Nun instruado de la ĉina lingvo fariĝis furora temo, kaj pli kaj pli multaj homoj ekster Ĉinio eklernas la ĉinan lingvon.

Nun ekster Ĉinio estas 50-60 milionoj da ĉinoj, kaj funkcias pli ol 3000 ĉinlingvaj lernejoj. Krome la ĉina lingvo estas instruata en pli ol 2300 lernejoj en pli ol 100 landoj. La nombro de lernantoj de la ĉina lingvo superis 30 milionojn.

Zhang Weichao, membro de la 10-a Tutlanda Komitato de la Ĉina Popola Politika Interkonsiliĝa Konferenco kaj direktoro de la Eduka Fondaĵo de Ĉina Lingvo de Ĉinio, diris, ke dum la procezo de ekonomia tutmondiĝo, ĉina ekonomio rapide disvolviĝas kaj ludas gravan rolon, tial altiĝas la valoro de la ĉina lingvo kun historio de pli ol 5 mil jaroj. En Francio, posedo de la ĉina lingvo fariĝas privilegio por akiri laboron; kaj Lee Kuan Yew, kabineta mentoro de Singapuro, atentigis, ke oni devas bone koni Ĉinion, ĝiajn kulturon kaj lingvon, se Singapuro volas eniri en la grandan merkaton en Ĉinio.

Zhang Weichao opinias, ke la registaro devas investi pli multe al instruado de la ĉina lingvo, kaj samtempe, oni devas sufiĉe mobilizi la socian forton por subteni instruadon de la ĉina lingvo per diversaj manieroj.