"Altteknologiaj Olimpikoj", "verdaj Olimpikoj" kaj "humanismaj Olimpikoj" estas tri temoj de la Pekinaj Olimpikoj en 2008. Unu el la celoj de la Pekinaj Olimpikoj en 2008 estas fari la Olimpikojn fenestro montranta novteknologiajn atingojn. Nun Pekino allogas scienc-esplorajn instituciojn kaj entreprenojn en- kaj eksterlandajn en konstruado de la Olimpikoj por ke novteknologiaj produktaĵoj estu uzataj dum la Pekinaj Olimpikoj.

Konstruado de la stadionoj kaj sporthaloj estas bazo por okazigi originalajn kaj altnivelajn Olimpikojn kaj grava laboro por sukcesigi scienc-teknologiajn Olimpikojn. En la konstruado de la stadionoj kaj sporthaloj de la Pekinaj Olimpikoj projektistoj aplikis novajn ideojn kaj teknologiojn, klopodante liveri plej bonajn sportejojn, ekipaĵojn kaj kondiĉojn por la konkurso.

Ŝtata Stadiono de Ĉinio

La Ŝtata Stadiono de Ĉinio, nomata "birdkaĝo" pro sia konstrua stilo, estos ĉefa kunvenejo de la Pekinaj Olimpikoj en 2008 kaj tie okazos la inaŭguro, fermo, matĉoj de atletiko kaj piedpilko. Post la Olimpikoj ĝi servos daŭre kiel loko por sportado kaj amuzado.

La projekto de la "birdkaĝo" estas kune farita de svisaj kaj ĉinaj fakuloj pri arkitekturo. La ekstera parto de la stadiono estas ŝtala strukturo, kies ĉiuj partoj interligiĝas kaj formas retan kradaron, kaj la tuta konstruaĵo similas al birdkaĝo. La ŝtala reto estas kovrata per travidebla plato. Neniu kolono estas en la stadiono. Tio estos oportuna por spektantoj spekti ludojn.

Ŝtata Naĝa Centro de Ĉinio

La Ŝtata Naĝa Centro de Ĉinio situas en la Olimpika Parko de Pekino. Tie okazos naĝado kaj plonĝado dum la Pekinaj Olimpikoj.

La projekto "Akva Kubo" por la Ŝtata Naĝa Centro de Ĉinio estis farita de konstru-projektaj kompanioj ĉina kaj aŭstralia. La projekto "Akva Kubo" inspiriĝis el formoj de akva, sapa kaj aliaj naturaj vezikoj. La tuta naĝhalo estas travidebla, kvazaŭ mondo en akvo.

Laŭ la projekto la muro de la halo havas ŝtalan strukturon. Ĝia interna spaco estas dividita per vezikforma strukturo. La muroj kaj plafono estas perfekte kunligitaj. Tia strukturo estas ne nur tre fortika, sed ankaŭ sismo-eltena. Por ke spektantoj estu en agrable malvarmeta medio, la ŝirma strukturo de la naĝhalo estas farita el 3000 ETFE-kusenoj, kiuj kovras 100 mil kvadratajn metrojn.

Uzado de avangardaj mediprotektaj teknologioj estas alia trajto en la konstruado de Olimpikaj stadionoj kaj sporthaloj. En la Ŝtata Stadiono de Ĉinio oni uzas termofontan energion kaj konverteblan klimatizan sistemon por ventolado, kaj en la Ŝtata Naĝa Centro de Ĉinio—sunenergion. Oni uzas ankaŭ sistemon de avangarda teknologio pri elektro-produkto per sunenergio.

Nun diversaj stadionoj kaj sporthaloj por la Pekinaj Olimpikoj estas en konstruado. En 2008 spektantoj povos ĝui Olimpikajn ludojn en altteknologiaj sportejoj.

	La ĉefa stadiono sidanta en la suda parto de la Ŝtata Olimpika Sporta Centro kun 40 mil sidlokoj, kie okazos ludoj de piedpilko kaj moderna pentatlono
	Ŝtata Sporthalo de Ĉinio en la Olimpika Parko, kie okazos konkursoj de gimnastiko, litsaltado kaj manpilko
	Sporthalo de la Pekina Universitato por matĉoj de tabloteniso
	Sporthalo de la Pekina Industria Universitato por volano kaj arta gimnastiko