Antaŭ 14 jaroj s-ro Takami Kunio komencis arboplantadon en Hunyuan-gubernio de Datong-regiono de Shanxi-provinco sur la Loesa Altebenaĵo ĉe la meza baseno de la Flava Rivero. Ĉiujare li plantas arbojn en printempo kaj somero kaj en la cetera tempo li kolektas monon en sia hejmlando. Li persistas en tiu laboro jam 14 jarojn.

S-ro Takami Kunio estas malalta, sunbruna kun la haroj iomete senordaj. Se li ne portas okulvitrojn, li estas facile misprenata kiel loka kamparano pli-ol-50-jara.

En 1971 s-ro Takami Kunio kiel membro de delegacio por amikeco inter Ĉinio kaj Japanio unuafoje vizitis Ĉinion kaj poste kelkfoje vizitis Ĉinion. En januaro de 1992 li kaj liaj kolegoj refoje venis al Ĉinio kun espero planti arbojn en Ĉinio. La Ĉina Tutlanda Junulara Unio elektis Hunyuan-gubernion de Datong kiel lokon por ilia arboplantado. En la plantado li partoprenis en fondo de neprofita internacia neregistara organizo — Verda Tera Reto kaj funkciis kiel respondeculo de Datong-branĉo de la organizo. La organizo deziras transliman mediprotektadon de ĉiuj popoloj de la mondo.

Ĉe la komenco s-ro Takami Kunio ne estis bonvena al Hunyuan-gubernio. Pro la krimo de japanaj agresantoj al Ĉinio en la Dua Mondmilito, la lokanoj dubis lian motivon de arboplantado. Sed s-ro Takami Kunio neniom deprimiĝis. Li kredis, ke se li persiste kaj senplende laboros ŝultro-ĉe-ŝultre kun ili, li certe estos fidata de lokanoj. Iom post iom la lokanoj forĵetis la dubon kaj amikiĝis al li.

Hunyuan-gubernio situas sur la Loesa Altebenaĵo, kie regas trosekeco kaj sabla ventego kaj estas malfacile kreskigi arbojn.

Pri plantado s-ro Takami Kunio ne havas sperton, tamen li venigis fakulojn pri botaniko, hidrologio kaj grundologio. Ili profunde esploris la lokan klimaton kaj grundon kaj elektis taŭgajn specojn kaj plantan metodon.

En la 14 jaroj s-ro Takami Kunio invitis pli ol 2000 japanojn mempage veni al la loko por planti arbojn. En 7 gubernioj sub Datong ili plantis pli ol 16 milionojn da arboj en areo de 4500 hektaroj, kaj mondonacis entute 20 milionojn da juanoj (ĉ. 8 juanoj = 1 usona dolaro). Pro la kontribuo de s-ro Takami Kunio en plibonigo de natura medio de Ĉinio, la ĉina registaro honoris lin per "Premio de Ŝtata Amikeco", kaj la Ĉina Tutlanda Junulara Unio kaj la registaro de Datong honoris lin per "Premio por verdigi Medion". En aŭgusto de 2006 la registaro de Datong honoris lin per la titolo "Honora Civitano de Datong".

Por maksimume profiti de plibonigo de medio, s-ro Takami Kunio kaj liaj amikoj plantis krompoplojn kaj soforojn ankaŭ abrikotajn, persikajn kaj aliaj fruktarbojn. Tio ne nur protektas la medion, sed ankaŭ profitigas la lokanojn.

Dum arbokulturado s-ro Takami Kunio kaj liaj amikoj ankaŭ subtenis lokan edukan aferon. En la pasintaj jaroj ili starigis 4 elementajn lernejojn kun titolo "La Espero". Profito de arbokulturado estas uzata parte por flegado de arboj kaj parte por spezado de la elementaj lernejoj. Nun krom arbokulturado li zorgas ankaŭ pri protektado de akvoresurso.

En la 14 jaroj s-ro Takami Kunio dissemis verdan koloron sur la Loesa Altebenaĵo, kaj riĉe rikoltis amikecon de la kamparanoj. La lokanoj jam antaŭlonge ŝanĝis sian opinion pri li, kaj familiare nomas lin "Takaĉjo". Ĉe renkontiĝo ili intersalutas kiel malnovaj amikoj. Ĉe arbaro plantita de s-ro Takami Kunio kaj liaj amikoj la lokanoj starigis ŝtonan monumenton, sur kiu estas gravuritaj la vortoj "Ne forgesu putofarinton trinkante akvon".