Sunenergio, kiel unika reproduktebla energio nelimigita de geografia cirkonstanco kaj neniam elĉerpebla kaj finuzebla, estas pli kaj pli vaste uzata de la homaro kiel fuelo. Pro tio la fotovolta industrio (per rilata tekniko oni transformas sunenergion en elektroenergion) estas nomita industrio nezorganta pri vendado, kaj dank' al tio ĉinaj entreprenoj de sunenergio rapide disvolviĝas. En 2005 la jara produktokapablo de ĉinaj fotovoltaj entreprenoj superis 400 bilionojn da vatoj, kaj pli ol 300 bilionojn da vatoj atingis tiu de jenaj tri ĉefaj entreprenoj: Sun-elektra Limigita Kompanio Suntech en Wuxi, Limigita Kompanio Tianwei-Yingli de Nova Energio en Baoding kaj Limigita Kompanio PV-Tech en Nankino.

Fotovolta industrio rapide disvolviĝas

Antaŭ la 14-a de decembro 2005, Shi Zhengrong ne estis fama persono. Tamen ekde kiam la Sun-elektra Limigita Kompanio Suntech fariĝis la unua neŝtata altscienc-teknologia entrepreno en landinterno de Ĉinio, kiu iris al borso de Nov-Jorko, li kiel ĝia prezidanto kaj ĉefa administra oficisto estis konata de multaj homoj.

Antaŭ ol funkcii kiel mastro de la kompanio, li estis sciencisto akirinta pli ol 10 internaciajn patentojn de fotovolta teknologio. En 1988, li lernis en la Universitato Nova Sud-Wales en Aŭstralio kaj studis ĉe profesoro Martyn Green, aŭtoritatulo pri sunenergia baterio kaj premiito de Nobelo. En 1991 li akiris doktorecon pri teknologio de sunenergia baterio. En 2001 li revenis al Ĉinio kaj, kune kun aliaj 7 akciuloj, fondis en Wuxi la Sun-elektran Limigitan Kompanion Suntech ĉefe por studado, fabrikado kaj vendado de sunenergia baterio, bateriaj pecoj kaj sistema inĝenierio de produkto de fotovolta elektro. En septembro de 2002 ĝi havis la unuan laborĉenon de sunenergia baterio kun la jara produktokapablo de 10 bilionoj da vatoj kaj nun la jara produktokapablo de la kompanio atingis 150 bilionojn da vatoj.

Ankaŭ la Limigita Kompanio Tianwei-Yingli de Nova Energio en Baoding de Hebei-provinco estas granda entrepreno de sunenergiaj ekipaĵoj. En la lastaj jaroj ĝi aktive partoprenis en la konstruado de sunenergiaj elektrejoj, telekomunikado, trafiko kaj urbanizado de Ĉinio, kaj ankaŭ en internacia konstruado de grandaj enretigitaj kaj solaj elektrejoj, en tiu de fotovoltaj tegmentoj, kaj ĉefe en ekspluatado de utiliga sistemo de fotovolto.

La konstruado de laborejo de la tria-perioda programo de la kompanio, kun areo de 30 hektaroj kaj investo de 3 miliardoj da juanoj (ĉ. 8 juanoj = 1 usona dolaro), komenciĝis en aprilo de 2006 kaj finiĝos en 2008. Tiam la kompanio havos produktan bazon kun jara produktokapablo de 500 bilionoj da vatoj, esploran centron de kristala silico de sunenergia baterio, esploran centron de fotovolta sistemo kaj kulturan centron de fakuloj.

En la 1-a de decembro 2005, John Manzoni, administra direktoro de la brita grupo BP, kaj Zhang Xin, prezidanto de la Xinjiang-a Limigita Kompanio de Nova Energio, kune anoncis, ke la du flankoj fondos en Ĉinio entreprenon kune investitan por produktado kaj vendado de fotovoltaj produktaĵoj kaj sistemoj. Ekde la 1990-aj jaroj la grupo BP kaj ĉinaj partneroj partoprenis en multaj grandaj sunenergiaj programoj, ludante gravan rolon en projektado kaj liverado de pecoj kaj en konstruado. Ĝi ankaŭ liveris sunenergiajn bateriojn al Tibeto, Xinjiang kaj Sichuan, partoprenis en sistema programo de rezerva sunenergia kurentfonto de signaloj de la Qinghai-Tibeta Fervojo kaj liveris sendependan sunenergian kurentfontan sistemon por telekomunika reta sistemo de nordokcidenta, nordorienta partoj kaj insularo en suda Ĉinio.

