Eduko

		Unua paĝo >> Scienco kaj Eduko >> Eduko

Famaj universitatoj de Ĉinio (II)

Tsinghua-Universitato (http://www.tsinghua.edu.cn/eng/index.jsp)

Fama universitato certe havas ian spiriton.

Tia spirito kunigis intelektulojn de diversaj fonoj al komuna celo kaj sublimiĝis al fortaj afineco kaj luktemo, kiam la universitato renkontis malfacilojn. Kaj tiuj, kiuj estis klerigitaj en la universitato, ĉiam sopiras al ĝi.

La spirito de Tsinghua-Universitato emfazas, ke Tsinghua-anoj devas havi malproksimvidecon kaj grandanimecon, preni sur sin la respondecon de la nacio kaj socio, sin deĉidi al progresigo de scienco kaj tekniko por feliĉigi la homaron. Ĝi akcentas ankaŭ rilatojn de studo kaj konduto, tute kiel ĝia universitata devizo: “Senĉesa strebemo en lernado, grandanimeco por akcepti la tutan mondon.”

Koncize pri Tsinghua-Universitato

Tsinghua-Universitato havas grandan reputacion en Ĉinio. Ĝi sidas en la ĝardeno Tsinghua en nordokcidenta antaŭurbo de Pekino, privata ĝardeno antaŭ centoj da jaroj kaj poste parto de Yuanmingyuan antaŭ pli ol cent jaroj.

Antaŭe Tsinghua-Universitato estis Tsinghua-lernejo, fondita en 1911 kiel prepara lernejo por studentoj al Usono. Por kulturi talentulojn en Ĉinio fondiĝis en 1925 ĝia altlerneja departemento kaj samjare ĝia instituto, kiu, en 1928, sin nomis ŝtata Tsinghua-Universitato. Post eksplodo de la Kontraŭjapana Rezistmilito en 1937, Tsinghua-Universitato translokiĝis suden al Changsha de Hunan-provinco, kie ĝi kuniĝis en instruado kun la Pekina Universitato kaj Nankai-Universitato. Poste, kiam la tri lernejoj translokiĝis al Kunming, Yunnan-provinco en sudokcidenta Ĉinio, ili havis komunan nomon Ŝtata Sudokcidenta Unuiĝinta Universitato. En 1946 Tsinghua-Universitato revenis al sia antaŭa sidejo kaj funkciigis homasciencan, leĝan, natursciencan, inĝenierian kaj agrikulturan kolegiojn kun 26 fakultatoj.

Post reklasifiko de la altlernejoj de la tuta lando en 1952, Tsinghua fariĝis plurfaka politekniko destinita por kulturi inĝenierojn kaj teknikistojn. En 1978 Tsinghua-Universitato eniris en novan disvolviĝan periodon, restarigis iom post iom lernofakojn de naturaj sciencoj, ekonomio, administrado kaj homaj sciencoj, fondis kolegion por diplomitaj studentoj kaj kolegion de daŭra edukado. En 1999 la Centra Metiarta Instituto aliĝis al ĝi, kaj establiĝis la Belarta Kolegio de Tsinghua-Universitato.

La nuna Tsinghua estas sinteza kaj esplora universitato kun 13 kolegioj kaj 54 fakultatoj natursciencaj, inĝenieriaj, homasciencaj, artaj, historiaj, filozofiaj, ekonomiaj, administraj, leĝaj, edukaj, medicinaj k.a.

Diplomitoj de Tsinghua

En pli ol 90 jaroj post la fondiĝo de la universitato, eliris el ĝi pli ol 100 mil diplomitoj, kaj multaj el ili estas majstroj kaj eminentuloj de diversaj kampoj.

Diplomitoj de Tsinghua en aeronaŭtiko kaj astronaŭtiko de Ĉinio

Hua Fengxiang, pioniro de moderna aeronaŭtiko de Ĉinio, diplomiĝis el Tsinghua-Universitato en 1920.

Liang Shoupan, fondinto de raketa afero de Ĉinio kaj ĝenerala projektinto de patrolmisilo, diplomiĝis el la mekanika fakultato de Tsinghua-Universitato en 1937.

