48-jara Hao Fuxia estas reprezentantino de la Tutlanda Popola Kongreso. Ŝia impreso pri situacio antaŭ 30 jaroj estas nur malriĉeco, sed nun ŝi uzis la vorton "mondskua" por priskribi la grandan ŝanĝiĝon okazintan en la pasintaj 30 jaroj. "Reformado ŝanĝis la sorton de 900 milionoj da kamparanoj, kaj ni elkore dankas la 30-jaran reformadon."

En somero de 1978, Hao Fuxia malsukcesis en enira ekzameno de universitato kaj revenis hejmen por sin okupi pri terkulturado. Tiam ŝi kaj ŝiaj 6 gefratoj vivis malfacile.

En la sama jaro oni ekpraktikis la politikon "laŭkontrakta kulturado de tero de kolektivo laŭ familio" post la 3-a Plena Sesio de la 11-a Centra Komitato de la Komunista Partio de Ĉinio. Tio ebligis al multaj kamparanoj komenci novan vivon.

En 1982, Hao kaj ŝia edzo pruntis 3000 juanojn (tiam ĉ. 1.9 juanoj egalas al 1 usona dolaro) por kulturi ginsengojn. Sed pro manko de sperto ili malsukcesis kaj perdis la prunton, kaj tio ankaŭ influis rikolton de aliaj agrikulturaĵoj.

Tiam multaj homoj hezitadis en la nova situacio, sed Hao Fuxia kuraĝe subskribis kontrakton kun loka eksporta kompanio por kulturi cepon. Ĉi-foje ŝi gajnis 1700 juanojn pro sia scienca kulturado.

En 1983 Hao Fuxia aĉetis nigra-blankan televidilon, kaj tiam en la kamparo televidilo estis malofta luksaĵo.

Estas malfacile por antaŭenpuŝi reformadon: De 1982 ĝis 1986, la Centra Komitato de la Komunista Partio de Ĉinio sinskeve publikigis dokumentojn por konfirmi ke "laŭkontrakte kulturi teron de kolektivo" estas ĝusta kaj subtenata, promesis ke oni povas laŭkontrakte kulturi teron minimume 15 jarojn, nuligis la regularon pri limigo de komercado, reformis agrikulturan imposton kaj foj-refoje konfirmis la politikon de kampara reformado.

Tiam Hao Fuxia faris alian aferon kun granda risko laŭ alies opinio: ŝi luis 14 hektarojn da tero por prove kulturi rizon.

En 1986 Hao Fuxia fariĝis unu el la plej riĉaj en sia vilaĝo.

Nun la farmo de Hao Fuxia areas pli ol 66 hektarojn, kaj tie pli ol 5000 familioj sin okupas pri kulturado kaj prilaborado de senpolua organika rizo. Pro tio la kamparanoj povas gajni 600-1200 juanojn pli multe sur ĉiu muo da tero, kaj duobliĝis la enspezo de la kamparanoj (nun ĉ. 7 juanoj = 1 usona dolaro).

En la kuranta jaro, la Centra Komitato de la Komunista Partio de Ĉinio kaj la Ŝtata Konsilantaro kune publikigis la dokumenton por fortigi konstruadon de agrikulturaj bazaj instalaĵoj kaj akceli disvolviĝon de agrikulturo kaj plimultigon de kamparanaj enspezoj.

Hao diris, ke ĉina reformado komenciĝis de la kamparo, kaj oni devas zorgi pri la nova situacio kaj solvi novajn problemojn por antaŭenpuŝi la reformadon de la kamparo kaj agrikulturo, ekzemple, la kampara financo, konstruado de irigaciaj instalaĵoj, edukado de la kamparo kaj masiva uzado de agro ktp.

Hao Fuxia, 4-foje sinsekve elektita reprezentanto de la Tutlanda Popola Kongreso, diris: "Nun pli kaj pli multaj kamparanoj vivas feliĉe, kaj tion oni ŝuldas al la reformado kaj pordomalfermo en la pasintaj 30 jaroj. Nun la kamparanoj vivas pli bone ol antaŭe, kaj ilia enspeza fonto multiĝis. Sed ankoraŭ longan vojon ni havas por altigi kvaliton de agrikulturo kaj disvolvi agrikulturon per scienco kaj teknologio."