Ekspozicio de Nemateriaj Kulturaj Heredaĵoj de Ĉinio

Ekspozicio de Nemateriaj Kulturaj Heredaĵoj de Ĉinio, okazinta en la Agrikultura Ekspoziciejo, Pekino, en duonmonato, estas ekspozicio kun plej kompletaj specoj de tradiciaj teknologioj en la 60 jaroj de post 1949, kiam fondiĝis la Ĉina Popola Respubliko, kaj en ĝi koncentriĝis fruktoj pri protektado de nemateriaj kulturaj heredaĵoj en tiuj jaroj. Ĉeloka demonstrado fare de metiistoj, kaj fotoj kaj tekstoj en la ekspozicio prezentis riĉan enhavon kaj originalan ĉarmon de la ĉinaj nemateriaj heredaĵoj. La ekspozicio altiris al si pli ol 160 000 ĉinajn kaj fremdajn vizitantojn.

La ekspozicio dividas sin en partojn de papertondado, pentrado, presado, argilaĵobako, skulptado, gravurado, te-preparado, branĉo-plektado, trikado, teksado, tinkturado, brodado kaj tradicia medicino. Kun mil-jara historio tiuj tradiciaj metioj hodiaŭ restas ankoraŭ allogaj kaj vivoplenaj. Muntis kaj pentris kajton ĉe sia stando Wei Guoqiu, daŭriganto de Kajto Wei el Tianjin, kaj lia demonstrado forte interesis la vizitantojn.

Altirite de la diversformaj kajtoj, Nimne Mombo, sekretario de ambasadorejo de Verda Kabo en Ĉinio, tenante bambuajn striojn en la manoj, lernas kajtofaradon. Pluraj diplomatoj kun forta intereso spektis la tutan procedon de kajtofarado, iuj el ili eĉ invitis Wei Guoqiu al sia lando instrui kajtofaradon.

S-ro Zheng Changling, respondeculo de la ekspozicio kaj vicdirektoro de Protekta Centro de Nemateriaj Kuluturaj Heredaĵoj de Ĉinio, diris: “Al la ekspozicio aliĝis 1176 metiartistoj kun 2322 valoraj objektoj, kiuj spegulas originalan kaj tradician kulturon de Ĉinio. La ekspozicio riĉigis sciojn de ordinaraj popolanoj pri tiuj metioj, vekis ilian protektokonscion kaj akcelis enmerkatiĝon de tiuj tradiciaj artaĵoj.”

Zhang Bai, vicdirektoro de la Ŝtata Administracio pri Historiaj Restaĵoj de Ĉinio, diris, ke kulturaj restaĵoj dividiĝas en du partojn materiajn kaj nemateriajn. La materiaj kulturaj heredaĵoj konsistas el moveblaj restaĵoj, kiaj objektoj, artaĵoj, dokumentoj, manuskriptoj, libroj kaj materialoj tre gravaj en la historio, kaj nemoveblaj -- historiaj restadejoj, antikvaj tomboj, antikvaj konstruaĵoj, ŝtonkavernoj, temploj, ŝtonaj skulptaĵoj, freskoj kaj aliaj majstraj konstruaĵoj.

Nemateriaj kulturaj heredaĵoj estas tradiciaj formoj, strikte rilataj al vivo de la ordinaraj popolanoj, kiaj popolaj moroj, arta prezentado, tradiciaj scioj kaj metiartoj ktp.

Ĉinio jam faris multon por savi kaj protekti aron da valoraj nemateriaj kulturaj heredaĵoj. En majo de 2006 la Ŝtata Konsilantaro de Ĉinio publikigis liston de la unuaj 518 ŝtat-nivelaj nemateriaj kulturaj heredaĵoj, kaj junie de 2008 la liston de la duaj 510 ŝtat-nivelaj nemateriaj kulturaj heredaĵoj, kaj samtempe 147 programojn aldonajn al la unuaj ŝtat-nivelaj nemateriaj kulturaj heredaĵoj. La registaro helpas ilin finance kaj politike por ilin protekti kaj heredigi. Kaj krom tio Ĉinio lernas sperton de aliaj landoj por plibonigi la protektadon de siaj nemateriaj kulturaj heredaĵoj.