Zhao Jiuzhang, la unua direktoro de la satelita instituto de la Ĉina Akademio de Sciencoj, diplomiĝis el la fizika fakultato de Tsinghua-Universitato en 1933. Li gvidis faradon de la unua satelito de Ĉinio “Dongfang n-ro1”.

Qian Xuesen, patro de misilo de Ĉinio, sendita de Tsinghua-Universitato al Usono por studi en 1934 kaj, post reveno de Usono al Ĉinio, profesoro en Tsinghua-Universitato.

Yang Nansheng, raketa fakulo kaj akademiano de la Internacia Akademio de Astronaŭtiko, diplomiĝis en 1943 el la aeronaŭtika fakultato de la Sudokcidenta Unuiĝinta Universitato (antaŭe fakultato de aeronaŭtika inĝenierado de Tsinghua-Universitato).

Chen Yijian, ĝenerala projektinto de novtipa bombaviadilo “Feibao”, diplomiĝis el la aeronaŭtika fakultato de Tsinghua-Universitato en 1952.

Lin Huabao, ĝenerala projektinto de la revenigebla satelito de Ĉinio, diplomiĝis el la fakultato de civila inĝenierado de Tsinghua-Universitato en 1952.

Kvar majstroj de ĉinologio de Tsinghua-Universitato

Liang Qichao (1873-1929), erudiciulo kaj burĝa reformisto de Ĉinio, instruis en siaj lastaj jaroj en Tsinghua-kolegio. En 1914 li prelegis en Tsinghua kaj instigis la studentojn per vortoj el la libro “Yi Jing”, kiuj fariĝis devizo de Tsinghua-Universitato.
Chen Yinke (1890-1969), historiisto kaj vaste konata majstro plej erudicia kaj fruktodona en la 20-a jarcento de Ĉinio, multjare laboris kiel profesoro en Tsinghua-Universitato, la Sudokcidenta Unuiĝinta Universitato, Zhongshan-Universitato, kaj Oxford-Universitato. Li ne estis lingvisto, sed posedis 23 lingvojn.

Wang Guowei (1877-1927), lernis lingvojn, sciencon, filozofion, psikologion kaj sociologion en sia juneco, kaj ekstudis literaturon en la aĝo de 30 jaroj. Mezaĝa, li ekentreprenis historion de la antikva Ĉinio, kaj brile sukcesis en studado pri antikva skribo sur testudaj ŝeloj.

Zhao Yuanren (1892-1982), patro de la ĉina lingvistiko kaj unu el la pioniroj de moderna muziko de Ĉinio, estis dungita de Cornell-Universitato de Usono, kiel fizika docento en la aĝo de 28 jaroj. Li revenis al Tsinghua-Universitato en la aĝo de 29 jaroj kaj laboris kiel docento de fiziko, matematiko kaj psikologio.

Arkitekturaj majstroj de Tsinghua-Universitato

Liang Sicheng (1901-1972), fama ĉina arkitektura edukisto, erudiciulo de protektado de antikvaj konstruaĵoj, kaj specialisto de arkitektura historio gvidis la projektadon pri la Momumento de Popolaj Herooj.

Hu Jingming, ĝenerala projektinto de la granda ponto super Yangzi-rivero en Nankino, diplomiĝis el Tsinghua-Universitato en 1924.

Jiang Huancheng, diplomito el la fakultato de civila inĝenierado de Tsinghua-Universitato en 1963, gvidis la projektadon de la televida turo Orienta Perlo de Ŝanhajo.

Xiong Ming, diplomito kiel magistro el Tsinghua-Universitato en 1956, projektis la Ĉefurban Sportan Halon de Ĉinio.

Ma Guoxing, diplomito el la arkitekura fakultato de Tsinghua-Universitato en 1965, projektis la Ŝtatan Olimpikan Sportan Centron de Ĉinio.

