Ye Zijing estas emerita kadro en Zhenjiang, urbo de Jiangsu-provinco. Li naskiĝis en 1933, kaj eklaboris en 1949. Ekde tiam li komencis fari notojn pri sia spezado. Escepte de tiuj, kiuj estis faritaj antaŭ 1966 kaj forbruligitaj, li nun konservas 30 kontolibrojn pri sia spezado kaj du jarajn kategoriajn kontolibrojn de la pasintaj 41 jaroj. La notoj en la kontolibroj estis detalaj, de kelkdek mil juanoj al unu feno (100 fenoj egalas al 1 juano).

En majo 2005 Ye aĉetis komputilon per 5100 juanoj (ĉ. 510 eŭroj) kaj vizitis komputilan kurson en lernejo por maljunuloj. Nun ĉiuj liaj notoj estis enskribitaj en la komputilon.

Enspezo kreskas ĉiujare

Liaj 32 kontolibroj montras, ke la jara enspezo de la familio Ye en 1966 estis 1509.89 juanoj. Tiam, preskaŭ ĉiujare lia familio eltenis deficiton. En 1980 la familio el kvin membroj ŝuldis entute 384.31 juanoj. En 1981 la familio sin liberigis de ŝuldo kaj deponis 130.57 juanojn. Ĝis 1990 la familio ŝparkasis 10678.60 juanojn, kaj en 2000 la sumo superis cent mil juanojn.

Ekde 1981 la vivo de la familio Ye boniĝis pro altiĝo de salajro kaj enspezo de diversaj laboroj. En libera tempo liaj edzino kaj filinoj faris brodadon kaj pasamenton, rompis juglandojn... tial la familia enspezo senĉese kreskis.

La kontolibroj de Ye estas detalaj. Li notis ĉiujn spezojn, eĉ teon, fruktojn kaj ĉiutagajn necesaĵojn donitajn de laborejoj.

Interese, se oni komparas la enspezojn de Ye kaj lia edzino. Antaŭ 1963 la enspezo de Ye estis malpli alta ol tiu de lia edzino. Sed post 1979 grandiĝis la diferenco inter iliaj enspezoj, precipe post kiam Ye akiris la kvalifikitecon de inĝeniero kaj poste tiun de supera inĝeniero. Tio montris, ke de post 1980 la ĉina registaro alte taksis la intelektulojn. Plie malsameco de profesioj decidas la enspezon: Ye laboris en trafika buroo, dum lia edzino en gubernia vesto-fabriko. Nun lia enspezo estas trioble pli alta ol tiu de lia edzino.

Ŝparo pliiĝanta

Ye ĉiam estas kontenta pri la ŝanĝiĝo de la vivo: antaŭ 1980 liaj familianoj manĝis simple kaj mallukse. Sed poste ili povis ĝui pli kaj pli multe da viando kaj fiŝo. Ili komencis trinki lakton kaj preni ginsengon, moruoleon kaj mielon. La elspezo por tonikaĵoj en 1994 estis 492 juanoj kaj en 2003 -- 2654 juanoj.

Menciinte ĉiutagajn necesaĵojn, Ye diris kun rideto: "En la 50-60-aj jaroj de la 20-a jarcento, ni devis ŝpari kelkajn monatojn por aĉeti fonto-plumon, kaj por ordinara brakhorloĝo, ni devis fari ŝparadon kelkjare! Tiam ni longe konsideris antaŭ decido de aĉeto. Sed nun estas male. Ni aĉetas tuj tion, kion ni deziras. En nia hejmo ni posedas du kolorajn televidilojn, unu estas en sidoĉambro kaj la alia en dormoĉambro. Ne mankas al ni fridujo, klimatizilo, elektra marmito, mikroonda bakujo ktp. Kaj du lavmaŝinojn ni havas, unu por multaj vestoj lavotaj kaj la alia por malmultaj."

La familio pagis 971 juanojn por amuzo en 1994, kaj 4868 juanojn en 2003. Ili abonis kvar ĵurnalojn, du gazetojn kaj ĉiutage ili legis du horojn. Pro maljuneco Ye kaj lia edzino ne zorgas mastrumadon kaj taglaboristino venas por fari purigadon.

Ye rakontis pri la sumoj de mondonaco donita al infanoj ĉe la Printempa Festo. En 1967 la sumo estis 0.2 juanoj, en 1979 -- 2 juanoj, en 1991-- 20 juanoj kaj en 2003 -- 200 juanoj. En ĉiu 12-a jaro la sumo dekobliĝas.

Atesto de bonstatiĝo

En 2002 la enketa taĉmento de Zhenjiang-urbo dungis Ye kiel specialan enketanton. Ekde tiam Ye havis du kontolibrojn, unu por si kaj la alia por la taĉmento.

Ye diris, ke la penso de nunaj junuloj estas ege malsama ol tiu de lia generacio. En 2003 li donis al la filino 23 mil juanojn por ŝia aĉeto de loĝejo, tio estis la plej granda elspezo de la familio tiujare. Parolante pri tio, li estis kortuŝita: “Mi kaj miaj generaciuloj elspezas ok juanojn se ni posedas dek juanojn. Sed mia filino prunteprenis de banko 200 mil juanojn por aĉeti loĝejon kaj kvitiĝos en la venontaj 14 jaroj, inkl. de 60 mil juanoj da interezo. Sed ŝi diris, ke ŝi akiros loĝejon pli frue je 14 jaroj, kaj cetere ĝi plivaloriĝos!

La kontolibroj de Ye atestas sociajn ŝanĝiĝojn kaj ekonomian disvolviĝon, montrante evoluon de konsumado. Estas rare, ke oni longe notas la enspezadon de la familio kaj tiom longe konservas la notaĵojn.