Niujie de Xuanwu-distrikto en suda Pekino estas unu el la loĝkvartaloj kun la plej densaj naciaj trajtoj en la urbo. La tieaj konstruaĵoj estas en la koloroj blanka kaj verda, kaj sur la strataj indikiloj legiĝas vortoj en la ĉina kaj araba lingvo. Tie vivas pli ol 54 mil loĝantoj de pli ol 20 nacioj, inter kiuj troviĝas 12 mil huj-oj. Niujie estas la plej granda kvartalo koncentre loĝata de huj-oj en Pekino. Huj-naciano Wang Changhe, kiu vivas en Niujie jam dekojn da jaroj, persone spertis la tieajn ŝanĝiĝojn.

"Estas agrable por mi vidi la ŝanĝiĝon de la moskeo"

Je la 5-a matene, 77-jara Wang ellitiĝis. Post tualetado, li vestis la kapon per blanka ĉapeto, forlasis la hejmon kaj iris al la Niujie-a Moskeo 100 metrojn for de lia loĝdomo.

La moskeo estis ekkonstruita en 996. Ĝi, kiel la plej granda moskeo en Pekino, estas centro de Niujie kaj ĉefa preĝejo de huj-oj de la urbo. Ĝi povas samtempe servi al pli ol 1000 preĝantoj. Ĝia konstruaĵo havas stilon de antikva ĉina palaco en kombino kun tiu de araba moskeo.

Tiam ankoraŭ ne estis multaj homoj en la moskeo. Post nelonge malnovaj najbaroj de Wang venis unu post aliaj. Same kiel li, ili venis por matena preĝado, kiu komenciĝas je la 6-a. Ĉiutage pli ol 200 loĝantoj en Niujie venas por preĝi, kaj pli multaj estas preĝantoj vendrede, kiam estas la islama festtago.

"Lastjare la registaro investis pli ol 20 milionojn da juanoj (7.8 juanoj = 1 usona dolaro) por ripari la moskeon. Tio estas la kvarfoja kaj plej grandskala riparado," diris Wang. Kiel membro de administra komitato de la Niujie-a Moskeo, Wang ĉiutage venis al la moskeo por rigardi la laboron. Nun la areo de la moskeo grandiĝis de 4.7 mil kvadrataj metroj al 10 mil; oni konstruis banejon; ekipis ĝin per natura gaso; instalis 50-kilovattan transformatoron; malkonstruis neoriginalajn domojn kaj renovigis preĝejon por virinoj. Dum la riparado, la registaro starigis portempan preĝejon en la kvartalo kaj preĝado ne ĉesis eĉ unufoje. "Estas agrable por mi vidi la ŝanĝiĝon de la moskeo."

En Niujie la religia agado estas respektata. Okaze de gravaj festoj, diversnivelaj registaroj bone organizas kaj subtenas la religiajn agadojn. En la festo de fasto trafika kontrolado estas praktikita por garantii sekurecon kaj pacon dum religiaj aktivadoj.

"Unuafoja pilgrimado al Mekko per ĉartita aviadilo"

Antaŭe por pilgrimi al Mekko ĉinoj vojaĝis malfacile. Nun por faciligi la vojaĝon la ĉina registaro organizas ĉiujare pilgrimantajn grupojn kaj transportas ilin de Pekino al Saudo-Arabio per ĉartita aviadilo. La tuta vojaĝo bezonas pli ol dek horojn, kaj la grupo estas akompanata de arablingva interpretisto kaj kuracisto.

Wang bone memoras sian vojaĝon al Mekko: "En la fino de 2004 du imamoj kaj kvin islamanoj de Niujie kun tiuj el aliaj lokoj de Ĉinio flugis al Jeddah per ĉartita aviadilo. Kaj poste ni aŭte veturis al Mekko. La tuta vojaĝo daŭris ok tagojn kaj ni zorgis pri nenio, ĉar la registaro bone aranĝis ĉion por ni."

Wang fieras, ke li povas fari tiun pilgrimadon en sia granda aĝo. Li diris: "Estas la unua fojo por mi fari pilgrimadon al Mekko per ĉartita aviadilo. Antaŭe pro malriĉeco mi ne havis monon por la pilgrimado. Nun mia vivo pliboniĝis kaj mi akumulis iom da mono, kaj min monhelpis miaj gefiloj. Plenumi pilgrimadon al Mekko estas mia plej granda deziro. Mi tre ĝojas kaj dankas Alahon!"

"Miaj antaŭuloj neniam loĝis en etaĝdomo, sed mi tion ĝuas"

Wang estas malnova loĝanto de Niujie. Pasinte lia 7-membra familio loĝis en du malgrandaj ĉambroj. Nun li kaj lia edzino loĝas en hela apartamento el du ĉambroj kaj unu salono kun plankareo de 60 kvadrataj metroj en iu etaĝdomo de tiu strato. En la salono troviĝas ruĝlignaj mebloj, fridujo kaj kolora televido. Sur la muro pendiĝas orumita metiartaĵo de Mekko kaj kaligrafaĵo pri Korano en la araba lingvo. 7-8 citrofiloj krias en kaĝoj sur radiatoro.

"Ĉiuj miaj kvin gefiloj laboras kaj la plejaĝa filo loĝas en najbara apartamento. Ili ofte venas vidi nin," diris feliĉe la maljunulo. "ankaŭ miaj najbaroj en la sama domo estas ege amikaj. Ili de kelkaj nacioj vivas kiel en unu granda familio. Kvankam foje okazas konfliktoj inter la najbaroj, tamen ili facile solviĝas. Se iu familio havas malfacilon, aliaj donas helpon." La maljunulo estas kontenta pri la nuna vivo. Li diris: "Miaj antaŭuloj neniam loĝis en etaĝdomo, sed mi tion ĝuas."

Krom la supre menciitaj ŝanĝiĝoj de Niujie ekde 1997 startis tie grandskala rekonstruado kaj vojkonstruado. Finkonstruiĝis vojo 40 metrojn larĝa, kaj 20 etaĝdomoj, kiuj formis novan plansetlejon belan en medio kaj oportunan por la vivo. La loka registaro konstruis tie kvartalan placon, la plej grandan en Pekino, establis kvartalan kuracejon, bibliotekon kaj ĉambron por popularigo de sciencoj; la kvartala servocentro kun areo de 3000 kvadrataj metroj baldaŭ funkcios; maljunulejo kun areo de 2000 kvadrataj metroj estas en konstruado. La islamaj superbazaro kaj hospitalo multe faciligas la vivon de la tiea loĝantaro. Tie kolektiĝas multaj vendejoj pri huj-aj manĝaĵoj, kostumoj kaj metiartaĵoj kaj servas famaj huj-naciaj restoracio kaj elementa lernejo por huj-aj geknaboj.

La vivo de maljuna Wang estas miniaturo de la vivo de diversnaciaj popolanoj en Niujie. En Ĉinio religiaj kredoj kaj vivmanieroj de nacimalplimultoj estas plene respektataj. Kredeble, maljuna Wang kaj aliaj nacimalplimultanoj vivos pli kaj pli feliĉe.