|
Bone nin preparu por sukceso!
de LAŬLUM
|
|
Saluton, karaj gesamideanoj,
Ĉu cis aŭ trans la bluaj oceanoj! |
Mi sendas al vi korajn bondezirojn
Je pretigad’ de viaj novaj planoj. |
|
Forpasis jam jarkvino de l’ jarcento.
Kion rikoltis via diligento? |
Komenco bona, laboro duona!
Retrorigard’ utilas ĉe l’ momento. |
|
Milmiloj kredas ke l’ lingvoproblemo
Solveblas per la interpret-sistemo |
De nacilingvoj, ekzemple la angla --
Aerkastelo estas la kredemo! |
|
Lingva hegemonio, en naturo,
Kaŭzas pereon de etnaj kulturoj, |
Ĉar ĝi sufokas, murdas etnajn lingvojn,
Detruas etnkulturojn sen mezuro... |
|
Bunteco de l’ kulturoj ja tre gravas,
Atenco al ĝi do neniom pravas... |
Ni devas firme stari kontraŭ tio,
Nur se prudenton ni ankoraŭ havas. |
|
Por kultur-savo ĉiu batalanto
Persiste pledu do por Esperanto, |
Neŭtrala lingvo, kaj por l’ egaleco
De l’ lingvoj estu vera defendanto. |
|
Saluton, karaj gesamideanoj,
Ĉu cis aŭ trans la bluaj oceanoj! |
Mi sendas al vi korajn bondezirojn
Je pretigad’ de viaj novaj planoj. |
|
Kun bona laborplano en neceso,
Obstine ni klopodu plu sen ĉeso! |
Je komenciĝo de la nova jaro,
Bone nin preparu por sukceso! |
|
|