Por ĉinoj tetrinkado estas tre ŝatata maniero por sin malstreĉi, same kiel kafo por okcidentanoj. En Ĉinio tetrinkejo funkcias ankaŭ kiel amuzejo. Ĉinio havas tekulturon kaj por infuzado, malsamspeca teo postulas konformajn akvon kaj servicon. Ankaŭ tetrinkejoj estas klasifikitaj laŭ ilia funkcio.

Laŭ malsamaj karakterizaĵoj kaj funkcioj, la pekinaj tetrinkejoj estas dividitaj en la jenajn stilojn: Tia, kie oni trinkas teon, manĝas kaj babilas; tia, kie oni aŭskultas rakontadon prezentatan de popola artisto, trinkante teon; tia, kie oni liveras teon per speciala ĉina tetaso kun kovrilo; tia, kie oni aprecas teceremonion.

En moderna vivo, al tradiciaj tetrinkejoj aldoniĝis modernaj elementoj. Ni iru al Laoshe-tetrinkejo por ĝui aroman teon.

La tetrinkejo estas multfunkcia. Ĝi distingiĝas per siaj arkitekturo, dekorado kaj meblaro. Ambaŭflanke de ĝia pordo pendas longaj kaj ruĝaj rubandoj, sur kiuj legiĝas kupleto, kaj ĝiaj eksteraj muroj kun trajtoj de antikva popola loĝejo de Pekino. En ĝi, ĉie regas antikveco kaj eleganteco, ekzemple lignaj fenestroj, kaligrafaĵoj kaj pentraĵoj, palacaj lanternoj, grandaj tekruĉoj kun draka kapo kaj feniksa vosto. Tie la servistoj en blua vesto salutas gastojn en pekina prononco.

"Multaj homoj ŝatas la dekoradon kun pekina karaktero, tamen tio, kio vere altiras ilin, estas la pekina kulturo," diris s-ino Yin Zhijun, duageneracia mastro de la tetrinkejo. Antaŭ la 8-a vespere la tetrinkejo jam estas plena de gastoj, eĉ en postsezonoj la okupiteco de la sidlokoj estas 80-90%. Multaj rezervas tie sidlokojn.

Tie tetrinkado estas ĝuo de kulturo. Influzante teon, servistoj konigas sciojn pri teinfuzado al la gastoj. "Vitra glaso estas uzata por verda teo, ĉar oni povas rigardi naĝadon de la tefolioj; tetaso kun kovrilo estas uzata por jasmena teo. Oni tenas la pleton, formovas tefoliojn per la kovrilo kaj poste metas la kovrilon sur la tason lasante fendon por dekanti; servico de kungfu-teo estas destinita por Tieguanyin-teo (duofermentigita teo). Por konservi la naturecon de teo, la tetrinkejo infuzas teon per akvo filtrita.

Ne mankas kolazionoj krom bonkvalitaj teo kaj akvo. Tie la gastoj povas gustumi pli ol 20 specojn da kortegaj kukoj kaj kolazionoj.

Laoshe-tetrinkejo karakteriziĝas pro la tradicia kulturo, kombinante la kulturojn de Pekino, teo, etmanĝaĵoj kaj teatroj. Prezentado de naciaj teatraĵoj estas alia karakterizaĵo. Posttagmeze ĉe la tablo gastoj, spektante la prezentadon, trinkas teon kaj manĝas melonsemojn kaj arakidojn, kvazaŭ en teatro en malnova tempo. Aktoroj ludas akompanate de muziko; en partero fanoj kantetas samtakte kun la aktoroj. Krome tie okazas ankaŭ teceremonio pri diversaspeca teo.

Post la malfermo la tetrinkejo akceptis ĉ. 50 ŝtatajn gvidantojn fremdlandajn, multajn famulojn kaj 2 milionojn da turistoj en- kaj eksterlandaj. Ĝi jam fariĝis "fenestro" por popularigi nacian kulturon kaj "ponto" kunliganta en- kaj eksterlandan amikecon.

Konataj pekinaj tetrinkejoj:

Laoshe-tetrinkejo

Adr.: 3-a etaĝo de n-ro 3 de Qianmen Xidajie, Xuanwu-distrikto, Pekino

Tel.: 010-62186060

Retejo: www.laosheteahouse.com

Wuyutai-tetrinkejo

Adr.: n-ro 44 de Dongsi Beidajie, Dongcheng-distrikto, Pekino

Tel.: 010-84030547

Laijinyuxuan-tetrinkejo

Adr.: en Zhongshan-parko, okcidente de Tian'anmen-pordego, Pekino

Tel.: 010-66056676

Boguan-tetrinkejo

Adr.: 6-a etaĝo de Jiangong-domo A, n-ro 1 sur Guanglian-strato, Xuanwu-distrikto, Pekino

Tel.: 010-63929888

Penglaixianjing-tetrinkejo

Adr.: 100 metrojn oriente de Taiyanggong-ponto, Donglu de la norda Tria Ringa Ŝoseo, Chaoyang-distrikto, Pekino

Tel.: 010-64481803