Wusuli-rivero estas landlima rivero de Ĉinio kaj Rusio. Wusuli-rivero havas du branĉojn ĉe la supra parto. La orienta fontas en Rusio, kaj la okcidenta fontas el Song'acha- rivero en Ĉinio.

La totola longo de Wusuli-rivero estas 890 km kaj la totala areo de ĝia baseno — 187 mil kvadrataj kilometroj, ĝia parto de 500 km estas landlimo de Ĉinio kaj Rusio kaj ĝia baseno en Ĉinio areas 56.6 mil kvadratajn kilometrojn. La rivero estas larĝa kaj ĝia fluo – malrapida. Laǔlonge de la rivero troviĝas multaj havenoj kun bonaj kondiĉoj por navigado.

La baseno de la rivero estas fekunda kaj abundas je arbaroj, sojfaboj, sorgoj, mineraloj kaj diversaj fiŝoj. Grandaj salmoj estas originalaj fiŝoj de la rivero, el kiuj la plej granda longas 4-5 metrojn kaj pezas 700-800 kilogramojn. Ilia nombro estas mirinde granda en fiŝkapta tempo. Kroniko de Heilongjiang notas: "Ĉiuaǔtune grandaj salmoj el maro kontraǔflue suprennaĝas en la rivero. Ili estas tiel multaj, ke loĝantoj trapasas la riveron sur ili." Ĉiujare Wusuli-rivero glaciiĝas dum 4 monatoj, kaj tiam la rivero nenavigebla fariĝas vojo de sledoj, tamen oni povas truigi ion sur la rivero por kapti fiŝojn.

Hutou — grava urbeto en la supra baseno de Wusuli-rivero

La urbeto Hutou havas belan naturan pejzaĝon kaj historiajn vidindaĵojn. En la urbeto troviĝas Guandi-Templo, konstruita antaǔ pli ol 270 jaroj (1723-1736) dank' al monkontribuo de kolektantoj de ginsengo. La traboj kaj kolonoj de la templo kun bildoj kaj gravuraĵoj reflektas antikvecon de la templo. En Hutou troviĝas ankaǔ subtera fortikaĵo, konstruita de ĉinaj laboruloj sub premregado de la japana armeo en 1933. Post kiam japana registaro deklaris sian senkondiĉan kapitulacon la 15-an de aǔgusto de la jaro 1945, la japanaj trupoj garnizonantaj en Hutou persiste kontraǔbatalis. Post intensa batalado, la sovetunia armeo okupis la urbeton Hutou la 26-an de aǔgusto, kaj Hutou fariĝis la lasta batalejo de la Dua Mondmilito. Post la milito, la loka registaro riparis restaĵon de la subtera fortikaĵo kaj faris ĝin muzeo.

Je 4 kilometroj fore de Hutou estas Yueya-lago, ĉe kiu prosperas primitivaj kaj kuriozaj plantoj kaj vivas diversaj bestoj. En somero floras en la lago ĉarmaj nelumboj. En la 1990-aj jaroj oni faris Hutou turisma loko, konstruis Ĉina-Japanan Amikan Ĝardenon, Ŝtata Arbara Ĝardeno de Wusuli-rivero. Turistoj povas ŝipveturis en la rivero kaj ĝui belan pejzaĝon laǔlonge de Wusuli-rivero.

Raohe — grava haveno al Rusio

Raohe-gubernio en malsupra baseno de Wusuli-rivero rigardas Rusion trans la rivero. En aprilo de 1989, Ĉinio sankciis, ke Raohe-haveno estas ŝtata unuagrada dogana haveno al Rusio, kaj en 1993 la haveno Raohe (Ĉinio)-Bikin (Rusio) oficiale malfermiĝis.

Raohe-haveno estas grava pordo de Ĉinio al ekstrem-orienta regiono de Rusio, unika tervoja kaj dumvintra transporta kaj unuagrada ŝtata pasaĝera kaj vara haveno.

La haveno per aǔtotramo transportas ĉarojn kun varoj sen bezoni transŝarĝon. Tio ne nur ŝparas monon, sed ankaǔ evitas damaĝon. 4-5 horoj sufiĉas por trapasi la havenon kaj atingi Khabarovsk, tio estas granda avantaĝo por transportado de freŝaĵoj.

Oktobro estas la plej bela sezono de Wusuli-rivero. Starante borde de la rivero oni rigardas malproksimen, kaj kolorriĉa bildo vidiĝas: prujnmorditaj folioj estas aǔ ruĝaj aǔ flavaj, plaĝoj punktas la riveron, akvobirdoj ŝvebas super la rivero, ombro de montoj speguliĝas en la riverakvo.

Wusuli-rivero per sia vasta akvo kaj riĉaj manĝaĵoj donas al birdoj bonan vivkondiĉon. Ardeoj kaj kormoraroj grupe serĉas manĝaĵojn, ludante ĉe la rivero.

Wusuli-rivero estas unu el la plej malgrave poluitaj riveroj de la mondo, sendube tio rezultas de mediprotektado de la popoloj de Ĉinio kaj Rusio.