Lastatempe sinjorino Anna Kajumulo Tibaijuka, plenuma direktoro de la Programo de la Unuiĝintaj Nacioj pri Homa Setlado, akceptis mian intervjuon en sia oficejo en la norda antaŭurbo de Najrobio. Ŝi laŭdis Ĉinion pro ĝia progreso en konstruado de loĝdomoj post praktikado de reformado kaj pordo-malfermo.

Ekonomia evoluo antaŭenpuŝas la konstruadon de loĝdomoj

Anna Kajumulo Tibaijuka diris, ke pro disvolviĝo de ekonomio oni havas pli grandan esperon pri bonigo de loĝado, kaj la espero povas fariĝi interna motoro de konstruado de loĝdomoj. En la lastaj jaroj Ĉinio ŝuldas siajn atingojn en konstruado de loĝdomoj ĉefe al la politiko pri reformado kaj pordo-malfermo, kiu akcelis disvolviĝon de ekonomio. Precipe en la 90-aj jaroj de la 20-a jarcento, pro ekonomia leviĝo la ĉina registaro komencis doni atenton al konstruado de loĝdomoj kaj faris grandan klopodon por bonigi la medion en urboj kaj la loĝkondiĉojn de malfortaj homgrupoj de la socio.

Laŭ statistikaj dokumentoj publikigitaj en la retejo de la Programo de la Unuiĝintaj Nacioj pri Homa Setlado, de 1990 ĝis nun ĉinaj urboj 14-foje gajnis diversajn premiojn de UN pri homa setlado. Ĉiujare inter 2001 kaj 2007 almenaŭ unu ĉina urbo gajnis la plej altan premion de UN -- Honora Premio de Loĝado. En 1999 la ĉina urbo Zhuhai estis honorita de la Centro de UN pri Homa Setlado per la Premio por la Plej Bonaj Praktikoj en Plibonigo de Homaj Setlejoj. Ĝi estas la unika ĉina urbo, kiu ricevis tiun ĉi honoron.

Anna Kajumulo Tibaijuka diris, ke de 2006 ŝi interparolis respektive kun ĉinaj ŝtataj gvidantoj kaj oficistoj el koncernaj departementoj. Dum la interparoloj ili senescepte montris tre riĉajn profesiajn sciojn pri la setlado kaj pozitivan sintenon, kaj esprimis sinceran deziron partopreni kaj kunagi en diversaj laboroj de la Programo de UN pri Homa Setlado. Ŝi diris ankaŭ, ke ĉinaj urboj pli kaj pli aktive kunlaboras kun la programo; ekzemple, novembre de la kuranta jaro okazis en la ĉina urbo Nankino la 4-a Urba Forumo sub la Programo de UN, kaj en 2010 Ŝanhajo gastigos la Mondan Ekspozicion.

Komforta loĝado: grava parto de la homa setlado

La 2-a Konferenco de la Unuiĝintaj Nacioj pri Homa Setlado okazinta en Istanbulo en 1996 akceptis Programon de Loĝado. Tio estas plano de la agado por la tuta mondo. La programo preskribas, ke diverslandaj registaroj havas la devon liveri sufiĉe da loĝdomoj al ĉiuj homoj kaj konservi daŭrigeblan disvolviĝon de la urboj.

Anna Kajumulo Tibaijuka diris, ke la Programo de UN por Homa Setlado disvolvas du kampanjojn en la tuta mondo "Urba Administrado de la Mondo" kaj "Loĝada Garantio de la Mondo", kiuj celas redukti malriĉecon en urboj, emfazante egalecon, daŭrigeblan disvolviĝon kaj socian justecon. Sekureco de loĝado estas la plej baza postulo de la plenampleksa progreso de la urba vivo kaj ankaŭ grava parto de loĝrajto. Garantio de loĝado de la popolanoj estas la plej grava enhavo de la homa setlado.

Ŝi diris, ke la 4-a Urba Forumo en Nankino havis gravan temon kiel bonigi kondiĉojn de la vivo kaj loĝado de tiuj, kiuj perdis agron, por eviti grandskalan slumiĝon en rapidiĝanta urbanizo. Ŝi daŭrigis, ke delonge la ĉina registaro klopodas por praktiki kaj kompletigi la reformadan sistemon pri loĝado en urboj kaj vilaĝoj; por solvi la problemon de loĝado de familioj kun malalta aŭ mezgrada enspezo, la ĉina registaro konstruas loĝdomojn kun malalta lupago kaj ĉipajn aŭ prez-limigitajn domojn. Tiuj rimedoj sendube konformas al la spirito de la Programo de UN pri Homa Setlado.

Rekonstruado post la tertremo en Sichuan-provinco enkorpigas altefikecon de la ĉina registaro en setlado

Antaŭ nelonge sinjorino Anna Kajumulo Tibaijuka vizitis Chengdu, ĉefurbon de Sichuan-provinco, kaj diskutis kun la loka registaro pri teknika subteno kaj aranĝado de loĝantoj en la rekonstruado post la tertremo. Informiĝinte pri tio, ke suferintoj de la tertremo en tiu ĉi provinco jam estis aranĝitaj en portempaj loĝdomoj, kaj la permanentaj loĝdomoj estas konstruataj, ŝi diris, ke tio estas tre mirinda atingo, ke dum nur kelkaj monatoj Ĉinio solvis la problemon pri portempa loĝado de milionoj da suferintoj; la rekonstruado en Sichuan-provinco plene enkorpigas altefikecon de la ĉina registaro en setlado; spertoj de Ĉinio en la batalo kontraŭ katastrofo estas lernindaj por aliaj landoj, precipe por la evoluantaj.

Ŝi diris, ke ŝia vojaĝo al Sichuan-provinco donis al ŝi grandan stimulon kaj multajn surprizojn. "Mi estis tre emocia, vidinte rideton sur la vizaĝo de infanoj en lernejo nove konstruita post la tertremo." Ŝi havas profundan impreson pri bonega organizado kaj solidareco de la ĉinaj registaro kaj popolo en la batalo kontraŭ la katastrofo.

Menciante la Pekinajn Olimpikojn, ŝi diris, ke gastigo de la Pekinaj Olimpikoj evitende beligis la medion kaj progresigis la setladon de la urbo. Kompare kun la urbo en 1995, kiam ŝi unuafoje vizitis Pekinon, la medio de la urbo multe pliboniĝis. Pro disvolviĝo de la ĉina ekonomio kaj konfirmo de la mondo al Ĉinio pli da internaciaj aktivadoj okazos en urboj de tiu lando. Ŝi kredas, ke la vojo de la ĉina setlado estos pli kaj pli ebena.