Dancistino Yang Liping

Spekti dancadon de Yang Liping estas ĝuo. Ŝia sol-danco estas flua kaj unika.

Ĉiuj kiuj rigardis ŝian prezentadon senescepte estis revitaj de ŝiaj dancoj. Oni nomas sorĉistino tiun dancistinon, kiu venas el montaro kaj lerte esprimas sin per membroj. Spektantoj de Taiwan kaj sudorienta Azio eĉ nomas ŝin diino de danco. Ŝi kvazaŭ mistera sendito de la naturo komunikas ritmon de la vivo per graciaj dancoj.

De knabineco ŝi estis pasia al danco, sed neniam vizitis iun ajn dancan lernejon. En la jaro 1971 ŝi eniris en la Kantodancan Trupon de la Xishuangbanna-a Subprovinco de Yunnan. En 1986 ŝi famiĝis pro la de ŝi kreita kaj prezentita sol-danco "Spirito de Pavo". Ŝi estas la unua juna ĉina dancistino, kiu okazigis individuan dancan vesperon en la lando. En la pasintaj jaroj ŝi vizitis Filipinojn, Singapuron, Rusion, Usonon, Kanadon, Japanion kaj aliajn landojn kaj regionojn kaj okazigis tie sol-dancan vesperon. La filmo "Suna Birdo" de ŝi kreita, reĝisorita kaj ludita gajnis premion en la Montreala Internacia Filma Festivalo.

Danco jam kuniĝis kun la vivo de Yang. La naturo inspiras ŝin kaj unika stilo formiĝis en ŝia dancado. La plej granda sukceso de ŝia dancado estas, ke ŝi transformis la originan kaj moviĝan dancarton en la kvietan. La naturo kaj reala vivo karakterizas ŝian dancan stilon, ĉar la naturo estas la plej bela, reala kaj profunda. Ŝi klopodas por esprimi la plej belan sonĝon de la homaro per sia simpla kaj modesta danclingvo.

En Januaro de 1999, la plej malbona sezono de Tibeto, Yang venis al Lhasa por sperti la vivon tie kaj krei verkon. En Jokhang-templo la suno verŝis tra la tegmento sian lumon sur freskojn kaj malrapide moviĝis. Subite la okuloj de Yang ekbrilis, kaj ŝi turnis sin kaj ekdancis sub la sunlumo. Ĉiufoje Yang ripetas sian dancon sur sceno, sed ĉiufoje la danco malsamas, ĉar ĉiufoje la danco reaperigas la vivon kaj revivigas arton.

"Bildo de Yunnan"

Antaŭ ol spekti ŝian dancon "Bildo de Yunnan", mi ne povas imagi, ke tiu protoarto povas tiel perfekte montriĝi surscene. Ĝi estas kolekto de primitivaj kantoj kaj dancoj sen intrigoj. Dekoj da dancistoj el montaraj vilaĝoj de Yunnan prezentis per simplaj kantoj kaj dancoj laboremon, honestecon, simplan vivon kaj virgan amon de ji-oj, mjaŭ-oj, tibetanoj, taj-oj kaj baj-oj de Yunnan.

La dancado daŭras 120 minutojn. Ĝi, el kvin aktoj, nome "Suno", "Tero", "Hejmloko", "Oferfajro" kaj "Pilgrimado", estas nove kreita kaj rara kant-danco de nacimalplimultoj, unuigante tradicion kaj modernecon.

70% de ĝiaj aktoroj venas el popolanoj de Yunnan kaj plejparte estas kamparanoj talentaj en dancado pro la danc-geno en ilia sango. Per superbaj dancoj ili montras la naturecon, sanecon kaj viglecon de la vivo. Sur ilia vizaĝo brilas sincera rido kaj legiĝas amo al danco, tio konigas al spektantoj, ke kanto kaj danco estas parto de ilia vivo.

Yang Liping kaj ŝia "Bildo de Yunnan"

Yang Liping estas ĉefaktorino de "Bildo de Yunnan" kaj ĝia ĝenerala direktorino. Kiel dancistino, Yang ĉiam prenas dancojn de la nacimalplimultoj en Yunnan kiel nutraĵon de sia verkado. Antaŭ kelkaj jaroj, kiam ŝi vizitis sian hejmlokon por kolekti popoldancojn, subite venis al ŝi la ideo, ke ŝi malkovros kaj ordigos tradiciajn dancojn de la nacimalplimultoj en Yunnan. La impulso venas el tio, ke multaj dancformoj de la nacimalplimultoj apenaŭ pereos. Ŝi ne povas teni sin senfara vidinte la valoran tradician arton perdiĝi antaŭ ŝiaj okuloj.

Kun helpo de kolegoj, Yang kaj la kreinto de la poema danco, vizitadis vilaĝojn en Yunnan pli ol du jarojn, rigardis sennombrajn tradiciajn dancojn, eltrovis multajn viviplenajn, sed ekstere nekonatajn dancformojn, kaj ensorbis la plej brilajn movojn en siajn dancojn. Por Yang, la ĉarmo de la nacimalplimultaj dancoj troviĝas en iliaj natureco kaj simpleco. Tial dum la kreado de la danco "Bildo de Yunnan", ŝi ne nur konservis la kernon de la dancoj, sed ankaŭ donis grandan atenton al ĉiuj detaloj, inkluzive de muziko, kostumo, lampo kaj rekvizito.

La danco "Bildo de Yunnan" prezentis 200 fojojn tra Ĉinio kaj kreis plejojn pri nombro de la ludantoj, longeco de la prezentado, multeco de spektantoj kaj bona profito. Ĝi gajnis plurajn premiojn de la lotusa premio, la plej alta premio de dancoj de Ĉinio. La danco "Bildo de Yunan" prezentiĝis ankaŭ en Brazilo, Argentino kaj aliaj landoj.

Biografieto de Yang Liping:

Yang Liping, bajo de Dali, Yunnan-provinco. Ŝiaj ĉefaj verkoj: "Spirito de Pavo", "Lunlumo", "Du Arboj", "Gaqiqi", "Ĉomolangma", "Fajro", "Lhasa-rivero", "Ruĝa Logo", "Virina Lando".

Scenaj fotoj:

Du Arboj	Lunlumo