Krome, el Tsinghua-Universitato eliris famaj filozofo Zhang Dainian; lingvisto Ji Xianlin; historiisto Wu Han; arkeologo Xia Nai; matematikistoj Hua Luogeng kaj Chen Xingshen; dramisto Cao Yu, fondinto de la ĉina moderna dramo; erudiciulo Qian Zhongshu; dramistoj Hong Shen kaj Ying Ruocheng; diplomatoj Zhang Hanfu, Qiao Guanhua, Zhang Wenjin; Wang Tieya, juĝisto de la Internacia Tribunalo en Hago, kaj Mei Ru’ao, ĉefa juĝisto de la Internacia Juĝejo en Fora Oriento.

Ĉ. 30% da akademianoj de la Ĉina Akademio de Sciencoj kaj ĉ. 20% da tiuj de la Ĉina Akademio de Inĝenierio estas diplomitoj el Tsinghua-Universitato. Krome, iuj el ĝiaj diplomitoj funkcias kiel gravaj ŝtataj kaj partiaj gvidantoj.

Vortoj pri Tsinghua-Universitato

En pli ol 90 jaroj post sia fondiĝo, Tsinghua-Universitato antaŭeniras samtakte kun la epoko, glorigas la spiriton de sia universitata devizo kaj elkulturis arojn da eminentuloj por la patrujo. Instruantoj kaj studentoj de Tsinghua-Universitato faris gravajn kontribuojn al disvolvo de sciencaj kaj edukaj aferoj de Ĉinio, al liberiĝo kaj reprosperiĝo de la ĉina nacio.

-- Ĉina eksprezidanto Jiang Zemin

Tsinghua-Universitato plej frue starigis ponton inter edukado de kulturoj de Ĉinio kaj Okcidento. Ĝi estas lulilo de altnivelaj talentuloj por reprosperigi la ĉinan nacion kaj forta kastelo konfidebla de Ĉinio en praktikado de reprosperigo de la lando per scienco kaj eduko.

-- Wang Dazhong, iama direktoro de Tsinghua-Universitato

Kiam mi observis Tsinghua-Universitaton per ĝiaj malsamaj evoluaj formoj en pli ol 90 jaroj post ĝia fondiĝo, ĝiaj sukcesoj kaj malfacilaj momentoj, du aferoj min skuis. La unua kompreneble estas ĝiaj sukcesoj, precipe ĝiaj altkvalitaj scienco kaj teknologio, ĝiaj distingiĝaj servoj liveritaj al ekonomia disvolviĝo, kaj ĝia internacia reputacio; la dua -- ĝia brila tradicio longhistoria kaj vivoplena, bona kvalito de ĝiaj instruantoj kaj studentoj tenata pli ol 90 jarojn kaj firma volo en disvolvo de kreiveco kaj personeco de ĝiaj studentoj.

-- Colin Lucas, iama direktoro de Oxford-Universitato

La spirito “senĉesa strebado en lernado, grandanimeco por akcepti la tutan mondon”, la scienca spirito “strikteco, diligenteco, realeco kaj kreiveco”, la universitata stilo “Serĉi veron el la faktoj kaj agi super vortoj” kaj la eduka celo “Disvolviĝi ĉiuflanke por esti kvalifikita”, tiuj universitataj tradicioj senĉese evoluas kaj faris Tsinghua-Universitaton longhistoria kaj ĉiamnova.

-- Ŝtata konsilantino Chen Zhili

Se oni demandos al kio ŝuldas niaj progresoj kaj sukcesoj, mi respondos, ke ili ŝuldas al niaj penado kaj diligenteco, al edukado kaj kulturado de instruistoj de Tsinghua-Universitato, al subtenado de la registaro kaj socio, ktp. Sed esence analizite, ili baziĝas sur la spirito, tradicio kaj etoso de Tsinghua-Universitato. Dank’ al la originala spirito kaj kultura tradicio kreitaj, akumulitaj kaj hereditaj de aroj kaj aroj da antaŭuloj de Tsinghua, sane kreskas novaj generacioj de la universitato.

-- Yuan Si, profesoro de Tsinghua-Universitato

Klasikaj konstruaĵoj