Politiko antaŭenpuŝas disvolviĝon de industrio

En novembro de 2005, Zhang Guobao, vicdirektoro de la Ŝtata Komisiono por Disvolvo kaj Reformado de Ĉinio, diris en ministra forumo de la Internacia Konferenco de Reproduktebla Fuelo, ke laŭ "Mez- kaj longtempa disvolva projekto pri reprodukteblaj fueloj", la totala kapacito de sunenergiaj fotovoltaj generatoroj de Ĉinio atingos 500 bilionojn da vatoj en 2010, kaj 2200 bilionojn da vatoj en 2020.

Komence de 2006, Ĉinio oficiale ekpraktikis la "Leĝon pri Reprodukteblaj Fueloj" kaj ellaboris serion da instiga kaj subtena politikoj pri prezo, imposto, merkata porciumo kaj enretiĝo. Tio signifas, ke la ĉina industrio de reproduktebla fuelo eniros en novan disvolvan periodon.

Ĉinio komencis studon pri sunenergia baterio en 1958, kaj unuafoje utiligis ĝin en Satelito Dongfanghong n-ro 2 en 1971 kaj surtere ekde 1973. Fotovolta industrio aperis en Ĉinio en la posta periodo de la 1970-aj jaroj. Dank' al subteno de la ĉina registaro ĝi estas utiligita en mikroonda relajsostacio, telekomunikado de armeo kaj telefona sistemo de la kamparo. En 1995 Ĉinio publikigis "Disvolvan programon pri nova kaj reproduktebla fuelo", kiu klare prezentas disvolvajn celon kaj taskon de Ĉinio de 1996 ĝis 2010, rilatajn politikojn kaj rimedojn. En septembro de 1996, la Monda Pinta Konferenco pri Sunenergio proponis praktiki Fotoelektran Programon en senelektraj regionoj de la mondo. La ĉina registaro rapide reagis, ellaboris kaj praktikis la planon "Ĉina luma programo" cele solvi problemojn de elektrouzado por 23 milionoj da homoj. La plano estis atentata tuj de Eŭropo, Usono kaj Japanio. Multaj landoj, internaciaj organizoj kaj entreprenoj esprimis kunlaboran volon al la Ŝtata Komisiono por Plano de Ĉinio. Kelkaj inter ili jam komencis kunlaboron.

Pli kaj pli multaj lokaj registaroj kaj rilataj fakoj atentas sunenergian fotovoltan industrion. En Tibeto, regiono plejproksima al la Suno kaj kies rezervo de sunenergio troviĝas en la unua loko en Ĉinio, funkcias ĉ. 400 kompaktaj fotovoltaj elektrejoj kun totala kapacito de 8000 kilovatoj. Nun ĉirkaŭ duono da tieaj kamparanaj kaj paŝtistaj familioj uzas sunenergion kaj fotovoltan elektron. Laŭ informo de vicdirektoro de la Komisiono por Disvolvo kaj Reformado de la Tibeta Aŭtonoma Regiono, la reproduktebla fuelo ekspluatata en Tibeto estas nur tre malgranda parto por la tiea reproduktebla fuelo.

Laŭ la "Plano pri 100 mil Sunenergiaj Tegmentoj de Ŝanhajo" ellaborita de estro de la Esplora Instituto de Sunenergio sub la Ŝanhaja Jiaotong-universitato, ĝis 2015 Ŝanhajo plenumos rekonstruadon de 100 mil tegmentoj kun totala areo de 3 milionoj da kvadrataj metroj, kiuj konsistigas 1.5% de tiuj kun totala areo de 200 milionoj da kvadrataj metroj, por efektivigi produkton de elektro per sunenergio. Nun la transformita procento de sunenergio en elektron ne atingis 15. Kvankam la produktokosto de fotovolta elektro estas dekoblo de tiu de termoelektro kaj havas certan malfacilon por grandskale disvastigi sunenergiajn ekipaĵojn, tamen sekve de la disvolviĝo de ĉina fotovolta industrio, oni kredas, ke proksime de 2015 la kosto de fotoelektro estos triono kaj eĉ dekono de la nuna.

Oni povas antaŭvidi, ke dank' al politika subteno de la registaro kaj pluapaŝa malaltigo de produktokosto de esplorado, la industrio havos pli grandan disvolvan ŝancon kaj multan profiton. La vojo de fotovolta industrio estas pli kaj pli larĝa.