Unua paĝo >> Socio >> Vivo de ĉinoj


Internacia hotelo de vilaĝo

de LI JIANHUA

En iu tago de marto 2008, mi iris al la Pekina Ĉefurba Internacia Flughaveno por atendi mian amikon, kaj revenis jam vespere.

La flughaveno situas en antaŭurbo de Pekino, for de la urbobruo. La arboj ambaŭflanke de la vojo jam burĝonis. Subite mi vidis belan konstruaĵon de helflave iluminatan. Tio altiris mian rigardon, do mi decidis iri rigardi ĝin.

La konstruaĵo estas hotelo, la Jiaozhuang-a Internacia Hotelo de Pekino (Jiaozhuang estas la nomo de la vilaĝo). Tio plimirigis min, ĉar tie estas antaŭurba regiono, kaj ĉirkaŭ la regiono vivas ne tre multaj homoj, do kial oni konstruis internacian hotelon? Ĉu tiu hotelo akcelos ekonomian disvolviĝon de tiu regiono? Kiu investis por konstrui ĝin? Ĉu la registaro aŭ la vilaĝanoj? Por havi respondojn, mi decidis iri informiĝi en alia tago.

Prova programo de la vilaĝo demokratie decidita

Iun tagon de la lasta tagdeko de marto, mi eniris en tiun hotelon.

La hotelo estas kvar-stela kun kunvenejoj, restoracioj kaj dormĉambroj.

"La plankareo de la hotelo estas 15 mil kvadrataj metroj, kaj en la fino de la venonta julio kiam la tria parto estos finkonstruita, la areo estos 36 mil kvadrataj metroj," ĝoje diris al mi iu vilaĝano laboranta en tiu hotelo kaj fiero legiĝis sur lia vizaĝo.

El interparolado mi sciis, ke tiu ĉi hotelo estas prova programo de la konstruado de nova kamparo. En la jaro 2006, la ĉina registaro iniciatis konstrui novan socialisman kamparon, kaj ankaŭ la kamparo de Pekino komencis ellabori planon: iuj vilaĝoj planas kompletigi bazajn instalaĵojn por perfektigi subterajn tubojn aŭ konstrui vojojn; aliaj vilaĝoj planas konstrui publikajn instalaĵojn, ekzemple amuzejon aŭ legoĉambron; kaj Jiaozhuang konstruis internacian hotelon.

"Vidu, antaŭ nia hotelo estas elirejo de la dua ekspresa aŭtovojo al la Pekina Ĉefurba Internacia Flughaveno. Post kelka tempo, kiam ĝi ekfunkcios, estos pli facile por ni iri al la flughaveno." Tion diris al mi la laboranto de tiu hotelo.

Parolante pri planado de konstruo de la hotelo, membro de la vilaĝa komitato Zheng Yue'e diris: "Antaŭe la kampoj de nia vilaĝo estis kulturataj de alilokanoj laŭkontrakte kaj ni ne profitis. La komitato konsciis, ke disvolvo de privata ekonomio profitigas nur malgrandan parton de la vilaĝanoj, sed ne la plejparton; se oni ne disvolvas kolektivan ekonomion, estas malfacile riĉigi la tutan vilaĝon."

En la jaro 2007, la komitato sendis esplori la sperton de Huaxi-vilaĝo kaj Nanjie-vilaĝo (ambaŭ estas famaj pro la potenca kolektiva ekonomio). Reveninte ili faris detalan enketon pri la ĉirkaŭaĵo de la vilaĝo kaj trovis, ke ne estas altklasa hotelo oriente de la kvina ringa vojo de Pekino. Post diskutado en la kunveno de reprezentantoj de la vilaĝanoj, la komitato fine decidis konstrui altklasan hotelon, ĉar la Olimpikoj okazos en aŭgusto kaj septembro de 2008 kaj la dua ekspresa aŭtovojo por flughaveno funkcios antaŭ inaŭguro de la Olimpikoj.

Nun en la hotelo laboras pli ol 260 homoj; pro funkcio de la hotelo ĉe la fino de la lasta februaro, pli ol 40 vilaĝanoj de Jiaozhuang akiris laboron. Krome, multaj personoj kun alta klereco venis por peti laboron.

"Nun, nia hotelo jam povas akcepti fremdlandajn gastojn. Dum la prova funkciado, la fremdaj gastoj kontentis pri nia servado. Ni kredas, ke dum la Olimpikoj, pli multaj fremdlandaj gastoj loĝos ĉi tie, ĉar estas tre facile iri de ĉi tie al la sportejoj pro la funkcio de la ekspresa aŭtovojo." Tion diris Zheng Yue'e.

"Konservativa takso montras, ke la jara profito de la hotelo atingos 8-12 milionojn da juanoj (ĉ. 7 juanoj = 1 usona dolaro), tio certe altigos la bonstaton de la vilaĝanoj," diris sinjoro Ma, estro de Jiaozhuang. "Ĝis la fino de la kuranta jaro, la pokapa disponebla kapitalo de nia vilaĝo atingos 20 mil juanojn."

La funkciado de la hotelo rapidigis plibonigadon de la periferia medio. Por krei bonan periferian medion, la vilaĝa komitato decidis malkonstrui kadukajn fabrikdomojn ĉe la hotelo post demokratia diskuto. Surbaze de trafika avantaĝo, la komitato planis turni la sidejon de fabriko en internacian kulturan industrian ĝardenon.

