Shenzhen, la unua speciala ekonomia regiono de Ĉinio, disvolviĝis de malgranda urbeto al moderna urbo kun relative evoluinta ekonomio, avantaĝaj cirkonstancoj por investado kaj pitoreskaj pejzaĝoj, post 28-jara praktikado de la politiko de reformado kaj pordo-malfermo.
Kiel la unua speciala ekonomia regiono de Ĉinio, fondita laǔ la propono de Deng Xiaoping, Shenzhen estas ĉiam rigardata kiel fenestro de reformado kaj pordo-malfermo de Ĉinio.

Shenzhen, ĉemara urbo en suda Ĉinio, distancas de Hongkong je 45-minuta aǔtoveturado. Pro la aparta geografia pozicio de Shenzhen, la ĉina registaro sankciis en 1980 konstrui tie specialan ekonomian regionon, kaj ekde tiam komenciĝis mirakla kreskado de la loko. 28 jarojn poste, Shenzhen fariĝis moderna urbo kun certa influo en la internacio.

Dum la 28-jara disvolvado, "Shenzhen-a rapideco" ja fariĝis ofte uzita esprimo. Dum tiu tempo ĝiaj loĝantaro kreskis de 30 mil al 10 milionoj, urba areo -- de 3 al 700 kvadrataj kilometroj kaj malneta produktovaloro -- de 17.9 milionoj da juanoj en 1979 al 670 miliardoj da juanoj en 2007, tio ja estas miraklo en la ekonomia historio de la mondo.

Nov- kaj alt-teknika industrio, moderna loĝistiko, financa servo kaj kultura industrio konsistigas la kvar ĉefajn industriojn de la regiono. Kun la pokapa malneta produktovaloro de 10628 usonaj dolaroj en 2007, Shenzhen fariĝis la unua urbo sur la ĉeftero de Ĉinio kun la pokapa malneta produktovaloro de pli ol 10 mil usonaj dolaroj. Krome, laǔ la totala valoro de eksporto kaj importo ĝi okupis la unuan lokon inter la grandaj kaj mezgrandaj urboj de Ĉinio en sinsekvaj pli ol 10 jaroj.

Kiel plej frue malfermita urbo de Ĉinio, Shenzhen havas densan internacian etoson. Tie konstante loĝas kaj laboras pli ol 13 mil fremdlandanoj. En 2007 tra la Shenzhen-a haveno en- kaj elĉiniĝis 178 milionoj da pasaĝeroj. 5% da loĝdoma areo en Shenzhen apartenas al homoj el Hongkong, Taiwan, Makao kaj fremdlandanoj.

Kiel la plej juna kaj vigla urbo kun la loĝantoj, kies averaĝa aĝo estas nur 26 jaroj, Shenzhen gastigos la 26-an Mondan Universitatan Sportkunvenon en 2011.