Nova domo de malriĉa Li Wencai

Marte la suno milde karesas Pekinon, tamen la temperaturo restas malalta ĉe la vento. Maljunulo Li Wencai kaj liaj familianoj ĝuas varmecon en sia nova loĝejo.

La 29-an de decembro, 2007, 66-jara Li Wencai, liaj edzino kaj du infanoj enloĝiĝis en novan loĝejon varman kaj helan. Por solvi la problemon de loĝ-malfaciloj de malriĉaj urbanoj, la ĉina registaro investis gigantan sumon. Diversnivelaj registaroj konstruigas domojn kaj ludonas ilin je tre malalta prezo al tiuj, kiuj loĝas en malgranda spaco kaj ne kapablas aĉeti loĝdomon. La familio Li fariĝis la unua favorato de tiu ĉi politiko praktikata en Fengtai-distrikto de Pekino.

La loĝejo plilarĝigita de 13 kvadrataj metroj al 55.45

Li Wencai kaj liaj familianoj antaŭe loĝis en la spaco de 13 kvadrataj metroj. La ĉambro estis malhela kaj malvarma. Lia edzino suferas gravan mensmalsanon kaj ne povas sin prizorgi en la ĉiutaga vivo. Antaŭ kelkaj jaroj ŝi estis trafita de diabeto kaj perdis la vidadon de unu okulo. Iliaj du infanoj estas lernantoj de mezlernejo. La familio vivas tre malfacile kaj sin vivtenas tute de la registara subvencio.

Decembre de 2007 Pekino komencis liveri ludomojn je tre malalta prezo al familioj kun malfaciloj, la familio de Li Wencai kaj aliaj 35 familioj enloĝiĝis en la loĝkvartalon Sanhuan Xincheng, sudokcidente de la Tria Ringvojo de Pekino.

La loĝkvartalo konsistas ĉefe el malmultekostaj loĝdomoj kun kompleto da servaj instalaĵoj. Tie estas supermerkato, fruktobutiko, legombazaro kaj hospitalo. Najbare de la Tria Ringvojo, la tiea trafiko estas facila.

La nova loĝejo de la familio Li areas 55.45 kvadratajn metrojn. La unuĉambra apartamento kun la fenestroj rigardantaj al la sudo estas varma. Kiam ni vizitis la domon, Li televidis raportadon pri la sesio de la Tutlanda Popola Kongreso de Ĉinio kaj tiu de la Ĉina Popola Politika Interkonsiliĝa Konferenco, kaj lia edzino trankvile kuŝis en la lito. Li diris al ni, ke la sanstato de lia edzino multe pliboniĝis en la nova loĝejo.

La mebloj estas donacitaj de varmkoraj homoj

“Tiuj ĉi estas donacitaj de loĝkvartala oficejo,” maljunulo Li diris al ni, montrante la meblaron, “La liton kaj televidilan ŝrankon ni ricevis de la loĝkvartalo Dahongmen, kie ni loĝis antaŭe, la litkovrilon el lanugo donacis al ni la oficejo de la loĝkvartalo Sanhuan Xincheng ĉe la Printempa Festo, la fulgoelsuĉilo kaj klimatizilo estas donacitaj de varmkoraj aliĝintoj de la aktivado organizita de la Leĝa Vesperĵurnalo por helpi malriĉulojn, kaj la vestoŝranko estas donaco de iu meblovendejo...”

Konsiderinte la ekonomian malfacilon de la loĝdomaj luprenantoj, la konstrua komisiono asignis monon por simpla ornamado al la loĝdomoj. La oficejo de la loĝkvartalo instaligis gardrelon al la fenestropordo kontraŭ eventuala akcidento de la malsana edzino. Li diris, ke la distrikto, loĝkvartalo kaj najbaroj multe zorgas pri ili.

80 juanoj por la monata lupago

Multaj familioj, kiuj sin vivtenas per registara subvencio, ankoraŭ ne povas enloĝiĝi en tiajn domojn, tamen Li Wencai kaj liaj familianoj estas feliĉaj. La familio ĉiumonate ricevas subvencion de pli ol 1700 juanoj, kaj ankaŭ la du infanoj ĝuas edukan subvencion. Por ilia memhejtado vintre, la registaro laŭkalkule liveras al ĉiu familio de la ludomo subvencion, po 30 juanojn por ĉiu kvadrata metro.

Tian Guobao, estro de la oficejo de Fengtai-distrikto pri loĝsekureco, konigis, ke la familioj, kiuj la unuaj ĝuas la ludomon, devas esti konformaj al la postulataj kondiĉoj, kaj krom tio ĉi-rilate ili favoras al la familioj, kiuj havas pli-ol-60-jaran membron, handikapulon kun grava kripleco kaj malsanulon de serioza malsano, kaj loĝis en kaduka domo. Laŭ koncerna difino tiuj loĝantoj ĉiumonate pagas nur 5%de ilia monata enspezo kaj la familio de Li nur 80 juanojn por la apartamento.

Pro nesufiĉo de ludomoj la registaro liveras subvencion al la familioj, kiuj havas malfacilojn en domluado kaj portempe ankoraŭ ne enloĝiĝis en la ludomon. Laŭ difino de la registaro ĉiu membro de tiaj familioj ricevas 400 juanojn ĉiumonate laŭ la jena normo: po 10 kvadrataj metroj por ĉiu homo kaj ĉiu kvadrata metro kontraŭ 40 juanoj. Ordinara familio kun tri membroj povas ricevi subvencion je 1200 juanoj ĉiumonate. Tian diris al ni, ke fine de februaro de 2009 la subvencion ĝuas 1658 familioj sole en Fengtai-distrikto.

Laŭ la Ministerio de Konstruado, 2009 estas ŝlosila jaro por rapidigi konstruadon de loĝdomoj. Nun estas du manieroj por solvi malfacilojn de loĝado al 2.6 milionoj da urbaj familioj kun malalta enspezo: liveri ludomojn je malalta prezo kaj doni subvencion por la lupago. Surbaze de tio en la venontaj du jaroj la registaro solvos la malfacilon de loĝado al 4.87 milionoj da urbaj familioj kun malalta enspezo. En 2011 estos fundamente solvita la malfacilo de loĝado de 7.47 milionoj da familioj en urboj de la tuta lando. Estas kredeble, ke en la proksima estonteco pli kaj pli da familioj kun malalta enspezo enloĝiĝos en brilan kaj varman domon.