"La kultura industria ĝardeno estos finkonstruita baldaŭ. Tiam oni povos vidi multajn bonajn verkojn de kartono faritajn en tiu ĉi ĝardeno." Tion diris la vilaĝestro Ma.

S-ro Ma diris, ke oni uzis la kolektivan kapitalon de la vilaĝo por konstrui tiun ĉi hotelon, tio signifas, ke oni uzis la monon de ĉiuj vilaĝanoj, tial la uzado de la kapitalo certe devas esti konsentita de la vilaĝanoj en la kunveno de la reprezentantoj de la vilaĝanoj. Por perfektigi la planon, la estroj de la vilaĝo organizis 5 kunvenojn por detale diskuti pri la efektivigebleco kaj la disvolva oriento de Jiaozhuang. Fine la plano estis aprobita.

Oni komencis konstrui la hotelon en marto de 2007. Post provado de ĉiuj instalaĵoj, la hotelo ekfunkcias prove en la lasta januaro.

Kiam mi atingis la hotelon, estis kunvenantaj la reprezentantoj de la vilaĝanoj. Dum kunveno la vilaĝestro Ma detale konigis la planon de la Jiaozhuang-a Internacia Kultura Industria Ĝardeno kaj petis aprobon de la reprezentantoj. Ĉiuj reprezentantoj voĉdonis por tiu plano. Post la voĉdono, pli-ol-70-jara vilaĝanino Chen Guiyun diris al Ma: "Faru laŭ la plano kaj ni subtenas vin!"

Ekonomia disvolvo plibonigas la vivon de la vilaĝanoj

Subtenado de la vilaĝanoj al la politiko de la vilaĝo estas bazita sur kresko de kolektiva ekonomio de la vilaĝo kaj perfektiĝo de la socia garantia sistemo de Ĉinio. Nun viroj de pli ol 60 jaroj kaj virinoj de pli ol 55 jaroj ĝuas pension. En la pasintaj jaroj, kun kresko de vilaĝa kolektiva ekonomio, la sumo de pensio senĉese kreskis. Frue, oni havis monate nur 50 juanojn kiel pension; en 2005, 200 juanojn; en 2006 --- 300 juanojn; en 2007 --- 400 juanojn; de januaro de 2008, oni jam povas havi 500 juanojn kaj de la venonta julio, la sumo estos 700 juanoj. Krome, ankaŭ la pekina registaro donas 200 juanojn po monato al la negarantiataj maljunuloj de pli ol 60 jaroj.

Antaŭe la vilaĝanoj timis malsaniĝi, ĉar ili ne ĝuis medicinan asekuron. Kun konstruado de la socia garantia sistemo de Ĉinio, nun ĉiuj vilaĝanoj de Jiaozhuang ĝuas la kamparan kooperan kuracadon. Ĉiu vilaĝano pagas 80 juanojn po jaro kiel asekurkotizon. Post tio, se ili malsaniĝis kaj estas kuracata en la vilaĝa kuracejo, ili povas esti repagitaj je 55% de la kosto, se en urbeta hospitalo, 45%; se en hospitalo difinita de asekura institucio, 30%.

La vilaĝa komitato ne nur zorgas maljunulojn, sed ankaŭ lernantojn. Ĝi subvencias studentojn en universitatoj je 5000 juanoj; tiujn en kolegioj por profesia trejnado je 3000 juanoj; tiujn en gravaj mezlernejoj je 2000 juanoj. Krome, la vilaĝa komitato donacas al ĉiuj familioj rizon, farunon kaj viandon antaŭ ĉiuj festoj; en la "Maljunula Tago", ricevas de la komitato donacon la maljunuloj de la vilaĝo; somere, la vilaĝanoj senpage ricevas akvomelonon...

La disvolviĝo kaj ŝanĝiĝo de Jiaozhuang nur estas faceto de disvolviĝo kaj ŝanĝiĝo de la ĉina kamparo kaj la vivo de la kamparanoj en la pasintaj jaroj. En 2005 ĉina ĉefministro Wen Jiabao diris en sia registara laborraporto, ke lokoj kun la kondiĉoj povas prove starigi la sistemon de minimuma vivgarantio. En 2006, 15.09 milionoj da kamparanoj ĝuis la minimuman vivgarantion. La laborraporto de la ĉina registaro de la jaro 2007 postulis, ke en la tuta lando establiĝu la sistemo de kampara minimuma vivgarantio, tiel ke pli ol 34 milionoj da kamparanoj ĝuas la financan garantion. Krome, ankaŭ reformado de kampara kuracada garantio progresis multe. En 2006 la provado de la novtipa kampara koopera kuracado kovris 50.7% da gubernioj de la tuta lando, en 2007 -- 86%, kaj la nombro de kamparanoj, kiuj aliĝis al la koopera kuracado grandiĝis de 410 milionoj al 730 milionoj. La novtipa koopera kuracado estos disvastigata la tuta lando ĉi-jare. La raporto de ĉina ĉefministro Wen Jiabao informis, ke en 2009 ĉiuj ĉinaj kamparanoj povos ĝui la bazan socian garantion kaj kamparan kooperan kuracadon kiel tiuj de Jiaozhuang, kaj ĉiuj maljunulaj kamparanoj en la konforma kategorio ricevos pension.