vicdirektoroj pri teknologio, kaj en la vilaĝo fondiĝis kooperativo pri manĝeblaj fungoj.

Industrio esperata en la vilaĝo

Dum la lastaj jaroj la vilaĝo ĉiam esperis enkonduki al si industriojn. Vilaĝestro Yan Deyou diris, ke la vilaĝo jam planas starigi per miksaj kapitaloj fabrikojn de aŭtopecoj, stanita kupra drato kaj faruno. "Ni jam subskribis kontraktojn pri la projektoj," ĝoje diris Yan.

Antaŭ nelonge la vilaĝo subskribis 12 projektojn kun investo de 920 milionoj da juanoj. Tie oni konstruos bazaron kun areo de unu hektaro.

Denove sur la vojon de kooperado

"Private terkulturi laŭkontrakte estis spirita riĉaĵo de la vilaĝo," diris Wang Guocai, ĝenerala sekretario de la partia komitato de la urbo Chuzhou. En la printempo 2006 la vilaĝo denove vekis atenton de aliaj. Laŭ la propono de Shen Hao, ĝenerala sekretario de la partia komitato de la vilaĝo kaj aliaj, la vilaĝo refoje iris sur la vojon de koopera ekonomio.

"Ni gvidas vilaĝanojn kune entrepreni bredadon de porkoj kun agro kiel akcio," diris Shen. En la vilaĝo reaperis "kooperado" post 28-jara praktikado de individua terkulturado.

Laŭ la koopera entreprenado, vilaĝanoj laŭvole subskribis kontrakton kun la kompanio Sannong de Ŝanhajo por fondi dek porko-bredejojn kun jara produktokvanto de 50 mil porkoj kaj laborigi 60 vilaĝanojn.

La vilaĝo posedas 120 hektarojn da agro. Krom 27 hektaroj da vinberujo, Shen decidis kulturi bonkvalitan furaĝon kaj legomojn sur la resta 93 hektaroj da tero. Post diskutado de reprezentantoj de la vilaĝanoj, la vilaĝo establos en venontaj jaroj asocion de bredado de reproduktantaj porkoj, kooperativo de posedaĵ-administrado kaj aliajn kolektivajn organizojn. Oni ankoraŭ planas starigi ok malsamajn kooperajn societojn kaj administros ilin kiel modernajn fabrikojn.